ЗАКЛИНАТЕЛЬНЫЕ МОЛИТВЫ (А.Аксенов)

Заклинание cвятого Василия Великого
Заклинаю тя, злоначальника хульнаго, начальника сопротивнаго восстания. И самодетеля лукавства, заклинаю тя, низверженнаго от горняго светоношения, и во тьму глубины низведенного возношения ради, заклинаю тя, и всю ниспадшую силу последовательную твоего произволения.

Заклинаю тя, душе нечистый, Богом Саваофом и всем воинством Ангел Божих, Адона Элои, Бога Вседержителя, изыди и разлучися от раба (рабы) Божия (имя больного человека): заклинаю тя Богом, словом вся создавшим, и Господом Нашим Иисусом Христом, единородным Сыном его, прежде век неизреченно, и безстрастно от него рожденным, видимую же и невидимую тварь соделавшим, по образу своему человека создавшим, законом первое естественно сея детоводившим, и ангельским приставлением сохраншим, водою согрешение выше потопившим, и поднебесныя бездны разустившим, и гиганты нечествовавшия растлевшим. И столп скверных разстрясшим, и землю Содомом и Гоморров огнем жупельным испепелившим, его же свидетель дым неугасимый курится: жезлом море раздельшим, и люди ногами немокрыми проведшим, и мучителя фараона, и воинство богоборное, во веки волнами нечестия брань потопившим: в последняя от Девы чистыя воплотившимся неизреченно, и целы печати чистоты сохранившим: омыти крещением древнюю нашу скверну благо изволившим, еюже мы преступлением осквернихомся.

Заклинаю тя крестившимся во Иордане, и образ нам нетления в воде по благодати подавшим: его же ангелы и вся силы небесныя удивишася, воплощенна Бога смирившагося зряще: егда безначальный Отец, безначальное рождество сыновнее откры, и Святаго Духа схождение, троическое единство свидетельствова.

Заклинаю тя оным, ветру запретившим, и бурю морскую укротившим, полк демонский отгнавшим, и зеницы очныя от утробы лишенныя, брением слепые прозрети соделавшым и древнее рода нашего создание обновившим, и немыя глаголати исправившим, струпы проказ очистившим, и мертвыя от гробов воскресившим, даже до погребения человеком беседовавшим, и аде восстанием пленившим, и все человечество необъято смертию устроившим.

Заклинаю тя Богом Вседержителем, богодухновенным гласом человеки вдохнувшим, и апостолом содействовавшим, и всю вселенную благочестия исполнившим: убойся, бежи, разлучися демоны нечистый и скверный, преисподний, глубинный, льстивый, безобразный, видимый безстудия ради, невидимый лицемерия ради, и деже аще еси, или отидеши: или сам еси веелзевул, или сотрясаясь, или змиевидный, или звероличный, или яко пара, или яко птица, или нощеглагольник, или глухий, или немый, или от нашествия устрашаяй, или растерзаяй, или наветуяй, или во сне тяжце, или в недузе, или в язве, или в смесе скоктаяй, или слезы любосластныя творяяй, или блудный, или злосмрадный, или похотный, или сластотворный, или отраволюбивый, или любонеистовый, или звездоволхвуяй, или домоволшебник, или безстудный, или любопрительный, или непостоянный, или с месяцем пременяяйся, или временем неким сообращаяйся, или утренний, или полуденный, или полуночный, или безгодия некоего, или блистания, или по случаю сретился еси, или от кого послан еси, или нашел еси внезапу, или в мори, или в реце, или от земли, или из кладязя, или от стремнины, или от рова, или от езера, или от трости, или от вещества, или от верху земли, или от скверны, или от луга, или от леса, или от древа, или от птиц, или от грома, или от покрова баннаго, или от купели водны, или от гроба идольскаго, или отнюдуже вемы, или не вемы, или от знаемых, или от незнаемых, и от непосещаемаго места, отлучися и преминися, устыдися образа рукою Божиею созданнаго, и воображеннаго: убойся воплощеннаго Бога подобия, и не сокрыйся в рабе Божием (Божией) (имя) во жезл железный, и пещь огненныя, и тартар, и скрежет зубней, отмщение преслушания тебе ожидает. Убойся, умолкни, бежи, невозвратися, нисокрыйся со инем лукавством нечистых духов: но отиди в землю безводную, пустую, неделанную, на нейже человек не обитает: Бог един презирает связаяй всех уязвляющих, и слосоветующих на образ его, и веригами мрака, тартару предавый, в долгую нощь и день, тебе, всех злых искусителя и изобретателя диавола. Яко велий есть страх Божий, и велия слава Отца и Сына и Святаго Духа, ныне и присно и во веки веков. Аминь.

Заклинание святого Григория Чудотворца
Запрещает ти Господь, диаволе, пришедый в мир, и вселивыйся в человецех, яко да твое низложи мучительство, и человеки от тоя исхити: на древе сопротивныя силы победивый, солнцу померкшу, земле поколебавшейся, и гробом отверзающимся, и телесем святых восстающим: разрушивый смертию смерть упразднивый державу имущего смерти. Сиесть: тебе Диавола.

Заклинаю тя Богом, показавшим древо живота, и с чином высшим херувима, и пламенное оружие обращающееся стрещи то, запрещен буди. О нем бо ти запрещаю, ходившим яко по суху на плещу морскую, и запретившим буреем и ветрам: егоже воззрение изсушает бездны, и прешение тает горы: Той бо и ныне повелевает ти нами.

Убойся, изыди, и устранися от создания сего, и да невозвратишися, ниже утаишися в нем, ниже срящеши его, или действующи: ни в ночи, ни в дне, или в часе, или в полудне: но отиди в свой тартар, даже до уготованного великого дня судного. Убойся Бога седящего на Херувимех, и призирающего бездны: его же трепещут Ангелы, Архангелы, Престолы, Господствия, Начала, Власти, Силы, Многоочитые Херувимы и Шестокрылатые Серафимы: его же трепещут небе и земля, море и вся яже в них, изыйди и устранися от Божьего создания сего, и верного раба Христа Бога нашего: онем бо и запрещаю, иже ходити на крылу ветрию, и творити Ангелы своя духи. Изыйди и устранися от создания сего со всею силою и ангелы своими: яко прославися Имя Отца, и Сына, и Святаго Духа, ныне и присно, и во веки веков, аминь.

Молитва святого Иоанна Златоустого
Боже вечный, избавив род человеческий от пленения диавольскаго, избави раба Твоего (рабу Твою) (имя) от всякаго действа духов нечистых; повели лукавым и нечистым духом же и демоном отступи от души и от тела раба Твоего (рабы Твоея) (имя); и не пребывати ниже сокрытися в нем (ней), да бежат именем твоим святым, и единороднаго Твоего Сына, и животворящего Твоего Духа, от создания рук Твоих, да очищен быв от всякаго искушения диавольскаго, преподобно и праведно и благочестно поживет, сподобляем пречистых тайн единороднаго Сына Твоего и Бога нашего: с нимже благословен еси, и препрославлен, с Пресвятым, и Благим, и Животворящим Твоим Духом, ныне и присно и во веки веков, аминь.

Заклинание святого Иоанна Златоустого
Божественное же, и святое, и великое, и страшное, и нестерпимое именование и призывание творим на твое прогнание, отступниче, такожде и запрещение на твое погубление, диаволе. Бог Святый, безначальный, страшный, невидимый существом, неприкладный силою, и непостижимый божеством, Царь славы, и Вседержитель Владыка, запрещает тебе, диаволе, от не сущих во еже быте вся благолепно словом составивый, ходяй на крилу ветренню.

Запрещает тебе Господь, диаволе, призываяй воду морскую, и изливаяй сию на лице всея земли. Господь сил имя ему.

Запрещает тебе Господь, диаволе, от безчисленных небесных чинов огненных, страхом служимый, и воспеваемый, и от множества ликов ангельских и архангельских, с трепетом поклоняемый и славимый.

Запрещает тебе Господь, диаволе, окружаемый от окрест предстоящих сил и страшных шестокрыльных и многоочитых херувимов, и серафимов, лица своя двема крилома покрывающих, незримаго ради его и неизследимаго божества, и двема крилома своя ноги покрывающих, твоеже не попалитеся от неизреченныя славы, и недомыслимаго величества его, и двема крилома летающих, и небо исполняющих от вопля своего: Свят, Свят, Свят Господь Саваоф, исполни небо и земля славы Его.

Запрещает тебе Господь, диаволе, от недра отча сошедый с небес Бог слово, и от Девы святыя поклонным неизреченным, и пречистым воплощением неизглаголанно явивыйся в мире, еже спасти его, и владычнею Своею силою свергий тебе с небес, и отметив всячески показавый.

Запрещает тебе Господь, диаволе, реки морю умолкни, престани: и повелением абие проста.

Запрещает тебе Господь, диаволе, пречистым плюновеним брение сотворивый, и лишенный уд от рождения слепому создавый, и свет даровавый.

Запрещает тебе Господь, диаволе, дщерь архисинагогову словом оживотворивый, и вдовича сына из уст смерти восхитивый, и своей его матери цела и здрава даровавый. Запрещает тебе Господь, диаволе, Лазаре из мертвых четверодневно нерастленна яко неумерше и безвредна, во удивление многим представивый.

Запрещает тебе Господь, диаволе, заушением клятву испразднивый, и копием пречистых ребр своих, райское хранящее пламенное оружие оставивый.

Запрещает тебе Господь, диаволе, заплеванием честнаго своего начертания всякую слезу о всякаго лица отертый.

Запрещает тебе Господь, диаволе, водрузивый крест во утверждение едино и спасение мира, в падение же твое, и всех под тобою ангелов.

Запрещает тебе Господь, диаволе, давый глас на кресте своем, и завеса храма раздрася, и камение разседошася, и гробы отверзошася, и от века умерший восташа.

Запрещает тебе Господь, диаволе, смертию смерть. Умертвивый, и живот востанием своим человеком даровавый.

Запрещает тебе Господь, диаволе, сошедый во ад, и гробы его истрясый, и всех в нем содержимых связанных свободивый, и к себе воззвавый: егоже вратницы видевше ужасошася, и подвижницы адовый крыющеся исчезоша.

Запрещает тебе Господь, диаволе, из мертвый воскресый, Христос Бог наш, и всем воскресение свое даровавый.

Запрещает тебе Господь, диаволе, на небо со славою вознесыйся ко отцу своему, и одесную величествия на престоле славы седяй.

Запрещает тебе Господь, паки гряды со славою на облацех небесных, со святыми ангелы своими судити живым и мертвым.

Запрещает тебе Господь, диаволе, огнь неугасаемый, и червь неусыпаемый, и тьму кромешнюю уготовавый тебе в вечную муку.

Запрещает тебе Господь, диаволе, егоже вся боятся и трепещут от лица силы его, яко нестерпим есть гнев, еже на тебе прещения его: той запрещает тебе Господь, диаволе, страшным своим именем.

Устрашися, вострепещи, убойся, разлучися, потребися, бежи, падый с небесе, и с тобою вси лукавии дуси: всякий дух лукавый, дух нечистоты. Дух лукавства, дух нощный и дневный, полуденный же и вечерний, дух полунощный, дух мечтанный, дух сретательный, и земный, или водный, или в дубравах, или в трости, или стремнинах, или во двопутиях, и трепутиях, во езерах, и или в реках, в домех, во дворех, и в банях преходяй и вреждаяй, и изменяяй ум человеческий вскоре разлучитеся от создания создателя Христа Бога нашего, и отлучитеся от раба Божия (рабы Божия) (имя): от ума, от души, от сердца, от утроб, от чувств, и от всех удов его (ея), во еже быте ему (ей) здраву (вей) и всецелу (лей), и свободну (ней), знающу (щей) своего Владыку и зиждителя всех Бога, собирающа заблуждшия, и дающа им печать спасения, рождениеми обновлением Божественного крещения, во еже сподобитися ему (ей) пречистых, и небесных, и страшных его таинств, и соединитися стаду его истинному, на месте злачне вселяюшуся (щейся), и на воде упокоения питему (мей), и палицею креста спасительного и известного наставляему (мей), во оставление грехов, и в жизнь вечную.

Яко тому подобает всякая слава, честь, и поклонение, и великолепие, со безначальным его Отцем, и с Пресвятым и Благим и Животворящим Его Духом ныне и присно и во веки веков, аминь.

Молитва святого Иоанна Златоустого
Всем нечистым духом запретивый, и силою глагола изгнавый легеона, явийся и ныне единородным Твоим Сыном на создание, еже по образу Твоему сотворил еси, и измие насильствованное от сопротивнаго, да помилованное и очищенное сочинится святому Твоему стаду, и сохранится храм одушевлен Святаго Духа, и божественных и пречистых святыней, благодати, и щедротами и человеколюбием единороднаго Твоего Сына: с нимже благословен еси, и со пресвятым и благим, и животворящим Твоим Духом, ныне и присно, и во веки веков, аминь.

Запрещение святого Григория чудотворца
Бог святый, страшный, и славный, во всех делех и крепости своей непостижимей и неизследимый сый: той предуставивый тебе, диаволе, вечныя муки томление, нами непотребными рабы своими повелевает тебе, и всей споспешной твоей силе, отступити от сего создания руку его. Заклинаю убо, тя, вселукавый, и нечистый, и скверный, и мерзкий, и чуждый душе, силою Иисуса Христовою, всякую власть имущаго на небесе и на земли: рекшаго глухому и безгласному бесу, изыйди от человека, и ктому да не внидиши вон: отиди, познай свою суетную силу, ни на свиньях власть имущую.

Помяни повелевшаго ти по твоему прошению в стадо свиное внити. Убойся Бога его же повелением земля на водах утверждена бысть: создавшего небе, и поставившаго горы правилом: и удолия мерилом: и положишаго песок морю предел, и в воде зельной стезю твердую: прикасающагося горам, и воздымяться: одевающагося светом яко ризою: пропинающего небо яко кожу: водами превыспренняя своя: основавшего землю на тверди ея, и непреклониться во век века: призывающего воду морскую, и приливающего ю на лице всея земи: изыйди и устранися от создания его.

Заклинаю спасительною страстию Господа нашего Иисуса Христа, и честным Его Телом и Кровию и пришествием Его страшным: придет бо и не умедли, судяй всей земли: и тебе, и содейственную твою силу умучит в геене огненной, предав в тьму кромешнюю, и деже червь неусыпает, и огнь неугасает: Яко держава Христа Бога нашего, с Отцем и Святым Духом, и ныне и присно и во веки веков, аминь.

Молитва запрещения святого священномученика Киприана
Призываем тя, Владыко, Боже Вседержителю, вышний, неискусимый, мирный Царю: призываем тя, сотворшаго небо и землю, от тебе бо произыйде Альфа и Омега, сиесть: Начаток и Конец. Предавый человеком в послушание четвероножныя и безсловесныя животныя, ты бо покорил еси сия Господи, простри руку твою крепкую, и мышцу твою высокую и святую, и присещением твоим святым посети создание твое сие, и низпосли ему Ангела мирна, Ангела державна, души и тела хранителя, яко да запретит и отженет от него всякого лукавого и нечистого демона: Ты бо еси Господь един высокий Вседержитель, благословенный во веки веков, аминь.

Заклинаю тя, душе враждебный, вседержителем Богом.

Заклинаю тя Духом, вдохнувшим человеком живот вечный его же Имя страшно, и усты человеческими неизглаголенно.

Заклинаю Тя грядущим огнем, и жупелом и песком и трубою, ему же явлшуся солнце побежит на запад, и звезды спадут на земли, и восплачутся вся племена и людие. Заклинаю тя ходившим по морю, и укротившим волны его.

Заклинаю тя повелети хотящим морю, издати вся в нем истопившияся, и земли в ней лежащих мертвых представити живы на суд Богу.

Заклинаю тя повелевшим морю непреступати предела своего, дондеже прииде Господь судити миру.

Заклинаю тя сошедшим на Синайскую гору, и глаголавшим с Моисеем и Аароном, и явльшимся има в пламени огненном, и в столпе облачном.

Заклинаю тя изведавшим люди своя от земли Египетския, и давши им из камени сладкую воду питии, и претворившим воду в кровь.

Заклинаю казнившим Египта Моисеем десятью язв.

Заклинаю тя поразившим первенца Египетския.

Заклинаю попалившим Содому и Гоморру, и пять градов иных одождением с небесе огненаго града.

Заклинаю тя седящим на престоле славы, пред ним же огнь течет, и ему же престоят тьмами тем Ангел, и тысячи тысяща Архангел, и Серафими вопиющи: Свят, Свят, Свят, Господь Саваоф, исполнь небо и земля славы Твоея, благословен еси во веки, аминь.

И ты, душе лукавый, аще не хотя воздаждь славу Имени святому его, и деже аще седиши в удеси тела создание его: или в главе, или в темени, или в брове, или в очию, или в ушию, или во устех, или в языцех, или в выи, или в плещу, или междуплещима, или в мышца, или в персех, или в души, или в сердце, или в селезне, или в плюцах, или в чреве, или под чревом, или в точиле, или в естественных, пределех, или в крепости, или в жилах, или в коленах, или в лыстах, или в голени, или в руку, или в ногу, или в жилицах. Или в кровавици, или в костех, или в мозгу, или в крови, или в власех, или в ногтех, или во всем теле, отлучися устранися и изыйди, душе лукавый. И даждь славу Богови, яко Господь сильный над всеми есть: ибо клястеся и деже аще кто призовет Имя Господне, еже ищезнути вам.

Заклинаю тя Именем Господа Иисуса Христа, Распеньшагося при Понтийстием Пилате. Заклинаю тя рекшим: небо мне престол есть, земля же подножие ногама моима.

Заклинаю тя Архангелами его, Михаилом и Гавриилом, Уриилом и Рафаилом.

Заклинаю тя Великим Именем Сына Божия, отлучитися от создания сего, и ниже с ним ясти, ниже сложну бытии с ним, но дати славу, и службу Имени святому его.

Заклинаю тя, всеобразное на злострадание, и нападение дневное и полунощное, идеже аще еси, отлучися от создания сего, и неизведи душу, ни разсыпили, ни разруши тело его. Но остави его чиста и жива Богу на службу.

Заклинаю тя грядущим утвердити престол между небом и землею, и судити всему роду человеческому. Праведным же и грешным. Ты убо, душе нечистый, убойся Имени Святаго его, и отиди от создания сего. Убойся огня неугасимого, убойся родства огненнаго всепоядающего: Убойся уготовавшего тебе огнь и жупел и пекло губителеви: Убойся явльшагося Моисеови и Ааронови на горе Синайстей. Убойся явлшагося Иоанну на реце Иорданстей, его же видевши река убояся, и уступи, и возвратися воспять: И ты душе лукавый убойся, отступи и устрашися от создания сего.

Заклинаю одеющимся от создания сего.

Заклинаю одеющимся светом яко ризою, единем имеющим бессмертие: Тому бо подобает всякая слава, честь, и поклонение Отцу, и Сыну, и Святому Духу, ныне и присно и во веки веков, аминь.

Заклинание
Заклинаю тя, гордыне и всякой злобы лукавства же и отступничества изобретателю и начальниче диаволе, превеликим, предивным, преславным, страшным и неизреченным, чести всякоя и поклона достойным, великолепным именем единого в Троице Святей славимого и поклоняемого Отца, и Сына, и Святаго Духа, небо и землю и вся яже на них видимыя и невидимыя, и тебе добра и Света от небытия сотворшаго, гордости же ради и возношения твоего извергшагося и всех споспешников твоея злобы нечистых духов с небес, и узами мрака связавшим: убойся сего, осужденниче, и скоро изыйди от создания его.

Заклинаю тя, вселукавый враже человеческого рода, древний змию, превеликим и страшным именем Господа нашего Иисуса Христа, ему же всяко колено небесных, и земных и преисподних, с трепетом покланяется: убойся сего, проклятый низвержиниче, изыйди, устранися, и отиде от создания сего.

Заклинаю тя и запрещаю ти спасительным воплощением Господа нашего Иисуса Христа, и преславным его от присно Девы Марии Рождеством, имже ключа девства невредив, цела сохрани: убойся сего истины сопротивниче и отиди от создания его.

Заклинаю тебе, всех злых искусителя, плотию осмодневно обрезавшимся Господем, и четыридесятаго дне Девою Материю в Иерусалим приведенным, и на объятиях праведного Симеона возлегшим, и дванадесятолетним возрастом сый возшедшим в Иерусалим, и посреде учителей седшим, и разумом своим Божественным, и ответы предивными всех послушающих удивившим: убойся сего, отступниче мерзкий, и скоро изыйди.

Заклинаю тя, скверный демоне, Господем во Иордане плотию крестившимся, и Духом Святым в образе голубином сошедшим нань, и гласом Отчим с небесе бывшим: ты еси Сын мой возлюбленный, в тебе благоволи: убойся сего, безстудный лестниче, и отиди и к тому не возвратися.

Заклинаю тя, погибельный душе, четыредесять дней, и четыредесять нощий постившимся, и твое искушение, диаволе, победившим, рек: неискусиши Господа Бога твоего: убойся сего, всякоя лжи отче, и абие от создания сего устранися.

Заклинаю тя, диаволе, Богом воплощенным, на земли явлшимся, и с человеки пожившим, несчетныя благодеяния сотворившим, и путь спасения мирови показавшим, и повеления спасительная давшим, и бесы словом прогнавшим, и различныя недуги исцелившим: убойся сего, адский вселукавый смоче, встрепещи и устранися.

Заклинаю тя, адский всепагубный льве, прокаженная очистившим, слепыя прозрети, немыя глаголати, глухия слышати, хромыя ходити, расслабленныя востати сотворившим, и мертвыя воскресившим: убойся сего исконный человекоубийцо Диаволе. И скоро с трепетом отбежи.

Заклинаю тя, прегордый лукавства рачителю, смирения путь нам показавшим в низложение твоея высокия гордыни, умовением ног святым своим учеником и апосталом: убоися сего гордынею вознесыйся, и до ада низвержением смиривыйся, и абие изыйди и бежи.

Заклинаю тя, всякого суровства и немилости исполненный мучителю, на тайной своей вечери преестественно существо хлеба в тело свое Пресвятое, и существо вина в кровь Свою пречестную претворивый, и верным своим в снедь и питие во оставление грехов подлавый, и сие творити в свое воспоминание повелевый: убойся того, всех ересей изобретателю и нечестия всякаго кореню, Диаволе, и ничто же умедли, но абие изыйди и устранися.

Заклинаю тя, всех грехов и погибели источниче, безкровную страшною животворящею же Жертвою Тела и Крове Господа нашего Иисуса Христа, еюже вернии спасаются. Ты же и погибельная твоя сила испражняется, убойся сея, непокоятельная злобо, мерзкий и нечистый душе, и бежи от создания сего.

Заклинаю тя, зависти, глубинно преестественною в вертограде Молитвою Господнею, и каплями крове, яко пот от Пречистаго Тела его на земли капнувшими: убойся сих доброненавистниче, и погибели сыне, и скоро изыйди.

Заклинаю тя, прелести всякия источниче, изволившим тя, связан биен и веден к Анне, и Каиафе, заушен же, оплеван, и люто мучим обнощь, бытии, и Пилату представшим, и от него много истязанным, мучимым же и у столпа наго связанным и битым, в хламиду наругания облеченным, венцем терновым обложенным, Тростием по главе биенным, от Ирода укоренным и поруганным, и на смерть от Пилата осужденным: убойся сего древняя злобо, всякия муки достойный, и его лютых болезней и страшных, нам же спасенных мук, имиже твою немощную силу сокруши, и вострепетав в бегство претворися.
Заклинаю тя, с небесе спадшая деннице, на смерть ведомы Господем, и Крест свой понесшим, и многая уничижения и раны тогда отведущих его спасения нашего, погибели же твоея ради претерпевшим.

Заклинаю тя, безстудный оболгателю и клеветниче, наго на Кресте посреде двою разбойнику распятым, и четырма гвоздьми пригвожденным, отцом и желчию напоенным, и лютыми и неизглаголанными болезньми его, яже на Кресте нашего ради спасения, осуждения же, твоего дела волею претерпе, и святыми Пречистыми Кровий его нещадными излиянии: убойся сих, Божий враже и лукавствия источниче, ужаснися и абие изыйди.

Заклинаю тя, безстыдный оболгателю и клеветниче, седьмию словес Господних на Кресте на спасении наше, на твою же вечную погибель изреченными, и животворною его смертию, ею же мы ожихом, ты же умервшлен еси: убойся сего, всякия благодати вечного очужденне, востени и скоро ищезни от создания сего.

Заклинаю тя, всякоя правды противниче, тем его же солнце на кресте висяща видевшее померче, и земля встрепета, и завеса церковная раздрася, и его же силою камение распадошася, и гробы отверзошася, и телеса усопших святых воссташа, и по воскресении его внидоша в святый град, и явишася многим: убойся сего суровый мучителю, и лукавства бездно, и скоро изыйди и устранися от создания его.

Заклинаю тя, развратниче вселукавый, прободением Пречистаго ребра Господня, изнего же истече Кровь, и вода, в наше спасение и обновление, в твое же конечное сотрение, и силы твоея сокрушение: убойся сего огня вечнаго вещество, и скоро устранися.

Заклинаю тя, безчиния всякого и раздоров изобретателю, Боготелесным Господа нашего Иисуса Христа погребением, и всесильным его в ад с душею и Божеством сошествием, иже тамо силою своею Божественною возлобе сильного злоночальника связа, и силу твоея злобы испраздни, и души праведных тамо связанных плени, и собою яко силен в крепосте изведе: убойся сего, вечнаго Божьего гнева наследниче, и скоро от создания его отиди. Заклинаю тя, крамольниче наветливый, смертию смерть поправшим, и твою мучительскую державу разрушившим, преславно же из мертвых силою своего Божества самовластно Воскресшим Господем нашим Иисусом Христом, убойся сего крепкаго Победоносца, Божий сопротивоборче и погибельный сосуде, и трепетно вскочив, устранися.

Заклинаю тя, клятвы и осуждения наследниче, по воскресении своем, Апостолом своим преславно плотию явившимся, и мир свой тем и власть свою на прогонение тебе давшим, и с ними рыбы печены и от пчел сот ядшим, и Фому прикосновением своих пречистых ребр, ручных же и ножных язв уверовавшим, и четырядесять дней на земли пребывшим: убойся сего, вечныя смерти повинниче, и скоро изыйди, и далече отскочи от создания его. Заклинаю тя, мерзкий и всякия нечистоты исполненный душе, плотию вознесшимся на небеса Господем нашим Иисусом Христом, и на престоле славы одесную Бога Отца седящим, и в скончании дний Пятьдесятница по своему неложному обещанию Духа Святаго от Отца исходящего, на своя Апостолы в огненных языцех низпославшим, и тех Богоразумением, темиже весь мир просветившим, и от Идолослужения к себе обратившим, тебе же и твою лесть испразднившим: Убойся сего, всякоя злобы неистощимая пучино, вострепещи, убойся, и отбежи.

Заклинаю тя, напрасный, свирепый, и напыщенный душе, паки со славою многою на облацех грядущим судити живым и мертвым великим Богом и Спасителем нашим Иисусом Христом, тебе же и всю споспешную злобную твою силу вечному огню в нескончаемыя веки предати хотящим: убойся сего, душехищный зверю, огня же геенскаго и вечныя муки виновниче, изыйди, что медлиши, небесныя брани побежденный начальниче, отступи, Божий отступниче, устранися, Богом побеждение хульниче, бежи, Христом испражненный и попранный враждоначальниче, Бог сильный в крепости, и крепкий в силе, страшный в бранех, и дивный в чудесах, той тебе милости недостойному, всякия неправды исполненному, и светоносия небесного лишенному прелестнику, крепко и грозно мною недостойным рабом своим повелевает, отиди абие от создания сего, в пустая и безводная места, и деже ниже человек, ниже зверь обитает, и к тому во веки веки не возвратися к нему: Яко сила и держава, царство и слава, Христа Бога нашего со безначальным его Отцем, и с Пресвятым, и Благим, и Животворящим его Духом, ныне и присно и во веки веков. Аминь.

Молитва благодарственная об избавлении от беса
Благодарим Тя, поем, славим и величаем крепкую и великолепную силу державы власти Твоея Господи Боже Отче Вседержителю: яко премногих ради Твоих неисчетных щедрот, и человеколюбного Твоего милосердия, изволил еси избавити и свободити раба своего (или рабу свою) (имя): от обдержавшаго и мучившаго его (или ея) нечистого духа: и смиренно рабски припадающе, прилежно Твое благоутробие молим, да не к тому дух лукавый власть имать над ним (или нею), но бегая, да бежит, и далече устраниться, и ктому да не возвратится. Да вселишися вонь (или вню), Господи всемилостивый, Тебе благоизволяющу, благость и мир единородного Твоего Сына, Господа же нашего Иисуса Христа, им же искуплении быхом от работы вражия, и всякаго зла неубоимся, яко с нами Господь и благодать Святого Духа да укрепит, и утвердит его (или ее) во всяком деле благом, творити волю Твою благую, благоугодную же и совершенную во вся дни живота его (или ея) и Тебе со всеми верными славасловити и величати, с единородным Твоим Сыном, и Всесвятым, и Благим, и Животворящим Ти Духом, ныне и присно, и во веки веков. Аминь.

Молитва
Господи, Иисусе Христе, Боже наш, превечный и соприсносущный, безначального Отца Живаго Бога Сыне, безначальных его недр не отлучайся, с небес сошедый, и человек непреложно бывый, яко да человека от прелести и мучительства диавола свободив себе присвоиши: и яко да бесовская вся злодеяния испраздниши, святым своим учеником и апостолам власть дал еси, еже наступати на змия и скорпия, и на всю силу вражию: Тебе ныне недостойные раби Твои прилежно молим: призри милостивно на дом сей (или на место сие) злокознием лукавых человек, и волшебных их обованием очародеянный (или очародеянное), лукавством же диаволим оплазняемый и обуреваемый (или оползняемое и обуреваемое место) и всемощною ти силою человеколюбно вся сия раждени (разгони) и в ничто же обрати, яко да безпакостно от них верни раби Твои зде обитающии и скоты их в славу Твою пребудут. Твое бо есть еже миловати и спасати нас, Боже наш, и Тебе славу возсылаем, со Безначальным Ти Отцем, и со Пресвятым и Благим, и Животворящим Духом, ныне и присно и во веки веков. Аминь.

Заклинание
Заклинаю вас, вселукавии злоначальницы, проклятий мерзскии бесове, иже аще кто есте, и елико вас есть, иже обаяниями, чародейвы же и злотворными деяний отдавшаго себе вам лукаваго человека приведени бывше, дом сей обуреваете, и злыми мечты и оплазнствы своими, живущих в нем, оскорбляете и озлобляете: и о всесильном и всемощном имени единаго Вседержителя Бога, в Троице Святей славимаго Отца и Сына и Святаго Духа; и в силе Честнаго Животворящего Креста, и всех спасительных страстей, и животворная смерти Господа Бога и Спаса нашего Иисуса Христа, еюже вся темная ваша власть, и лютое над человеки, и всеми созданиями Божиими мучительство испразднено и уничтожено есть, крепко повелеваю, яко ты отныне со всеми волшебствы, обаяния же и чародействы вашими, от дому сего скоро отбежите, и к тому никакоже никогда же вспять возвратитеся, ничтоже убо медлите.

О проклятии низвержинницы, но обратитеся вспять и скору оттуду со всеми злодеяниями вашими далеки отбежите, и дадите место Божией силе, Своим неизчетным милосердием, и благодатию разрушающей злодеяния ваша.

Да запретит вам перст Божий, Фараоновых волхвов обояния, и волшебныя мечтания бездельна сотворивый, и тех мучевый.

Да запретит вам Той, Егоже сила запрещением Павла Апостола немощную вашего лукавства силу в Елиме волхве всякия лести и злобы исполненном, вразе же всякия правды и диавольском сыне имже вы многих повреждаете, и пути Господня правыя развращати потшистеся, обличи, посрами, испраздни. Да запретит вам Той, о Егоже имени Павел Апостол запрещением Духа пытливаго от откровицы оныя изгна яже волшебством своим стяжение велие даяше Господем своим.

И якоже на святую Иустину Креста знамением, и на нем распятого Христа Бога нашего силою огражденную, обаяющу и вас убеждающу Киприану, ничтоже успе, но страхом и трепетом одержими отбегосте. Сице и ныне да нападет на вас, и обымет вы ужас, трепет и страх Бога Вседержителя Отца и Сына и Святаго Духа, хотящего вас низринути в огонь вечный и безконечно в нем мучити. Аминь.

По прочтении этого заклинания нужно взять заранее приготовленную святую воду и кропить ею весь дом и подворье. Во время окропления святой водой нужно говорить следующие слова:

«Да обегут, и отступят от дому сего (или квартиры сей) вся лукавая диавольская обояния, чародеяния и волшебная действа, окроплением воды сея священныя, и во ничтоже да обратятся и исчезнут: во имя Отца и Сына и Святаго Духа. Аминь».

Заклинание
Господи, Иисусе Христе, Боже Наш, советом превечного Ти Отца, и соприсносущного Ти Духа, милосердия ради милости и еже к человеком неизреченныя любви с небес съшедый, и действом Пресвятого Духа от Пречистыя Девы Марии воплотивыйся, и человек совершенный, Бог сый истинный бывый, яко да диавольскую всю испразднивши силу, и от мучительства его создание Твое свободиши, святым Твоим учеником и апостолом, и теми другоприимательне всем верным Твоим, паче же Иереом (священникам) власть дал еси.

Еже наступати на змию и скорпия, и на всю силу вражию, и еже от создания Твоего изгоняти бесы: Тебе ныне недостойные рабы Твои прилежно молим, призри на создание Твое сие, злокознием лукавых человек, и волшебным их обованием очародеянное, обуреванием же и насильством диаволим гибнущее, и всемощною Ти силою человеколюбно вся волшебства и злодеяния сия, и обуревания злоначального врага от него отжени, и в ничтоже обрати, и даруй им яко живота источник здравие, яко да и в бессловесных Твое благодеяние явится, в словесных же верных рабех Твоих Твоего милосердия нами ищущих, Твое всесвятое и великолепое имя славится, с безначальным Ти Отцем, и со Пресвятым и Благим и животворящим Ти Духом, ныне и присно, и во веки веков. Аминь.

Заклинание
Заклинаю вас, вселукавые злоначальници древни змиеве, проклятии же и мерзкие бесове, иже аще кто есте, и елико вас есть, иже обованиями чародействы же и злокозными деянии от давшего себе вам лукавого человека приведении бывшее, создание сие Божие обуреваете, и лютым своим мучительством погубляете, и всесильным и всемощным Именем единого Вседержителя Бога, в Троице Святой славимого, Отца, и Сына, и Святаго Духа, и в силе Честнаго и Животворящего Креста, и всех спасительных Страстей и животворная смерти Господа Бога и Спаса нашего Иисуса Христа, ею же вся темная ваша власть и лютое над человеки и всеми созданиями Божьими мучительство испразднено, и уничтожено есть.

Крепко повелеваю, яко да отныне со всеми волшебствы обованиями и чародействы вашими от создания сего Божия скоро отбежите, и к тому никакоже николиже воспять возвратитеся. Ничтоже убо медлите о проклятии низвержинници, но обратитеся воспять, и скоро оттуду со всеми злодеянии вашими далече отбежите, и дадите место Божьей силе, своим неисчетным милосердием и благостию разрушающей злодеяния ваша.

Да запретит вам перст Божий, фараоновых волхвов обояния, и волшебныя мечтания бездельны сотворивый, и тех мучивый.

Да запретит вам той его же сила запрещением Павла Апостола, немощную вашего лукавства силу в елимме волхве, всякия лести и злобы исполненном вразеже всякия правды, и диавольском сыне, имже вы многих повреждасте, и пути Господня правыя развращати потшастеся, обличи, посрами, и испразни.

Да запретит вам той, о егоже Имени тогожде Павла Апостола запрещение, духа пытливаго от отроковицы оныя изгна, яже волшебством своим тяжание велие даяше господем своим. И якоже на святую Иустину, Креста знамением, и на нем распятого Христа Бога нашего силою огражденною обовающу Киприану, ничтоже успесте, но страхом и трепетом одержими отбегосте: сице и ныне да нападет на вас и обыймет вы ужас, трепет и страх Бога Вседержителя, Отца, и Сына, и Святаго Духа, хотящего вас низринути в огнь вечный, и безконечно в нем мучити, аминь.

Заклинание святого мученика Трифона
Совершающий это заклинание должен читать только тех животных, которые наносят вред участку (полю, огороду…) на данный момент, наименования же прочих читать не положено. Связано это с тем, что могут погибнуть сразу все животные и насекомые, в том числе и полезные (пчелы и т. д.).

Заклинаю вас, многовидные зверие, червие, гусеницы, хрущи, и прузи, мыши, щуры и критица, и различная роды, мух, и мушиц, и молий, и мравий, овада же и ос, и многоножниц, и многообразные роды ползающих по земле животных, и летающих птиц вред и тщету нивам, виноградом, садом же и вертоградом наносящия, Богом Отцем Безначальным, и Сыном Его безначальным и единосущным, и Духом Его Пресвятым, Отцу и Сыну единосущным и с Пресвятым Животворящим.

Заклинаю вас вочеловечением единородного Сына Божия, Господа нашего Иисуса Христа, и пожитием Его на земли с человеки, страстию же Его спасительною, и животворную Его смертию, и тридневным Его воскресением, и на небеса Вознесением, и всем Его Божественным спасительным смотрением.

Заклинаю вас и святыми многоочитыми Херувимы, Шестокрылатыми Серафимы, летающими окрест престола, и воспевающими Свят, Свят, Свят Господь Саваоф.

Заклинаю вас святыми Ангелы, и всеми силами небесными, и тысячами тысяч, иже с многим страхом предстоят славе Господней, да не обидите винограды ни нивы, ни вертограды, ни древеса, ни зелий раба Божия (имя хозяина земли, огорода…), но отидите на дивыя горы, на неплодная древеса, наняже даровал есть вам Бог повседневную пищу.

Заклинаю вас Честным Телом и Кровию Господа нашего Иисуса Христа, истиннаго Бога и Спаса нашего, имже спасение дадеся нам и искупление, о Егоже имени мученицы святые умроша, да не обидите ни нивы, ни винограды, ни всякое древо плодовитое, и безплодное, и ниже лист зелий да не обидите от окружения предела, и места раба Божия (имя хозяина земли, огорода…), но отидите скоро от места сего, исчезните и погибните, умалитеся, и час от часа безвестни будите, ищезающе и погибающее от мест и предел рабов Божих, правоверно призывающих имя истиннаго единаго Бога в Троице Святей славимаго Отца и Сына, и Святого Духа, благословенно сущее, ныне и присно, и в безконечныя веки веков. Аминь.

БЛАГОДАРЮ!

Большое спасибо.