Святый, славный и всехвальный Великомучениче Христов, Иоанне, несумненный ходатаю нашего спасения. Молим Тя раби Твои, собрании днесь в Божественнем Твоем храме и раце святых мощей поклоняющиеся; милостив буди якоже нам, тако и далече отстоящим и на помощь Тя призывающим и мученическая Твоя страдания похвалами ублажающим. Испроси нам всем у Многомилостиваго Господа Бога и Спаса нашего Иисуса Христа прощения и оставления грехов до сего дне и часа содеянных нами. Сохрани нас невредимых от всех козней лукаваго и ненаветну жизнь нашу соблюди от всех зол душевных и телесных; всегда, ныне и присно и во веки веков. Аминь.