145 МОЛИТВ К ПРЕСВЯТОЙ БОГОРОДИЦЕ ПЕРЕД ЕЕ ЧУДОТВОРНЫМИ ИКОНАМИ

Молитва
ко Пресвятой Богородице
пред Ее иконою «Тамбовская»

Царице моя преблагая, надеждо моя Богородице, прибежище сирых и странных Предстательнице, скорбящих радосте, обидимых Покровительнице! Зриши мою беду, зриши мою скорбь, помози ми яко немощну, направи мя яко странна. Обиду мою веси, разреши ту, якоже волиши: яко не имам иныя помощи разве Тебе, ни иныя Предстательницы, ни благия Утешительницы, токмо Тебе, о Богомати, яко да сохраниши мя и покрыеши во веки веков. Аминь.
Тропарь, глас 4
Днесь светло красуется град Тамбов, и святитель Христов Питирим радуется. Сияет бо ныне чудесы икона Твоя, Владычице, юже из первопрестольнаго града Москвы святитель принесе, и дивное людем являет Твое заступление, подающи исцеление всем с верою к Тебе притекающим. Темже умильно вопием Ти: спасай нас иконою Твоею, Дево Всепетая.
Кондак, глас 3
Ангели Божии и вси святии на Небеси ныне радуются, видяще славу Твою, Пречистая Дево. Вернии бо людие пред иконою Твоею приносят Тебе благодарственныя молитвы, ради милости и щедрот, явленных всем нам, наипаче же граду нашему. Потщися, Богородице Дево, и в предния дни спасати нас Твоим заступлением.
Величание
Величаем Тя, Пресвятая Дево, Мати Христа Бога нашего и чтим образ Твой святый, от негоже источаеши исцеления всем, с верою к Тебе притекающим.

Молитва
ко Пресвятой Богородице
пред Ее иконою «Теребовлянская»

Пренепорочная Госпоже, небесе и земли Царице, Пречистая Дево Богородице! Смиренно припадая молюся Тебе: помози ми, едина многомощная Владычице, единому грешному, приими недостойное мое моление, и принеси Единородному Твоему Сыну, Богу моему, яко да милостив будет страстней и скорбней души моей; сам бо за множество беззаконий моих не смею простертися и просити прощения, но Тебе предлагаю Ходатаицу и теплую Молитвенницу, яко Матернее к рождшемуся из Тебе Богу имаши дерзновение, и ничтоже Тебе невозможно, аще точию восхощеши. Не презри моих слез, не возгнушайся воздыхания моего, не отрини сердечныя моея болезни, оживи умерщвеннаго мя страстьми. Свет Невечерний возсиявшая нам, душу мою, омраченную злодеяньми просвети; Врача рождшая, уврачуй души моея неисцельныя язвы, волнующагося житейскою бурею, на стезю мя покаяния направи. Приими, Госпоже Всемилостивая, молебную сию службу мою, и человеколюбивому Богу принеси. О прекрасная палата Владычня, сотвори мя дом Божественнаго Духа; Светоносная Сене Небесная, духовную благодать во мне грешнем направи. Руце мои недостойныя воздеваю, и сердце и устне скверныя ко хвалению Тебе, Всенепорочная, исправляю, да душетленных мя пакостей избавиши. Всякия нечистыя помыслы от сердца моего отжени, язык мой полезная глаголати исправи, очесем моим подаждь слезы, на омытие скверны греховныя, нозе мои устрой непреткновенно к деланию заповедей Божественных ходити, руце мои соделай к Вышнему на воздеяние благоприятное, слух мой отверзи ко усердному слышанию заповедей Божественнаго Евангелия, яко да и творити я возмогу, Тобою, Всесильная Царице, укрепляемь. И подаждь ми время покаяния, и от внезапныя смерти свободи мя. На кончине же предстани ми, Всемилостивая Мати, в разлучении души от страстнаго моего тела, от воздушных мытарей и князей темных изимающи мя, и рукописание многих грехов моих раздирающи, одесную же блаженнаго стояния на страшнем суде сподоби мя. Ты свет омраченнаго ума моего, Ты утешение души моей, Ты упокоение спасения моего, Ты едина непостыдная предстательница к Богу. Егоже милостива мне сотвори, Владычице, и присносущных благ наследника яви мя в будущей жизни, идеже есть всех веселящихся жилище. Яко да и тамо Тя, Премилостивая Молитвеннице, сподоблюся величати, и славити великолепое имя Сына Твоего, Христа Спасителя и Бога нашего, со Безначальным Его Отцем, и Всесвятым и Благим и Животворящим Духом, во веки веков. Аминь.
Величание
Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем, с верою притекающим.

Молитва
ко Пресвятой Богородице
пред Ее иконою «Тихвинская»

Благодарим Тя, о Преблагая и Пречистая, Преблагословенная Дево, Владычице, Мати Христа Бога нашего, о всех благодеяниих Твоих, яже показала еси роду человеческому, наипаче же нам, христоименитым людем Российскаго народа, о нихже ниже самый ангельский язык к похвалению доволен будет, якоже и ныне удивила еси неизреченную Свою милость на нас, недостойных рабех Твоих, преестественным самопришествием пречистыя Твоея иконы, еюже всю просветила еси Российскую страну. Темже и мы, грешнии, со страхом и радостию покланяющеся, вопием Ти: о Пресвятая Дево, Царице и Богородице, спаси и помилуй Святейшаго Патриарха Московскаго и всея Руси, архиереи же и вся люди, и подаждь стране победы на вся враги, и сохрани вся грады и страны христианския, и сей святый храм от всякаго навета вражия избави, и всем вся на пользу даруй, ныне пришедшим с верою и молящимся рабом Твоим, и покланяющимся пресвятому образу Твоему, яко благословенна еси с рождшимся от Тебе Сыном и Богом ныне, и присно, и во веки веков. Аминь.
Тропарь, глас 4
Днесь, яко солнце пресветлое, возсия нам на воздусе всечестная икона Твоя, Владычице, лучами милости мир просвещающи, юже великая Россия, яко некий дар Божественный, свыше благоговейне восприемши, прославляет Тя, Богомати, всех Владычицу, и от Тебе рождшагося Христа Бога нашего величает радостно. Емуже молися, о Госпоже Царице Богородице, да сохранит вся грады и страны христианския невредимы от всех навет вражиих, и спасет верою покланяющихся Его Божественному и Твоему пречистому образу, Дево Неискусобрачная.
Кондак, глас 8
Притецем, людие, к Деве Богородице Царице, благодаряще Христа Бога, и к Тоя чудотворней иконе, умильно взирающе, припадем, и возопием Ей: о Владычице Марие! Присетивше страну сию Твоего честнаго образа явлением чудесно, спасай в мире и благовременстве вся христианы, наследники показующи небесныя жизни. Тебе бо верно зовем: радуйся, Дево, мира спасение.

Молитва
ко Пресвятой Богородице
пред Ее иконою «Толгская»

О Пресвятая Госпоже, Дево Богородице, вышшая Херувимов и Серафимов и святейшая всех святых! Ты, Всеблагая, на Толге икону Твою многоцелебную блаженному святителю Трифону огневидно явити благоволила еси, и ею многая и неизреченная чудеса соделала еси, и ныне содеваеши, по Твоему неизреченному к нам милосердию. Тебе пред пречистым образом Твоим припадаем и молимся, Преблагословенная рода нашего Заступнице: в странствии сем земнем, многоскорбнем и многомятежнем, не лиши нас Твоего заступления и покрова державнаго. Спаси и защити нас, Владычице, от разжженных стрел лукаваго врага спасения нашего. Укрепи немощную волю нашу к деланию заповедей Христовых, умягчи окаменелая сердца наша любовию к Богу и ближним нашим, даруй нам сокрушение сердечное и покаяние истинное, да, очистившеся от скверны греховныя, возможем принести Творцу благоугодныя Ему плоды добрых дел и сподобитися мирныя христианския кончины и ответа праваго на страшнем и нелицеприятнем Суде Его. Ей, Госпоже Всемилостивая! В час грозный смертный наипаче яви нам Твое многомощное заступление, ускори тогда на помощь к нам, безпомощным, и державною рукою Твоею исхити нас из власти лютаго миродержца, ибо воистину много может молитва Твоя пред лицем Господа, и ничтоже невозможно ходатайству Твоему, аще токмо восхощеши. Темже, на святый образ Твой умиленно взирающе и пред ним, яко живей Ти сущей с нами, покланяющеся, с упованием благим сами себе, и друг друга, и весь живот наш Тебе по Бозе молитвенно предаем и Тя величаем с рождшимся от Тебе Спасителем нашим, Господом Иисусом Христом, Емуже, со Безначальным Его Отцем и Пресвятым Духом, подобает всякая слава, честь и поклонение, ныне и присно и во веки веков. Аминь.
Тропарь, глас 4
Днесь светло сияет на Толге образ Твой, Пречистая Дево Богородице, и, яко солнце незаходимое, всегда верным подадеся, Егоже видев на воздусе, невидимо ангелы, яко никим, держима, преосвященный епископ града Ростова Трифон тече ко явленному светящемуся столпу огненну, и по водам, яко по суху, прейде, и молящеся Ти верно о пастве и о людех. И мы, к Тебе притекающе, зовем: Пресвятая Дево Богородице, верно Тя славящих спасай, страну нашу, архиереев и вся российския люди от всех бед по велицей Твоей милости.
Кондак, глас 8
Чудное и благоприятное светоноснаго зрака Твоего явление, Пречистая Дево, с верою взирающим бывает известное чаяние спасения, столпом бо огненным являющи предстательство, неусыпное и теплое за ны к Богу возсылаеши моление, имже страну Российскую от всяких бед избави, молимся, да радостными усты вопием Ти вси: радуйся, Предводительнице вечнаго блаженства.
Величание
Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем, с верою притекающим.

Молитва
ко Пресвятой Богородице
пред Ее иконою «Трех радостей»,
чтомая в Московской Троицкой на Грязех церкви

О Пресвятая Дево, Всеблагаго Сына Мати Всеблагая, царствующаго града и святаго храма сего Покровительнице, всем сущим во гресех, бедах и болезнех верная Предстательнице и Заступнице! Не презри моления нас, недостойных рабов Твоих, и умоли Сына Твоего и Бога нашего, да всем нам, с верою и умилением покланяющимся пред чудотворным образом Твоим, дарует по коегождо потребе радость: сущим в скорбех и печалех утешение, бедствующим милосердие, сущим в многонедужии нечаемое исцеление и укрепление. О Госпоже Пресвятая, умилосердися о всех чтущих всечестное имя Твое и всем яви всемощный покров Твой и заступление: всякому делу, Сыну Твоему угодному, споспешествуй; всякое дело злое разруши; в недоумении и трудных и опасных обстояниих обретающимся незримую помощь и вразумление с небесе ниспосли. Младенцы воспитай, юныя уцеломудри, отверзи им ум к приятию всякаго полезнаго учения. От домашния брани и от врагов видимых и невидимых защити и сохрани. Супружества в любви и единомыслии сохрани и от вражды единокровных миром и любовию огради. И всем нам даждь друг ко другу любовь, мир и благочестие, и здравие с долгоденствием. Преставившияся в вере и покаянии от жития сего со ангелы и всеми святыми жити сотвори, да вси на небеси и на земли ведят Тя, яко твердую и непостыдную предстательницу рода христианскаго, и, ведуще, славят Тя и Тобою Сына Твоего, со Безначальным Его Отцем и Единосущным Его Духом, ныне и присно и во веки веков. Аминь.
Тропарь, глас 4
От святыя иконы Твоея, радости неизреченныя преисполнила еси сердце благочестивыя жены. О, Пречистая Владычице мира, всемощная Царице, радосте, Приснодево, твари, егда возвратила оной мужа и сына и достояние ея. Такожде и всем нам милосердствуеши, даруй исполнение благих желаний, источая присно текущий источник радости молящимся Тебе и вседушно вопиющим: Радость всему миру родившая, радости исполни неоскудевающия чтущих Тя.
Величание
Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем, с верою притекающим.

Молитва
ко Пресвятой Богородице
пред ее иконою «Троеручица»

О Пресвятая Госпоже Владычице Богородице, велие чудо святому Иоанну Дамаскину явившая, яко веру истинную и надежду несумненную показавшему! Услыши нас, грешных, пред чудотвороною Твоею иконою усердно молящихся и просящих Твоея помощи: не отрини моления сего многих ради прегрешений наших, но, яко Мати милосердия и щедрот, избави нас от болезней, скорбей и печалей, прости содеянныя нами грехи, исполни радости и веселия всех, чтущих святую икону Твою, да радостно воспоем и любовию прославим имя Твое, яко Ты еси от всех родов избранная и благословенная во веки веков. Аминь.
Тропарь, глас 4
Днесь всемирная радость возсия нам велия: даровася святей горе Афонстей цельбоносная Твоя, Владычице Богородице, икона, со изображением тричисленно и нераздельно пречистых рук Твоих в прославление Святыя Троицы, созываеши бо верных и молящихся Тебе о сем познати, яко двема Сына и Господа держиши, третию же яви на прибежище и покров чтущих Тя от всяких напастей и бед избавляти, да вси, притекающии к Тебе верою, приемлют от всех зол свобождение, от врагов защищение, сего ради и мы вкупе со Афоном вопием: радуйся, Благодатная, Господь с Тобою.
Кондак, глас 8
Днесь веселое наста ныне Твое торжество, Богомати Пречистая, вси вернии исполнишася радости и веселия, яко сподобльшеся изрядно воспети предивное явление честнаго образа Твоего и Рождшагося из Тебе Младенца, истинна же Бога, Егоже двема рукама обьемлеши, и третиею от напастей и бед нас изымаеши и избавляеши от всех зол и обстояний.
Величание
Величаем Тя, Пренепорочная Дево, и чтим чудеса образа святаго Твоего, трех пречистых рук Твоих явление в славу Божества, в Троице Бога нашего.

Молитва
ко Пресвятой Богородице
пред Ее иконою «Умиление» Новгородская

О Владычице Богородице, души моея услаждение, изсохшаго сердца моего струе Боготочная, потемненнаго ума моего пресветлый светильниче, ленивыя воли моея путеводительнице, немощи моея сило, наготы облечение, нищеты богатство, неисцелимых ран мощное и скорое врачевание, слез осушение, рыданий утоление, бед претворение, болезней облегчение, уз разрешение, спасения надеждо! Услыши молитву мою: даждь ми время покаяния, ревность спасения, силу в подвизех богоугождения; сохрани мя от напастей и всяких зол, во искушениих же и бедах простри Твою руку помощи, да возстану в падении и не погибну люте. Дондеже пребываю в сем многоболезненном житии, не лиши мене даров Твоея милости. Ущедри благостынею Твоею всю христолюбивую братию, зде предстоящую и молящуюся. Младенцы воспитай, юныя настави, старыя поддержи, малодушныя утеши, заблуждшия вразуми, вдовицы и сирыя призри и защити, на всех любящих и ненавидящих нас излей богатую Твою милость. И при кончине жизни моея, во время исхода моего от телесе, буди ми предстательница: болезнь смертную умягчи, тоску утоли и бедную мою душу приведи к вечным обителем, да не возьмет мене темная сила, ниже да увлечет во глубину ада. Ей, Преблагая Владычице Богородице, души моея умиление! Согрей хладное в вере и любви сердце мое слезами умиления; низпосли ми, скорбящему и обремененному грехми, за молитвы преподобнаго отца Серафима, Твоего чтителя, потребную радость и утешение. Да не лишуся убо, Богоневесто, упования моего о возлюбленном Сыне Твоем, Господе нашем Иисусе Христе, сей прияти. Тому слава и держава, честь и поклонение, со Безначальным Его Отцем, Всесвятым и Благим и Животворящим Его Духом, ныне и присно и во веки веков. Аминь.
Величание
Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем, с верою притекающим.

Молитва
ко Пресвятой Богородице
пред Ее иконою «Умиление» Псково-Печерской

О Преблагословенная Дево Богородице! Мати всех страждущих и болезнующих сердцем! Страны нашея и града Защитнице! Обители Псково-Печерския красото и славо! Призри на нас смиренных, обремененных грехми многими, отягченных скорбьми и печалями, и с сокрушением и слезами взирающих на пречистый лик Твой, в чудотворней иконе явленный. Сохрани от всякаго зла святую обитель сию, юже преподобный Корнилий со старцы Марком и Ионою Тебе вручи и всех в вере и надежде подвизающихся в ней. Спаси и град сей, и вся люди, правоверно живущия и к Тебе прибегающия, от нашествия иноплеменных, от всякаго страха и труса, от мора и глада, от злых человек и всяческой скорби. Приникни к нам милосердием Твоим, яко ликом Твоим Божественным любезно приникла еси к ланите Богомладенца. Согрей нас дыханием Твоея любве и никогдаже отступай от нас, ни в сей жизни, ни в будущей, да чающе Твою всесильную Материнскую помощь, сподобимся безбедно дойти вечныя жизни и прославлять Небеснаго Отца и Сына и Святаго Духа в Троице славимаго Бога, во веки веков. Аминь.
Тропарь, глас 4
Днесь светло красуется обитель сия, яко зарю солнечную восприимши, Владычице, чудотворную Твою икону, к нейже мы ныне притекающе и молящеся Тебе, взываем сице: о Пречудная Владычице Богородице! Молися из Тебе воплощенному Христу Богу нашему, да избавит обитель сию и вся грады и страны христианския невредимы от всех навет вражиих и спасет души наша, яко Милосерд.
Величание
Величаем Тя, Пресвятая Дево, Мати Христа Бога нашего, и чтим чудотворный образ Твой, имже спасла нас от руки вражия.

Молитва
ко Пресвятой Богородице
пред Ее иконою «Умиление» Серафимо-Дивеевской

Приими, Всеблагомощная Пречистая Госпоже, Владычице Богородительнице, сия честныя дары, Тебе единей прикладныя, от нас, недостойных раб Твоих: от всех родов избранная, всех тварей небесных и земных вышшая явльшаяся, понеже бо Тебе ради бысть Господь Сил с нами, и Тобою Сына Божия познахом и сподобихомся святаго Тела Его и пречистыя Крове Его; темже блаженна еси в родех родов, Богоблаженная, херувимов светлейши и серафимов честнейши сущая. И ныне, Всепетая Пресвятая Богородице, не престай молящися о нас, недостойных рабех Твоих, еже избавитися нам от всякаго совета лукаваго и всякаго обстояния и сохранитися нам неврежденным от всякаго ядовитаго прилога диавольскаго; но даже до конца молитвами Твоими неосужденных нас соблюди, яко да Твоим заступлением и помощию спасаеми, славу, хвалу, благодарение и поклонение за вся в Троице единому Богу и всех Создателю возсылаем, ныне и присно, и во веки веков. Аминь.
Тропарь, глас 4,
поемый в Серафимо-Дивеевском монастыре, Нижегородской епархии
К Богородице со умилением припадем, вси грехми обремененнии, чудотворную Ея икону Умиления облобызающе и вопиюще со слезами: Владычице, приими моление недостойных раб Твоих и подаждь нам, просящим, велию Твою милость.
Кондак, глас 3
Юже подражая неплодную смоковницу, аз, окаянный, умиления плода отнюд не приношу и посечения страшуся, но, взирая к чудотворней иконе Твоей Умиления, Владычице, стеню от сердца и вопию: умилися, Благосердая, и мне, окамененному сердцем, благоволи подати душевное и сердечное умиление.
Величание
Величаем Тя, Пресвятая Дево, Мати Христа Бога нашего, и чтим образ Твой святый, от негоже источаеши исцеления всем, с верою к Тебе притекающим.

Молитва
ко Пресвятой Богородице
пред Ее иконою «Урюпинская»

О Всемилостивая Госпоже, Дево Богородице! Вонми смиренному молению нашему и сокрушенно ныне предстоящих образу Твоему услыши глас. Вемы бо, о Содетеля нашего Мати, яко Ты еси предстательство христиан непостыдное и ходатайство ко Творцу непреложное. Вемы и сие, яко беззакония наша превзыдоша главы наша и яко бремя тяжкое отяготеша на нас, и уже несмы достойни видети высоту Небесную, ниже воззрети ко престолу славы Сына Твоего и Бога нашего, но достойни явихомся мук и вечнаго осуждения. Сего ради к Тебе припадаем, Тя просим умиленно, к Тебе со слезами взываем: вознеси к Нему Матернее Твое моление, да не отвержет нас грешных от лица Своего, но, яко Милостив, да простит нам согрешения наша вольная и невольная, на путь спасения нас наставляя и свыше силою ко творению заповедей Своих укрепляя. Да сохранит нас от соблазнов мира, от вожделений греховных, от козней диавольских и от нападения видимых врагов. Да благословит дела рук наших, подавая обители сей и всякому граду и стране обилие благ земных. Да сотворит нам дни благи и безмятежны, да оградит миром Церковь Свою Святую и разстоящаяся да соединит Той, яко Благ Господь, Долготерпелив и Многомилостив, от всея твари со Отцем и Святым Духом славимый во веки веков. Аминь.
Тропарь, глас 3
Явилася еси на древе в Донской земли, благодатная Твоя икона, Богородице, больныя исцеляти, заблуждшия обращати; темже умильно молимся Тебе: избави град наш от всякаго зла и спаси люди, к Тебе притекающия.
Кондак, глас 5
Всеблагая Чистая Богородице, к Тебе прибегаем, вернии, Тобою бо познахом милость Божию, чудную икону Твою, от неяже вси здравие и спасение приемлем.
Величание
Величаем Тя, Пресвятая Дево, и чтим образ Твой святый, от него же истекает благодатная помощь всем, с верою притекающим к нему.

Молитва
пред иконою Успения Пресвятой Богородицы

О Пресвятая Богородице, Дево Владычице, вышшая Ангел и Архангел, и всея твари честнейшая, ангельское великое удивление, пророческая высокая проповедь, апостольская преславная похвало, святителей изрядное украшение, мучеников крепкое утверждение, иноков спасительное наставление, постников неизмогающее воздержание, девствующих чистото и славо, матерей тихое веселие, младенцев мудросте и наказание, вдовиц и сирых кормительнице, нагих одеяние, болящих здравие, пленников избавление, по морю плавающих тишино, обуреваемых небурное пристанище, блуждающих нетрудная наставнице, путешествующих легкое прехождение, труждающихся благое покоище, в бедах сущих скорая заступнице, обидимых покрове и прибежище, ненадеющихся надеяние, требующих помощнице, нищих неистощимое богатство, печальных присное утешение, ненавидимых любовное смирение, грешников спасение и к Богу присвоение, правоверных всех твердое ограждение, непобедимое поможение и заступление. Тобою нам, Владычице, Невидимый видим бысть, и Тебе мольбу приносим, Госпоже, грешнии раби Твои: о премилостивая и пречудная света умнаго Царице, рождшая Царя Христа Бога нашего, Живодавца всех, от небесных славимая и от земных хвалимая: ангельский уме, Светозарная Звездо, святых пресвятейшая, Царице цариц, Владычице всех тварей, Боголепная Девице, нескверная Невесто, палато Духа Святаго, огненный престоле невидимаго Царя, небесный кивоте, носило Слова Божия, огнеобразная колеснице, покоище Живаго Бога, неизреченное составление плоти Христовы; гнездо орла небеснаго, горлице богогласная, голубице кроткая, тихая и незлобивая, Мати чадолюбивая, милостей бездно, развергающая тучу гнева Божия, неизмеримая глубино, неизреченная тайно, несведомое чудо, нерукотворенная Церкве единаго Царя всех век благоуханное кадило, честная багрянице, боготканная порфиро, душевный раю, живоноснаго сада отрасле, цвете прекрасный, процветший нам небесное веселие, грозде спасения нашего, чаше Царя Небеснаго, в нейже растворися от Духа Святаго вино неисчерпаемыя благодати, ходатаице закона, зачало истинныя веры Христовы, непоколебимый столпе, еретиков пагубо, мечу ярости Божия на богопротивных, бесов устрашение, во бранех побеждение, христиан всех неложная хранительнице и мира всего известное спасение. О Всемилостивая Госпоже Дево, Владычице, Богородице, услыши нас молящихся Тебе, и яви милость Твою на людех Твоих, моли Сына Своего избавитися нам от всякаго зла и сохрани обитель, и град и страну верных, и люди, благочестно прибегающия и призывающия имя Твое святое, от всякия напасти, губительства, глада, труса, потопа, огня, меча, нашествия иноплеменников и междоусобныя брани, от всякия болезни, и всякаго обстояния, да ни ранами, ни прещением, ни мором, ни всяким праведным гневом Божиим умалятся раби Твои; но соблюдай и спасай милостию Своею, Госпоже, за ны молящися, и полезное благорастворение воздуха ко времени плоднаго приношения нам даруй: облегчи, возстави и помилуй, Премилостивая Владычице, Богородице Препетая, во всякой беде и нужде сущия. Помяни рабы Твоя и не презри слез и воздыхания нашего, и обнови нас благочестию Своея милости, да со благодарением утешаемся, обретше Тя помощницу. Умилосердися, Госпоже Пречистая, на немощныя люди Твоя, надеждо наша: разсеянныя собери, заблуждшия на путь правый настави, отпадшия от благочестивыя отеческия веры паки возврати, старость поддержи, юныя накажи, младенцы воспитай и прослави славящия Тя, изряднее же Церковь Сына Твоего соблюди и сохрани в долготу дний. О милостивая и премилостивая Царице небесе и земли, Богородице Приснодево! Ходатайством Твоим помилуй Святейшаго Патриарха Московскаго и всея Руси Алексия II, страну нашу Российскую, власти и воинство ея, и вся православныя христианы, сохраняющи их под кровом милости Твоея, ризою Твоею честною защити, и моли из Тебе воплощшагося без семене Христа Бога нашего, да препояшет ны свыше силою, на вся видимыя и невидимыя враги наша, на иноплеменники и единоплеменники, воюющия на нас и на веру нашу Православную. Спаси же и помилуй, Госпоже, преосвященныя митрополиты, архиепископы и епископы православныя, иереи же и диаконы, и весь причет церковный, и вся правоверныя люди, покланяющияся и молящияся пред честною Твоею иконою. Призри на всех нас призрением милостиваго Твоего заступления, воздвигни нас из глубины греховныя и просвети очи сердечныя ко зрению спасения, милостива нам буди зде и на страшном суде Сына Твоего о нас умоли; преставльшияся во благочестии от жития сего рабы Твоя в вечней жизни со Ангелы и Архангелы и со всеми святыми причти, да одесную Сына Твоего и Бога предстанут; и молитвою Твоею сподоби вся православныя христаины со Христом жити и радости ангельския в небесных селениях наслаждатися. Ты бо еси, Госпоже, слава небесных и упование земных, Ты наша надежда и заступница всех притекающих к Тебе и Твоея святыя помощи просящих; Ты молебница наша теплая к Сыну Твоему и Богу нашему; Твоя Матерняя молитва много может на умоление Владыки, и Твоим предстательством ко престолу благодати пресвятых и животворящих Его Таин приступати дерзаем, аще и недостойнии. Темже всечестный образ Твой и рукою Твоею держимаго Вседержителя видяще на иконе, радуемся грешнии, со умилением припадающе и любовию сей целуем, чающе, Госпоже, Твоими святыми богоприятными молитвами дойти небесныя безконечныя жизни и непостыдно стати в день судный одесную Сына Твоего и Бога нашего, славяще Его купно со Безначальным Отцем, и Пресвятым, Благим, Животворящим и Единосущным Духом, во веки веков. Аминь.
Тропарь, глас 1
В рождестве девство сохранила еси, во успении мира не оставила еси, Богородице, преставилася еси к животу, Мати сущи Живота, и молитвами Твоими избавляеши от смерти души наша.
Кондак, глас 2
В молитвах Неусыпающую Богородицу и в предстательствах непреложное упование гроб и умерщвление не удержаста: якоже бо Живота Матерь к животу престави во утробу Вселивыйся Принодевственную.
Величание
Величаем Тя, Пренепорочная Мати Христа Бога нашего, и всеславное славим Успение Твое.

Молитва
ко Пресвятой Богородице
пред Ее иконою «Успение» Киево-Печерской

О, Пресвятая и Пренепорочная Дево Богородице, наша Печерская похвало и украшение, державный покрове Святаго места сего, истинная Владычице избраннаго удела Своего; Приими нас, недостойных раб Твоих, убогое моление, с верою и любовию приносящих пред чудным образом Твоим, да посетиши милостивно греховное житие наше, просвещающи его светом покаяния, осени нас, обремененных скорбьми многими, Твоею Небесною радостию и сподоби нас присно славити Тя в мире и благочестии на месте святем сем, да, без порока прешедше путь жития нашего, помощию Твоею достигнем вечнаго веселия во светлости святых и Богоносных отец наших Антония и Феодосия и всех преподобных Печерских и едиными усты и сердцем воспоем Тя с Предвечным Сыном Твоим, со Безначальным Его Отцем и Пресвятым, Всеблагим, Животворящим и Единосущным Его Духом во веки веков. Аминь.
Тропарь, глас 4
Днесь светло торжествует Печерская обитель и радуется явлением образа Богоматере безмерный лик Печерских отцев, с нимиже и мы непрестанно вопием: радуйся, Благодатная, Печерская похвало.
Кондак, глас 3
Дева днесь невидимо предстоит в церкви и с лики Печерских отцев молится о нас, благоговейно величающих Ея безмерную милость к роду нашему, явльшуюся в чудном образе Ея, обитель Печерскую украшающем.
Величание
Величаем Тя, Пресвятая Дево, и чтим образ Твой святый, имже болезни наша врачуеши и души наша к Богу возводиши.

Молитва
ко Пресвятой Богородице
пред Ее иконою «Утоли моя печали»

Дево Владычице Богородице, паче естества и слова рождшая Единородное Божие Слово, Творца и Владыку всея видимыя и невидимыя твари, Единаго от Троицы Бога, и Бога и Человека, обитель Божества явльшаяся, вместилище всякия святыни и благодати, в немже, по благоволению Бога и Отца, содействующу Святому Духу, вселися исполнение Божества телесне, царским и боголепным достоинством несравненно превознесенная и над всякою тварию преимущая, славо и утешение, и неизреченное веселие ангелов, апостолов же и пророков царственный венче, мучеников преестественное и дивное мужество, поборнице в подвизех и подательнице победы, уготовляющая подвижником венцы и воздаяния вечная и боголепная, всякия чести превышшая, честь и славо преподобных, непогрешительная путеуказательнице и наставнице безмолвия, дверь откровений и духовных Таин, источниче света, врата вечныя жизни, неистощимая реко милосердия, неисчерпаемое море всех боголепных дарований и чудес! Тебе просим и Тебе молим, сострадательнейшую Матерь человеколюбиваго Владыки: буди милостива к нам смиренным и недостойным рабом Твоим, призри благосердием на пленение и смирение наше, уврачуй сокрушения душ и телес наших, разсей видимыя и невидимыя враги, буди нам недостойным столп крепок пред лицем враг наших, бранное оружие, сильное ополчение, Воевода и необоримая Поборница. Яви ныне на нас древния и дивныя милости Твоя, да уведят беззаконнии врази наши, яко Сын Твой и Бог един есть Царь и Владыка, яко Ты еси воистину Богородица, рождшая по плоти истиннаго Бога, яко вся Тебе возможна суть, и елика аще восхощеши, Владычице, власть имаши вся сия совершити на небеси и на земли, и на всяко прошение даровати, елико коемуждо полезна суть: болящим здравие, в мори же сущим тишину и благое плавание. Путешествующим убо спутешествуй и охраняй я, плененныя спаси от горькаго рабства, утеши печальныя, облегчи нищиту и всякое иное телесное злострадание, всех свободи от душевных недуг и страстей невидимыми Твоими предстательствы и наставлении, яко да безпорочно и непреткновенно путь сея временныя жизни совершивше, наследим Тобою и оная вечная блага во Царствии Небеснем. Верныя же цари наша, иже страшным именем Единороднаго Сына Твоего почтени суть, и уповают на Твое предстательство и на милость Твою, и во всех имут Тя свою ходатаицу и поборницу, укрепи невидимо противу обстоящих врагов, разсей облак уныния, души их облежащь, избави я от душевнаго утверждения, вместо же онаго даруй им светлое благодушие и радость, паки утверждающи мир и безмятежие державы и царства их. Спаси молитвами Твоими, Владычице, сию Тебе наипаче посвященную паству, всякий град и страну, от глада, труса, потопа, огня, меча, нашествия иноплеменников, междоусобныя брани, и всякий праведно на ны движимый гнев отврати, благоволением и благодатию Единороднаго Сына и Бога Твоего, Емуже подобает всякая слава, честь и поклонение, со Безначальным Его Отцем, и со Присносущным и Животворящим Его Духом, ныне и присно и во веки веков. Аминь.
Тропарь, глас 5
Утоли болезни многовоздыхающия души моея, утолившая всяку слезу от лица земли, Ты бо человеков болезни отгониши и грешных скорби разрушаеши, Тебе бо вси стяжахом надежду и утверждение, Пресвятая Мати Дево.
Кондак, глас 6
Не ввери мя человеческому предстательству, Пресвятая Владычице, но приими моление раба Твоего, скорбь бо обдержит мя, терпети не могу демонскаго стреляния, покрова не имам, ниже где прибегну окаянный, всегда побеждаемь, и утешения не имам, разве Тебе Владычице мира, упование и предстательство верных, не презри моление мое, полезно сотвори.
Величание
Величаем Тя, Пресвятая Дево, и чтим образ Твой святый, имже болезни наша врачуеши и души к Богу возводиши.

Молитва
ко Пресвятой Богородице
пред Ее иконою «Феодоровская»

О Пресвятая Владычице Богородице и Приснодево Марие, единая надеждо нам грешным! К Тебе прибегаем и Тебе молим, яко велие имаши дерзновение пред рождшимся от Тебе по плоти Господом Богом и Спасителем нашим Иисусом Христом. Не презри слез наших, не возгнушайся воздыханий наших, не отрини скорби нашея, не посрами упования нашего на Тя, но матерними молении Твоими умоли Господа Бога, да сподобит нас, грешных и недостойных, свободитися от грехов и страстей душевных и телесных, умрети миру и жити Ему Единому по вся дни живота нашего. О Пресвятая Владычице Богородице, путешествующим спутешествуй и ограждай, и охраняй оныя, избави плененных от пленения, свободи страждущих от бед, утеши сущих в печали, скорбех и напастех, облегчи нищету и всяко злострадание телесное и даруй всем вся потребная к животу, благочестию и жизни временней. Спаси, Владычице, вся страны и грады и сей град, имже сия чудотворная и святая икона Твоя дадеся во утешение и ограждение, избави я от глада, губительства, труса, потопа, огня, меча, нашествия иноплеменных, междоусобныя брани и отврати всякий гнев, на ны праведно движимый. Даруй нам время на покаяние и обращение, избави нас от внезапныя смерти и во время исхода нашего предстани нам, явльшися, Дево Богородице, и избави нас от воздушных мытарств князей века сего, сподоби на страшнем Судищи Христове стати одесную и соделай нас наследники вечных благ, да славим во веки великолепое Имя Сына Твоего и Бога нашего, со Безначальным Его Отцем и Святым, и Благим, и Животворящим Его Духом, ныне, и присно, и во веки веков. Аминь.
Тропарь, глас 4
Пришествием честныя Твоея иконы, Богоотроковице, обрадованный днесь Богохранимый град Кострома, якоже древний Израиль к кивоту Завета, притекает ко изображению лица Твоего и воплотившагося от Тебе Бога нашего, да Твоим Матерним к Нему предстательством присно ходатайствуеши всем, под сень крова Твоего прибегающим, мир и велию милость.
Кондак, глас 8
Благодарственная приносяще Ти, раби Твои, Богородительнице, о всех, имиже благодеяла еси граду нашему, из глубины души взываем к Тебе, и мили ся деем*, не престани, Владычице, Матерними к Сыну Твоему и Богу нашему молитвами подавати вся благая и спасительная всем, верою и любовию вопиющим Ти: радуйся, Дево, христиан похвало.
* мили ся дею (милися дею, мился дею) — умиленно молюся, препоручаю себя в милость, в заступление.
Величание
Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем, с верою притекающим.

Молитва
ко Пресвятой Богородице
пред Ее иконою «Холмская»

О Пресвятая Дево Мати Христа Бога нашего, всемощная заступнице страны нашея! Со страхом, верою и любовию припадающе к чудотворному образу Твоему, молитвенно взываем: буди милосерда к нам, смиренным и недостойным рабом Твоим, и грехов и беззаконий наших, Благая, не помяни, но простри руце Твои ко благосердию Владыки, да не отвратит лица Своего от рабов Своих и не осудит нас грешных по беззаконием нашим, но сотворит с нами по велицей Своей милости. Ей, Госпоже Владычице! Буди путеводительница в житии нашем: светом истины умы наша просвети, сердца умягчи, веру укрепи, надежду утверди, дара любве сподоби. Умилосердися, Всемилостивая Госпоже наша, на немощныя люди Твоя: заблуждшия на путь правды настави, колебимыя в вере вразуми, отпадшия от благочестивыя веры отеческия возврати и вся истинному пути научи. Спаси милостию Твоею и помилуй благоверныя люди Твоя, епископство православное и весь чин церковный. Не отрини такожде милосердием Твоим и приими под кров Твой и вся правители страны нашея, вразуми и настави их право правити, законы божественныя соблюдающе. Нас же в мире и любви друг ко другу утверди, да вси, в единении друг со другом пребывающе, тихое и безмятежное житие поживем и, дарми благ земных насладившеся, благ небесных милосердия ради Божественнаго не лишимся. Еще молимся Тебе, Владычице Богородице, избави нас от глада, губительства, труса, потопа, огня, меча, нападения вражия, междоусобныя брани, наглыя смерти, тлетворных болезней и всяких ны зол окружающих. Вонми и услыши, всемилостивая Госпоже, всех нас, ныне к иконе Твоей святей припадающих и со слезами к милосердию Твоему взывающих, утоли наша печали и буди нам скорая Помощница во всех делех наших во веки веков. Аминь.
Тропарь, глас 5
Яко Материнское благословение, даровала еси, Пречистая Дево, пречудную икону Твою прославленным отцем нашим на гору Холмскую, тако и ныне, презирающе множество грехопадений наших, не остави нас, о Всепетая Мати, но пребуди с нами до скончания века и отверзи нам райския двери.
Кондак, глас 6
Пресвятей Деве Богородице, дивными иконами Своими, яко звездами, Церковь Православную украсившей и православным людем земли Холмския пречудный образ сей даровавшей, благодарственное воспеваем пение; Ты же, Пречистая, укрепи нас в Православней вере, да зовем Ти: радуйся, Царице небесе и земли и любящая Мати всех с верою чтущих Тя.
Величание
Величаем Тя, Пресвятая Дево, и почитаем честную икону Твою, юже от лет древних во граде Холме прославила еси.

Молитва
ко Пресвятой Богородице
пред Ее иконою «Цареградская»

К Тебе, Пресвятей Госпоже Богородице, недостойнии раби Твои прибегаем: Ты бо, Преблагая, едина незлобивая и велемощная к Сыну Твоему, Христу Богу нашему, за ны, грешныя, Ходатаица и Непостыдная Предстательница. Веси, яко зело преогорчихом благость Его преступлением Божественных Его заповедей. Несть бо греха, егоже мы, непотребнии, не сотворихом, всяк страх отвергши, того ради и Духа благодати и дара преестественнаго сыноположения отвергохомся и всякаго отвращения и казни достойни сотворихомся. Веси, Преблагая Заступнице, яко и Твоя милости и дарования мы, безумнии, забвению предахом и Твоего милосердия недостойни содеяхомся. Колико бо Тя, Госпоже Богородительнице, на умоление Сына Твоего и Бога нашего подвизахом, обещавше Ти, Пречистая, от злых исправление, толико Твое матернее к Нему за ны, грешныя, предстательство и заступление нивочтоже вменихом, неблагодарни и злонравни суще. Ныне стыд носяще и ниже достойни воззрети на пречистый образ Твой, пред нимже предстахом. Но, о свете душ наших, светлое зерцало благости Божия! И мы вемы, колико может Твое матернее ко Христу Богу нашему дерзновение, вемы, яко никтоже, прибегаяй к Тебе, Благосердая, с покаянием и умилением, посрамлен от Тебе бысть, или призываяй Тебе, Пречистая, не услышан от Тебе изыде: чтит бо Сын Твой Тя, Богоневесто, яко Матерь Свою, милостивно приемля моления Твоя. Сего ради и ужасаемся воззрети к Свету Твоея страшныя и Богоподобныя славы, осквернены имуще очи душевныя, обаче колена душ и телес наших преклоняюще, молим Тя, Боголепная Марие, яко Матерь и Царицу нашу: умилосердися на ны, непотребныя рабы Твоя, и, имиже веси судьбами, взыщи ны, погибшия, просвети наш ум светом Твоего Боговедения, да, им озарени суще, всякое злое помышление и всяк безстудных деяний образ до конца отсечем, всем же сердцем заповеди Господни возлюбим и в них непорочно ходити начнем. Еретическая возстания прекрати, разсеянныя же собери, заблуждшия возврати во едино стадо Сына Твоего, Христа Бога нашего, старость поддержи, юныя вразуми, вдовиц и сирот защити, болящия исцели, страну же нашу миром огради и во веки незыблему соблюди, всем же нам преспеяние в вере и делех благих в долготу дней даруй. Прежде отшедшия отцы и братию нашу во светлостех райских и селениих праведных упокой, с ними и нас всех в покаянии и исповедании приими и сопричти, да и мы, Преблагая наша Заступнице, Богомати и Владычице, спасени суще Твоим ходатайством, восхваляя Тя, прославим со всеми святыми пречестное и пресвятое Имя Отца и Сына и Святаго Духа, Единаго в Троице славимаго Бога, ныне, и присно, и во веки. Аминь.
Тропарь, глас 1
Возсия нам, яко солнце светозарное от востока в велелепии, Твоя, Владычице, икона, озаряющи чудес сиянием преславно всех, приходящих к ней с верою и любовию и молящихся усердно к Твоему, еже о Сыне Твоем и Бозе, величию. Слава Богу, Евфросином сию давшему нам! Слава Приведшему ю от Царьграда! Слава Дающему тою всем исцеления.
Кондак, глас 8
Препрославленная Вышняго Матерь созывает к песнопению нас Своего образа пришествием от Царьграда и возбуждает зрением того на подвиг, побеждати сопротивных силу, и к Ней, яко нашея радости виновней, пети: радуйся, Невесто Неневестная.
Величание
Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем, с верою притекающим.

Молитва
ко Пресвятой Богородице
пред Ее иконою «Целительница»

О Пресвятая Госпоже Царице Богородице, Вышшая всех небесных сил и Святейшая всех святых. Припадаем и покланяемся Тебе пред всечестным и цельбоносным образом Твоим, воспоминающе дивное явление Твое болящему клирику Викентию и усердно молим Тя, Всесильную рода нашего Заступницу и Помощницу, якоже древле подала исцеление тому клирику, тако и ныне исцели наша души и телеса, болезнующия ранами грехов и страстей многоразличных, избави нас от всяких напастей, бед, скорбей и вечнаго осуждения. Сохрани от душепагубных учений и безверия, от льстивых и наглых нападений невидимых врагов. Подаждь нам христианскую кончину безболезненну, мирну, непостыдну, Свытых Таин причастну. Сподоби нас на нелицеприятном судищи Христове стати одесную Всеправеднаго Судии и Блаженный глас Его услышати: приидите благословеннии Отца Моего, наследуйте уготованное вам Царствие от сложения мира. Аминь.
Тропарь, глас 4
Яко Пресветлая Звездо, просия Божественными чудесы святый Твой образ, Целительнице, подаждь убо и нам, Богородице Марие, исцеление недугов душевных и телесных, спасение и велию милость.
Кондак, глас 6
Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти: ускори на молитву, и потщися на умоление, предстательствующи присно, Богородице, чтущих Тя.
Величание
Величаем Тя, Пресвятая Дево, Мати Христа Бога нашего, и чтим образ Твой святый, от негоже источаеши исцеления всем, с верою к Тебе притекающим.

Молитва
ко Пресвятой Богородице
пред Ее иконою Ченстоховская,
чтомая в Кирилло-Мефодиевской церкви града Ченстохова

О Всемилостивая Госпоже, Царице Богородице, от всех родов избранная и всеми роды небесными и земными ублажаемая! Воззри милостивно на предстоящия пред святою иконою Твоею люди сия, усердно молящияся Тебе, и сотвори предстательством Твоим и заступлением у Сына Твоего и Бога нашего, да никтоже изыдет отсюду тощь упования своего и посрамлен в надежде своей, но да приимет кийждо от Тебе вся по благому изволению сердца своего и по нужде и потребе своей, во спасение души и во здравие телу. Моли, Милосердая Владычице, Пренебеснаго Бога, да присно соблюдет Церковь Свою святую во Православии и твердей вере до конца веков. Призирай благосердием, Всепетая, и призрением милостиваго Твоего заступления на все Царство Всероссийское, царствующия грады наша и град сей и святый храм сей, и на сия богатыя Твоя милости неоскудно изливай, Ты бо еси всесильная Помощница и Заступница всех нас. Приклонися к молитвам раб Твоих и прошением их, услыши воздыхания и молитвы, имиже раби Твои молятся на святем месте сем. Аще и иноверный или иноплеменный, зде проходя, помолится, услыши и милостивно соделай, яже к помощи ему и ко спасению. О Всепетая Мати, Надеждо наша Преблагая! Собери разсеянныя, неверныя же и иноверныя во странах наших на путь истинный настави, отпадшия от благочестивыя веры паки возврати и Святей Православней Кафоличестей Церкви их сопричти: в домех наших мир утверди, старость поддержи, юныя настави, младенцы воспитай, сирыя и вдовицы заступи, плененныя свободи, болящия уврачуй, на суде и в заключениих и в заточениих и в горьких работах сущия помяни, ограждающи ны присно от всякаго зла благочестию Твоею, и утеши милостивным Твоим посещением и вся благодеющия нам. Даруй же, Благая, земли плодоносие, воздуху благорастворение и вся, яже на пользу нашу, дары благовременныя и благопотребныя молитвами избранных угодников святых Кирилла и Мефодиа, в ихже храме и предстоим вси. Прежде отшедшия отцы и матери, братию и сестры наша упокой в селениих святых, на месте злачне, на месте покойне, идеже несть печаль и воздыхание. Егда же приспеет и наше от жития сего отшествие и к вечней жизни преселение, предстани нам, Преблагословенная Дево, и даруй христианскую кончину жития нашего безболезненну, непостыдну и святых Таин причастну, да и в будущем веце сподобимся вси, купно со всеми святыми, безконечныя блаженныя жизни во Царствии возлюбленнаго Сына Твоего, Господа и Спаса нашего Иисуса Христа, Емуже подобает всякая слава, честь и поклонение, со Безначальным Отцем и Святым Духом, во веки веков. Аминь.
Тропарь, глас 4
Непобедимая Победо, Владычице Ченстоховская, древняго иже о нас благоволения Самозрительнице, будущаго спасения Хранительнице, покаянием соделай ны новыя грядущему Царю.
Кондак, глас 4
из акафиста
Хотяще оставити икону Свою, о Богомати, во граде Ченстохове, соделала еси возок с иконою недвижимым, егда нецыи злочестивии тщахуся исхитити ю, христиане же, обретше образ Твой сохраненный Тобою, возопиша Богу: Аллилуиа.
Величание
Величаем Тя, Пресвятая Дево, и чтим образ Твой святый, имже болезни наша врачуеши и души к Богу возводиши.

Молитва
ко Пресвятой Богородице
пред Ее иконою «Черниговская-Гефсиманская»

О Пресвятая Дево, Мати Христа Бога нашего, Царице Небесе и земли! Вонми многоболезненному воздыханию душ наших, призри с высоты святыя Твоея на нас, с верою и любовию покланяющихся пречистому образу Твоему: се бо, грехми погружаеми и скорбми обуреваеми, взирающе на Твой образ, яко живущей Ти с нами, приносим смиренная моления наша, не имамы бо иныя помощи, ни инаго предстательства и утешения, токмо Тебе, о Мати всех скорбящих и обремененных. Помози нам, немощным, утоли скорбь нашу, настави на путь правый нас, заблуждших, уврачуй болезненная сердца наша и спаси безнадежныя. Даруй нам прочее время живота нашего в мире и покаянии проводити, подаждь христианскую кончину и на Страшнем Суде Сына Твоего явися нам милосердая Предстательница, да всегда поем, величаем и славим Тя, яко Благую Заступницу рода христианскаго, со всеми угодившими Богу. Аминь.
Тропарь, глас 5
Пречистая Владычице Богородице, упование всех христиан, понеже инаго упования не имамы, разве Тебе, Всенепорочная Владычице моя, Госпоже Богородице, Мати Христа Бога моего, темже помилуй, и избави мя от всех зол моих, и умоли милостиваго Сына Своего и Бога моего, да помилует окаянную душу мою и да избавит мя от вечныя муки и сподобит мя Царствия Своего.
Величание
Величаем Тя, Пресвятая Дево, Мати Христа Бога нашего, и чтим образ Твой святый, от негоже источаеши исцеления всем, с верою к Тебе притекающим.

Молитва
ко Пресвятой Богородице
пред Ее иконою «Черниговская-Ильинская»

О Пресвятая Госпоже, Владычице моя Богородице, Небесная Царице, спаси и помилуй мя, грешнаго раба Твоего, от напрасныя клеветы, от всякия беды и напасти и внезапныя смерти. Помилуй мя в дневных часех, и утренних, и вечерних, и во всякое время сохрани мя: стояща, седяща соблюди, и на всяком пути ходяща, и в нощных часех спяща снабди, покрый и заступи. Защити мя, Владычице Богородице, от всех враг моих, видимых и невидимых, и от всякаго злаго обстояния. На всяком месте и на всякое время буди ми, Мати Преблагая, необоримая стена и крепкое заступление. О, Пресвятая Госпоже Владычице Дево Богородице, приими недостойную молитву мою и сохрани мя от напрасныя смерти, и даруй ми прежде конца покаяние. Пресвятая Богородице, спаси нас. Ты мне хранительница жизни всей явися, Пречистая! Ты мене избави от бесов в час смерти! Ты и по смерти упокой! Под Твою милость прибегаем, Богородице Дево, молений наших не презри в скорбех, но от бед избави нас, едина чистая и благословенная. Пресвятая Богородице, спаси нас. Аминь.
Тропарь, глас 5
Пречистая Владычице Богородице, упование всех христиан, понеже инаго упования не имамы разве Тебе, Всенепорочная Владычице моя, Госпоже Богородице, Мати Христа Бога моего. Темже помилуй и избави мя от всех зол моих и умоли Милостиваго Сына Своего и Бога моего, да помилует окаянную душу мою, и да избавит мя от вечныя муки, и сподобит мя Царствия Своего.
Величание
Величаем Тя, Пресвятая Дево, Мати Христа Бога нашего, и чтим образ Твой святый, от негоже источаеши исцеления всем, с верою к Тебе притекающим.

Молитва
ко Пресвятой Богородице
пред Ее иконою Чирская (Псковская)

О Пресвятая Госпоже Владычице Богородице! Приими недостойную молитву нашу, и сохрани нас от навета злых человек и от внезапныя смерти, и даруй нам прежде конца покаяние. На моление наше умилосердися, и радость вместо печали даруй. И избави нас, Госпоже, от всякия беды и напасти, скорби и болезни и всякаго зла. И сподоби ны, грешныя рабы Твоя, одесную стати во втором пришествии Сына Твоего, Христа Бога нашего, и наследники быти Царствия Небеснаго и жизни вечныя со всеми святыми в бесконечныя веки веков. Аминь.
Тропарь, глас 4
Яко необоримую стену и источник чудес, стяжавше Тя, раби Твои, Богородице Пречистая, сопротивных ополчения низлагаем. Темже молим Тя: мир граду Твоему даруй и душам нашим велию милость.
Кондак, глас тойже
Честнаго образа Твоего знамение празднующе, людие Твои, Богородительнице, имже дивную победу на сопротивныя граду Твоему даровала еси, темже Тебе верою взываем: радуйся, Дево, христиан похвало.
Величание
Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем, с верою притекающим.

Молитва
ко Пресвятой Богородице
пред Ее иконою Шестоковская,
чтомая в Шестоковском монастыре, Тверской епархии

К кому возопию Владычице? К кому прибегну в горести моей, аще не к Тебе, Царице Небесная? Кто плачь мой и воздыхание мое приимет, аще не Ты, Пренепорочная, Надеждо христиан и прибежище нам грешным? Кто паче Тебе в напастех защитит? Услыши убо стенание мое, и приклони ухо Твое ко мне, Владычице Мати Бога моего, и не презри мене требующаго Твоея помощи, и не отрини мене грешнаго. Вразуми и научи мя, Царице Небесная, не отступи от мене раба Твоего, Владычице, за роптание мое, но буди мне Мати и Заступница. Вручаю себе милостивому покрову Твоему: приведи мя грешнаго к тихой и безмятежней жизни, да плачуся о гресех моих. К кому бо прибегну повинный аз, аще не к Тебе, упованию и прибежищу грешных, надеждою на неизреченную милость Твою и щедроты Твоя окриляемь? О Владычице Царице Небесная! Ты мне упование и прибежище, покров и заступление и помощь. Царице моя преблагая и скорая заступнице! Покрый Твоим ходатайством моя прегрешения, защити мене от враг видимых и невидимых, умягчи сердца злых человек, возстающих на мя. О Мати Господа моего Творца! Ты еси корень девства и неувядаемый цвет чистоты. О Богородительнице! Ты подаждь ми помощь немощствующему плотскими страстьми и болезнующему сердцем, едино бо Твое и с Тобою Твоего Сына и Бога нашего имам заступление, и Твоим пречудным заступлением да избавлюся от всякия беды и напасти, о Пренепорочная и Преславная Божия Мати Марие. Темже со упованием глаголю и вопию: радуйся, Благодатная; радуйся, Обрадованная; радуйся, Преблагословенная; Господь с Тобою. Аминь.
Величание
Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем, с верою притекающим.

Молитва
ко Пресвятой Богородице
пред Ее иконою «Шуйская-Смоленская»

К кому возопию, Владычице? К кому прибегну в горести моей, аще не к Тебе, Царице Небесная? Кто плач мой услышит и воздыхание приимет, аще не Ты, Пренепорочная, Надеждо христиан и Прибежище нам, грешным? Кто паче Тебе в несчастиих защитит? Услыши стенание мое и приклони ухо Твое ко мне, Владычице и Мати Бога моего. Не презри ищущаго Твоея помощи и не отрини мене грешнаго, Царице Небесная! Научи мене исполняти волю Сына Твоего и даруй желание всегда следовати Его святым заповедем. За мой ропот в болезнях, трудах и несчастиях не отступи от мене, но буди Материю и Покровительницею мене малодушнаго, Царице моя Преблагая, Заступнице Усердная! Твоим ходатайством прегрешения моя покрый, от видимых и невидимых врагов защити, сердца враждующих против мене смягчи и Христовою любовию согрей их. Мне же немощному даруй Твою всесильную помощь победити моя греховныя привычки, дабы, очищенный покаянием и последующею добродетельною жизнию, в общении со Святою Церковью провел остальныя дни земнаго странствия. Предстани мне, Надеждо всех христиан, в час кончины моея и подкрепи мою веру в смертный тяжкий час. Вознеси за мене, многопрегрешающаго в жизни сей, Твоя всесильныя молитвы по отшествии моем, да оправдает мене Господь и соделает причастником Его бесконечных радостей. Аминь.
Тропарь, глас 4
Яко многоценное сокровище прият град Шуя чудесно написанную икону Твою, Пресвятая Владычице, Дево Богородице, во исцеление лютыя язвы и во утешение православных Тобою дарованную, от неяже источники благодатныя и до ныне обильно изливаются. Пробави, Пречистая, и на будущее время милости Твоя ведущим Тя, храни град Твой и всю Русскую землю и спасай людей, к Тебе с верою и любовию притекающих.
Кондак, глас 3
Мати Божия Пресвятая, стено христианом, града нашего Шуи покров и заступление! Молитвы раб Твоих, ко иконе Твоей припадающих, приими, во исповедании Православныя веры укрепи, от всякия напасти и беды избави, скорби земныя на радость преложи и Сына Твоего моли граду и людем Твоим в мире спастися.
Величание
Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем, с верою притекающим.

Молитва
ко Пресвятой Богородице
пред Ее иконою «Экономисса» (Домостроительница)

О Пречистая Владычице Богородице, Всечестная наша Мати Игумение всех православных обителей иноческаго жития, во святей горе Афонстей и по всей вселенней сущих! Приими смиренныя моления наша и принеси я ко Всещедрому Богу нашему, да спасет души наша Своею благодатию. Воззри на ны милосердным Твоим оком и соверши Сама о Господе наше спасение, понеже без милости Спаса нашего и Твоего святаго о нас ходатайства, мы, окаянныя, не возможем совершити свое спасение, яко окаляхом житие наше в суетах мирских, ибо время приближается жатвы Христовой и день страшнаго суда приспе. Мы же, окаянныя, погибаем в бездне греховней, нерадения ради нашего, по реченному от святых отцев, первоначальников ангельского по плоти жития: яко последнии монаси нерадением жития своего уподобятся мирским людем, еже и сбыстся днесь, ибо иночество наше плавает житием своим на море житейстем среди великия бури и непогоды: ибо наши святыя обители в прахе пребывают грехов ради наших, Всеправедный Господь наш Иисус Христос тако благоволи, мы же, недостойнии, не имеем где главы подклонити.
О сладчайшая наша Мати Игумение! Собери ны, разсеянное стадо Христово, во едино и спаси всех православных христиан, сподоби райския жизни со Ангелы и всеми святыми во Царствии Христа Бога нашего, Емуже честь и слава со Безначальным Его Отцем и со Пресвятым и Благим и Животворящим Духом во веки веков. Аминь.
Тропарь, глас 4
Предстательство страшное и непостыдное, не презри, Благая, молитв наших, Всепетая Богородице, Милостивая верных Домостроительнице, утверди православных жительство, спаси страну нашу и всех православно живущих в ней защити, зане родила еси Бога, Едина Благословенная.
Величание
Величаем Тя, Пресвятая Дево, и чтим образ Твой святый, имже болезни наша врачуеши и души наша к Богу возводиши.

Молитва
ко Пресвятой Богородице
пред Ее иконою Югская

К Тебе, Пречистей Божией Матери, аз окаянный припадая молюся: веси, Царице, яко непрестанно согрешаю и прогневляю Сына Твоего и Бога моего. И аще многажды каюся, ложь пред Богом обретаюся: каюся трепеща, да не како поразит мя Господь, и по часе мале паки таяжде творю. Ведущи сия, Владычице моя, Госпоже Богородице, молю, да помилуеши, да укрепиши мя, и благая творити да подаси ми. Ты веси, о Владычице моя Богородице, яко имам в совершенней ненависти злая моя дела и всею мыслию люблю закон Бога моего. Но не вем, Госпоже Пречистая, откуду яже ненавижду, тая творю, а благая преступаю. Не попущай убо, Пречистая, воли моей совершатися, неугодна бо есть, но да будет во мне воля Сына Твоего и Бога моего, да мя спасет, и вразумит, и подаст ми благодать Святаго Духа, да бых аз отселе престал сквернодействуя и прочее пожил бых в повелениих Сына Твоего, Господа нашего Иисуса Христа, Емуже подобает всякая слава, честь и поклонение, со Безначальным Его Отцем, и Пресвятым и Благим и Животворящим Его Духом, ныне и присно и во веки веков. Аминь.
Тропарь, глас 6
Днесь, яко солнце пресветлое, возсия нам на воздусе Всечестная икона Твоя, Владычице, лучами милости мир просвещающи, юже великая Россия, яко некий дар Божественный, свыше благоговейне восприемши, прославляет Тя, Богомати, всех Владычицу, и от Тебе рождшагося Христа Бога нашего величает радостно. Емуже молися, о Госпоже Царице Богородице, да сохранит вся грады и страны христианския невредимы от всех навет вражиих и спасет верою покланяющихся Его Божественному и Твоему Пречистому образу, Дево Неискусобрачная.
Кондак, глас 8
Притецем, людие, к Деве и Богородице Царице, благодаряще Христа Бога нашего, и, к Тоя чудотворней иконе умильно взирающе, припадем и возопием Ей: о Владычице Марие, присетивши страну сию Твоего честнаго образа явлением чудесно, спасай в мире и благовременстве страну нашу, и вся христианы, наследники показующи Небесныя жизни, Тебе бо, верно зовем: радуйся, Дево, миру спасение.
Величание
Величаем Тя, Пресвятая Дево, Мати Христа Бога нашего, и чтим образ Твой святый, от негоже источаеши исцеления всем, с верою к Тебе притекающим.

Молитва
ко Пресвятой Богородице
пред Ее иконою Ярославская

О Пресвятая Дево, Мати Господа вышних сил, Небесе и земли Царице и града нашего Ярославля всемощная Заступнице! Приими хвалебное пение сие от нас недостойных раб Твоих, и вознеси молитвы наша ко престолу Бога Сына Твоего, да милостив будет неправдам нашим и пробавит благость Свою чтущим Всечестное имя Твое и с верою и любовию покланяющимся чудотворному образу Твоему. Несмы бо достойни от Него помиловани быти, аще не Ты умилостивиши Его о нас, Владычице, яко вся Тебе от Него возможна суть. Сего ради к Тебе прибегаем, яко к несомненней и скорей Заступнице нашей, и Тебе, яко всемогущей Помощнице, сами себе и друг друга и всю жизнь нашу по Христе Бозе предаем, ныне и присно и во веки веков. Аминь.
Величание
Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем, с верою притекающим.

Молитва
ко Пресвятой Богородице
пред Ее иконою Яхромская

Пресвятая Владычице моя Богородице, святыми Твоими и всесильными мольбами отжени от мене, смиреннаго и окаяннаго раба Твоего, уныние, забвение, неразумие, нерадение, и вся скверная, лукавая и хульная помышления от окаяннаго моего сердца и от помраченнаго ума моего; и погаси пламень страстей моих, яко нищ есмь и окаянен. И избави мя от многих и лютых воспоминаний и предприятий, от всех действ злых свободи мя. Яко благословенна еси от всех родов, и славится пречестное имя Твое во веки веков. Аминь.
Величание
Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем, с верою притекающим.