145 МОЛИТВ К ПРЕСВЯТОЙ БОГОРОДИЦЕ ПЕРЕД ЕЕ ЧУДОТВОРНЫМИ ИКОНАМИ

Молитва
ко Пресвятой Богородице
пред Ее иконою «Плач Богоматери»,
чтомая в церкви села Горностаева, Московской епархии

О Пресвятая Госпоже Богородице, нашего спасения Надеждо! Воззри милостивно на люди Твоя, с верою и любовию предстоящия и пречистому образу Твоему покланяющияся. Приими наше хвалебное пение сие и пролей теплую Твою молитву о нас грешных ко Господу, да презрев вся наша согрешения, спасет и помилует нас. Еще же молим Тя умиленно: избави нас от всякия скорби и смертоносныя язвы, подай нам Твою милостивую помощь, не отрини наших слез и воздыханий, не забуди нас во вся дни жизни нашея, но всегда пребывай с нами, и Твоим заступлением и ходатайством у Господа подаждь нам отраду, утешение, защиту и помощь, да славим и величаем Преблагословенное и Всепетое имя Твое во веки веков. Аминь.
Величание
Величаем Тя, Пресвятая Дево, и чтим образ Твой святый, имже болезни наша врачуеши и души наша к Богу возводиши.

Молитва
ко Пресвятой Богородице
пред Ее иконою «Подательница ума», или «Прибавление ума»

Богородице Пречистая, Доме, Егоже созда Себе Премудрость Божия, даров духовных Подательнице, от мира к премирным ум наш возводящая и всех к познанию разума приводящая! Приими молебное пение от нас, недостойных раб Твоих, с верою и умилением покланяющихся пред пречистым образом Твоим. Умоли Сына Твоего и Бога нашего, да дарует властем нашим мудрость и силу, судиям правду и нелицеприятие, пастырем мудрость духовную, ревность и бдение о душах наших, наставником смиренномудрие, чадом послушание, всем же нам дух разума и благочестия, дух смирения и кротости, дух чистоты и правды. И ныне, Всепетая наша Мати, подай нам ума прибавление, умири, соедини во вражде и разделении сущия и положи им союз любве нерушимый, всех заблуждших от неразумия к свету истины Христовы обрати, страху Божию, воздержанию и трудолюбию настави, слово премудрости и душеполезное знание просящим даруй, осени нас вечною радостию, Херувимов честнейши и Серафимов славнейши сущая. Мы же, дивная дела и многоразумную Премудрость Божию в мире и жизни нашей видяще, устранимся земныя суеты и излишних житейских попечений, и ум, сердце наше на небеса возведем, яко да Твоим заступлением и помощию славу, хвалу, благодарение за вся в Троице славимому Богу и всех Создателю возсылаем, ныне и присно и во веки веков. Аминь.
Тропарь, глас 3
Волею Отца Небеснаго зачала Сына Божия, без семене земнаго отца, прежде творения мира от Отца без матери рожденнаго плотию родила еси, и Егоже моли о даровании нам ума ко спасению душ наших.
Кондак, глас 6
Рожденнаго Духом от Отца Небеснаго, прежде сотворения денницы, Тобою плотию Рожденнаго без отца, не нарушив девства, Того умоли помочь нам победить завистию одержимаго падшаго денницу. Да одержим полную победу над диаволом, миром и плотию, Твоими молитвами, Богоневестная.
Величание
Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем, с верою притекающим.

Молитва
ко Пресвятой Богородице
пред Ее иконою Подольская,
яже во граде Житомире

О Всемилостиваго Бога Милосердая Мати, Преблагословенная Владычице, Приснодево Богородице! Услыши стенание и вопль наш и вонми гласу моления нашего. Простри нам Твоим всемогущим предстательством руку помощи, да не погибнем со безаконьми нашими, но в покаяние благовременне приидем. Веси бо нашу немощь и скорбь нашу, от страстей и бесов нам бываемую. Избави нас от нападений демонских и от наветов злых человек, Тобою бо демони попираются, и Тобою врази посрамляются. Исполни во благо прошения наша, Тебе приносимая, никто же бо, притекаяй к Тебе, посрамлен отходит. Умоли Сына Твоего и Бога, да милостив будет неправдам нашим и да не внидет в суд с рабы Своими, яко не оправдится пред Ним всяк живый. Вемы бо, яко много может Матернее моление Твое ко благосердию Владыки, и вся Тебе от Него возможна суть. Исцели язвы телес наших, грехми оскверненных, и очисти души наша, омраченныя страстьми. Направи ум наш на путь правый и утверди волю нашу ко исполнению дел благих и к соблюдению заповедей Сына Твоего, да милосердие Его не отступно будет от нас. Паче же, о Всеблагая Владычице, покрый, соблюди и спаси всех сирых и безпомощных, к чудотворному Твоему образу припадающих, и всех нас днесь осени всемощным Твоим покровом. Но и в прочее время жития нашего Твоея милости и многия благости нас не лиши, и буди нам присно упование непостыдное в земнем житии и по преставлении нашем, да вси немолчными усты и чистым сердцем, со безплотными ангельскими гласы и со всеми святыми, славим, хвалим, поем и величаем Тя ныне и присно и во веки веков. Аминь.
Величание
Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем, с верою притекающим.

Молитва
ко Пресвятой Богородице
пред Ее иконою «Покров Пресвятой Богородицы»

О Пресвятая Дево, Мати Господа вышних сил, Небесе и земли Царице, града и страны нашея Всемощная Заступнице! Приими хвалебно-благодарственное пение сие от нас, недостойных раб Твоих, и вознеси молитвы наша ко престолу Бога и Сына Твоего, да милостив будет неправдам нашим, и пробавит благодать Свою чтущим всечестное имя Твое и с верою и любовию покланяющимся чудотворному образу Твоему. Несмы бо достойни от Него помиловани быти, аще не Ты умилостивиши Его о нас, Владычице, яко вся Тебе от Него возможна суть. Сего ради к Тебе прибегаем, яко к несомненней и скорей Заступнице нашей: услыши нас, молящихся Тебе, осени нас вседержавным покровом Твоим, и испроси у Бога Сына Твоего: пастырем нашим ревность и бдение о душах, градоправителем мудрость и силу, судиям правду и нелицеприятие, наставником разум и смиренномудрие, супрогом любовь и согласие, чадом послушание, обидимым терпение, обидящим страх Божий, скорбящим благодушие, радующимся воздержание, всем же нам дух разума и благочестия, дух милосердия и кротости, дух чистоты и правды. Ей, Госпоже Пресвятая, умилосердися на немощныя люди Твоя: рассеянныя собери, заблуждшия на путь правый настави, старость поддержи, юныя уцеломудри, младенцы воспитай и призри на всех нас призрением милостиваго Твоего заступления, воздвигни нас из глубины греховныя и просвети сердечныя очи наша ко зрению спасения, милостива нам буди зде и тамо, в стране земнаго пришельствия и на страшнем суде Сына Твоего; преставльшияся же в вере и покаянии от жития сего отцы и братию нашу в вечней жизни со Ангелы и со всеми святыми жити сотвори. Ты бо еси, Госпоже, слава небесных и упование земных, Ты по Бозе наша Надежда и Заступница всех, притекающих к Тебе с верою. К Тебе убо молимся и Тебе, яко Всемогущей Помощнице, сами себе и друг друга и весь живот наш предаем, ныне и присно и во веки веков. Аминь.
Тропарь Покрову, глас 4
Днесь благовернии людие светло празднуем, осеняеми Твоим, Богомати, пришествием, и к Твоему взирающе пречистому образу, умильно глаголем: покрый нас честным Твоим Покровом и избави нас от всякаго зла, молящи Сына Твоего, Христа Бога нашего, спасти души наша.
Кондак, глас 3
Дева днесь предстоит в церкви и с лики святых невидимо за ны молится Богу, Ангели со архиереи покланяются, апостоли же со пророки ликовствуют: нас бо ради молит Богородица Предвечнаго Бога.
Величание
Величаем Тя, Пресвятая Дево, и чтим Покров Твой святый: Тя бо виде святый Андрей на воздусе, за ны Христу молящуюся.

Пред иконой Пресвятой Богородицы «Ризоположения» молятся о заступлении при нашествии врагов.

Тропарь, глас 8
Богородице Приснодево, человеков покрове, ризу и пояс пречистаго Твоего телесе, державное граду Твоему обложение даровала еси, безсеменным рождеством Твоим нетленна пребывающи, о Тебе бо и естество обновляется и время. Темже молим Тя мир граду Твоему даровати и душам нашим велию милость.
Кондак, глас 4
Одеяние всем верным нетления, Богоблагодатная Чистая, даровала еси, священную ризу Твою, еюже священное тело Твое покрывала еси, покрове всех человеков, еяже положение празднуем любовию и вопием со страхом Ти, Чистая: радуйся, Дево, христиан Похвало.
Величание
Величаем Тя, Пресвятая Дево, Богоизбранная Отроковице, и чтим святыя ризы Твоея честное положение.

Молитва
ко Пресвятой Богородице
пред Ее иконою Порт-Артурская «Торжество Пресвятой Богородицы»

О Пресвятая Госпоже Дево Богородице, превышшая Херувимов и Серафимов и святейшая всех святых! Припадая к святей иконе Твоей, смиренно молимся: вонми гласу моления нашего, виждь скорби, виждь беды наша, и яко любвеобильная Мати, потщися на помощь нам безпомощным, умоли Сына Твоего и Бога нашего: да не предаст земли нашея на поругание варваров, да не погубит нас за беззакония наша, но явит человеколюбно нам милость Свою. Испроси нам, Владычице, у благости Его телесное здравие и душевное спасение, мирное житие и земли плодоносие, воздуха благорастворение и благословение свыше на вся благая дела и начинания наша, и якоже древле милостивно явила нам икону Твою Порт-Артурскую, яко защитницу земли Дальнероссийския, но за неверие и неблагоговение к святыням церковным язычниками плененную, тако и ныне припадаем ко вновь обретенному Твоему образу и приносим наше усердное молитвословие.
О Царице Всепетая! Простри ко Господу богоноснеи руце Твои, имиже Богомладенца Иисуса Христа носила еси и умоли Его избавити нас от всякаго зла. Яви, Владычице, милость Твою нам: болящия исцели, скорбящия утеши, бедствующим помози и сподоби нас благочестно житие земное совершити, христианскую кончину получити и Царствие Небесное наследити Матерним Твоим ходатайством к Рождшемуся от Тебе Христу Богу нашему, Емуже со Безначальным Его Отцем и Пресвятым Духом подобает всякая слава, честь и поклонение, ныне и присно и во веки веков. Аминь.
Тропарь, глас 4
Днесь торжествует град Владивосток, и с ним сликовствуют вси пределы земли Дальнероссийския, сретая вновь обретенную икону Твою, Богомати, Порт-Артурскою нареченную, в благословение и знамение торжества христолюбивому воинству Дальней России дарованную, на ню же взирающе, вси зовем: Русь Святая, храни веру Православную, в ней же твое утверждение.
Кондак, глас 4
Избранней от всех родов Заступнице нашей и Царице, покровом Твоея благости покрывающей пределы земли Дальнероссийския, благодарственная пения приносим Ти раби Твои, Богородице. Ты же, яко Всемилостивая Владычице, от всяких нас бед спаси и вечных мук свободи.
Величание
Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем, с верою притекающим.

Молитва
ко Пресвятой Богородице
пред Ее иконою, именуемою «Похвала Богоматери»

К кому возопию, Владычице? К кому прибегну в горести моей, аще не к Тебе, Царице Небесная? Кто плачь мой и воздыхание мое приимет, аще не Ты, Пренепорочная, надеждо христиан и прибежище нам, грешным? Кто паче Тебе в несчастиих защитит? Услыши убо стенания мое, и приклони ухо Твое ко мне, Владычице Мати Бога моего, и не презри мене, требующаго Твоея помощи, и не отрини мене, грешнаго. Вразуми и научи мя, Царице Небесная; не отступи от мене, раба Твоего, Владычице, за роптание мое, но буди мне Мати и Покровитеница. Вручаю себе милостивуму покрову Твоему, аще токмо восхощеши устроити о мне. Приведи мя, грешнаго, к тихой и безмятежней жизни, да плачуся о грехсех моих. Увы мне, к кому прибегну повинный аз, токмо к Тебе, упованию и прибежищу грешных, в надежде на неизреченную милость Твою и щедроты? Кое ли слово за преступления моя изрещи возмогу к величеству славы Твоея? О Владычице Царице Небесная, Ты мне Мати и Надежда: Ты ми упование и прибежище, покров, заступление и помощь. Царице моя преблагая и пребыстрая заступнице, покрый Твоим ходатайством моя прегрешения, защити мене от враг видимых и невидимых, умягчи сердца злых человек, возстающих на мя. О Мати Господа моего Творца, Ты корень девства и неувядаемый цвет чистоты. О Богородительнице, Ты подаждь ми помощь немощствующему плотскими страстьми и болезнующему сердцем, едино бо Твое, и с Тобою Твоего Сына и Бога нашего, имам заступление, и Твоим пречудным заступлением да оправдан буду, и да избавлюся от всякия беды и напасти всесильными Твоими молитвами, Всечистая, и Непорочная, и Преславная Божия Матерь Марие. Темже со упованием глаголю и вопию: радуйся, Благодатная; радуйся, Обрадованная; радуйся, Преблагословенная, Господь с Тобою. Аминь.
Тропарь, глас 8
Повеленное тайно прием в разуме, в крове Иосифове, тщанием предста безплотный, глаголя Неискусобрачней: Приклонивый схождением Небеса вмещается неизменно весь в Тя, Егоже и видя в ложеснах Твоих, приемша рабий зрак, ужасаюся звати Тебе: радуйся, Невесто Неневестная.
Кондак, глас тойже
Взбранной Воеводе победительная, яко избавльшеся от злых, благодарственная восписуем Ти, раби Твои, Богородице, но яко имущая державу непобедимую, от всяких нас бед свободи, да зовем Ти: радуйся, Невесто Неневестная.
Величание
Величаем Тя, Пресвятая Дево, и чтим образ Твой святый, имже болезни наша врачуеши и души наша к Богу возводиши.

Молитва
ко Пресвятой Богородице
пред Ее иконою Почаевская

К Тебе, о Богомати, молитвенно притекаем мы, грешнии, чудеса Твоя, во святей лавре Почаевстей явленная, поминающе и о своих сокрушающеся прегрешениих. Вемы, Владычице, вемы, яко не подобаше нам, грешным, чесого просити, токмо о еже Праведному Судии беззакония наша оставити нам. Вся бо нами в житии претерпенная, скорби же, и нужды, и болезни, яко плоды падений наших прозябоша нам, Богу сия на исправление наше попущающу. Темже вся сия истиною и судом Своим наведе Господь на грешныя рабы Своя, иже в печалех своих к заступлению Твоему, Пречистая, притекоша и во умилении сердец к Тебе взывают сице: грехов и беззаконий наших, Благая, не помяни, но паче всечестнеи руце Твои воздвигши, к Сыну Твоему и Богу предстани, да люте содеянная нами отпустит нам, да за премногая неисполненная обещания наша лица Своего от рабов Своих не отвратит, да благодати Своея, спасению нашему пособствующия, от душ наших не отымет. Ей, Владычице, буди спасению нашему Ходатаица и, малодушия нашего не возгнушавшися, призри на стенания наша, яже в бедах и скорбех наших пред чудотворным Твоим образом возносим. Просвети умиленными помыслы умы наша, веру нашу укрепи, надежду утверди, любве сладчайший дар сподоби нас прияти. Сими убо, Пречистая, дарованьми, а не болезньми и скорбьми живот наш ко спасению да возводится, но, от уныния и отчаяния души наша ограждающи, избави нас, маломощных, от находящих на ны бед, и нужд, и клеветы человеческия, и болезней нестерпимых. Даруй мир и благоустроение жительству христианскому предстательством Твоим, Владычице, утверди Православную веру в стране нашей и во всем мире. Церковь Апостольскую и Соборную умалению не предаждь, уставы святых отец на веки непоколебимы сохрани и всех к Тебе притекающих от рова погибельнаго спаси. Еще же и ересию прельщенных братий наших или веру спасительную в греховных страстех погубивших паки ко истинней вере и покаянию приведи, да вкупе с нами, Твоему чудотворному образу покланяющеся, Твое предстательство исповедят. Сподоби убо нас, Пресвятая Госпоже Богородице, еще в животе сем победу истины Твоим заступлением узрети, сподоби нас благодатную радость прежде кончины нашея восприяти, якоже древле насельники Почаевския Твоим явлением победители и просветители агарян показала еси, да вси мы благодарным сердцем вкупе со Ангелы, и пророки, и апостолы, и со всеми святыми, Твое милосердие прославляюще, воздадим славу, честь и поклонение в Троице певаемому Богу Отцу, и Сыну, и Святому Духу, во веки веков. Аминь.
Тропарь, глас 5
Пред святою Твоею иконою, Владычице, молящиися исцелений сподобляются, веры истинныя познание приемлют и агарянская нашествия отражают. Темже и нам, к Тебе припадающим, грехов оставление испроси, помыслы благочестия сердца наша просвети и к Сыну Твоему молитву вознеси о спасении душ наших.
Кондак, глас 1
Источник исцеления и веры Православныя утверждение Почаевская Твоя икона, Богородице, явися, темже и нас, к ней притекающих, от бед и искушений свободи, лавру Твою невредиму сохрани, Православие во окрест стоящих странах утверди и грехи разреши молитвенник Твоих: елика бо хощеши, можеши.
Величание
Величаем Тя, Пресвятая Дево, и почитаем честную икону Твою, юже от лет древних на горе Почаевстей прославила еси.

Молитва
ко Пресвятой Богородице
пред Ее иконою «Прежде Рождества и по Рождестве Дева»,
чтомая в Николо- Пешношском монастыре, Московской епархии

О Пресвятая Госпоже Владычице Богородице! Вышши еси всех Ангел и Архангел и всея твари честнейши, помощница еси обидимых, ненадеющихся надеяние, убогих заступница, печальных утешение, алчущих кормительница, нагих одеяние, больных исцеление, грешных спасение, христиан всех поможение и заступление. О Всемилостивая Госпоже, Дево Богородице Владычице! Милостию Твоею спаси и помилуй страну нашу, преосвященныя митрополиты, архиепископы и епископы, и весь священнический и иноческий чин, военачальники, градоначальники и христолюбивое воинство, и доброхоты, и вся православныя христианы ризою Твоею честною защити, и умоли, Госпоже, из Тебе без семене воплотившагося Христа Бога нашего, да препояшет нас силою Своею свыше на невидимыя и видимыя враги наша. О Всемилостивая Госпоже Владычице Богородице! Воздвигни нас из глубины греховныя, и избави нас от глада, губительства, от труса и потопа, от огня и меча, от нахождения иноплеменных и междоусобныя брани, и от внезапныя смерти, и от нападения вражия, и от тлетворных ветр, и от смертоносныя язвы, и от всякаго зла. Подаждь, Госпоже, мир и здравие рабом Твоим, всем православным христианом, и просвети им ум и очи сердечныя еже ко спасению, и сподоби ны, грешныя рабы Твоя, Царствия Сына Твоего, Христа Бога нашего, яко Держава Его благословена и препрославлена, со Безначальным Его Отцем и с Пресвятым и Благим и Животворящим Его Духом, ныне и присно и во веки веков. Аминь.
Величание
Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем, с верою притекающим.

Молитва
ко Пресвятой Богородице
пред Ее иконою «Призри на смирение»

О Пресвятая Госпоже, Дево Богородице, вышшая Херувим и честнейшая Серафим, Богоизбранная Отроковице!
Призри с высоты небесной милостивным Твоим оком на нас, недостойных рабов Твоих, со умилением и слезами молящихся пред пречистым образом Твоим; не лиши нас Твоего заступления и покрова Державнаго в странствии сем земном, многоскорбном и многомятежном.
Спаси нас в погибели и скорби сущих, воздвигни из глубины греховныя, просвети ум наш, омраченный страстьми и уврачуй язвы душ и телес наших!
О Всещедрая Мати Человеколюбиваго Владыки! Удиви на нас пребогатыя милости Твоя, укрепи немощную волю нашу к деланию заповедей Христовых, умягчи окаменелая сердца наша любовию к Богу и ближним, даруй нам сокрушение сердечное и покаяние истинное, да очистившеся от скверны греховныя, сподобимся мирныя христианския кончины и добраго ответа на страшнем и нелицеприятнем суде Господа нашего Иисуса Христа, Емуже со Безначальным Его Отцем и Пресвятым, Благим и Животворящим Духом, подобает всякая слава, честь и поклонение, ныне и присно и во веки веков. Аминь.
Тропарь, глас 4
Необоримая стена образ Твой и источник чудес, якоже древле от него заступление Твое граду Пскову даровала еси, тако и ныне от всех бед и скорбей милостивно избави и спаси души наша, яко любвеобильная Мати.
Кондак, глас 3
Пренепорочная Дево, отображение Лика Твоего чтущия, благодарныя дары приемлеши, живым и мертвым помогаеши, град и страну нашу спасаеши, и пред Сына Твоего молитвы приносиши, и спасаеши всех нас.
Величание
Величаем Тя, Пресвятая Дево, и чтим образ Твой святый, имже болезни наша врачуеши и души наша к Богу возводиши.

Молитва
пред иконою Пресвятой Богородицы,
именуемою «Прозрение очес»,
чтомая в Московской Трехсвятительской, на Кулишках, церкви

О Пресвятая Госпоже Владычице Богородице! Приими недостойную молитву нашу, и сохрани всех нас, с верою и любовию покланяющихся пречистому образу Твоему, от навета злых человек и от внезапныя смерти, и даруй нам прежде конца покаяние. На моление наше умилосердися, и радость вместо печалей даруй нам. Се бо, на Твой образ взирающе, яко живущей Ти с нами, молим Тя усердно: избави нас, о Мати всех скорбящих и обремененных, от всякия беды и напасти, скорби, болезни и печали и от всякаго зла. И сподоби ны, недостойныя рабы Твоя, одесную стати Сына Твоего, Христа Бога нашего, во втором и славнем Его пришествии, и наследники быти Царствия Небеснаго и жизни вечныя со всеми святыми в безконечныя веки веков. Аминь.
Величание
Величаем Тя, Пресвятая Дево, и чтим образ Твой святый, имже болезни наша врачуеши и души наша к Богу возводиши.

Молитва
ко Пресвятой Богородице
пред Ее иконою Псково-Покровская

Царице моя преблагая, надеждо моя Богородице, прибежище сирых и странных предстательнице, скорбящих радосте, обидимых покровительнице! Зриши мою беду, зриши мою скорбь, помози ми яко немощну, направи мя яко странна. Обиду мою веси, разреши ту, яко же волиши: яко не имам иныя помощи разве Тебе, ни иныя предстательницы, ни благия утешительницы, токмо Тебе, о Богомати, яко да сохраниши мя и покрыеши во веки веков. Аминь.
Тропарь, глас 4
Днесь светло красуется Богоспасаемый град Псков и вся страна Российская пришествием Матери Бога Вышняго на избавление града сего от варварскаго пленения. Услыша плач и слезы раб Своих, скоро приклонися на мольбу к Сыну Своему и Богу нашему, и молением Своим гнев Божий укроти и весь мир просвети, и град сей от скорби на радость премени. О, дивному знамению, како Пресвятая Владычице прииде на воздусе в церковь Свою и на забрало града Пскова и призва угодников Своих, благоверных князей, и поноси в людех беззаконие, и Своею пречистою рукою указоваше на поганаго злаго варвара и его совет на разрушение. Возвеселися, Богоспасаемый граде Пскове и все Православие, имеюще такову Заступницу непобориму. Днесь притецем, вернии, в дом спасительный Владычицы Богородицы, светло празднуя, и ко святому Ея образу со слезами припадем, вопиюще и глаголюще: О Всемилостивая Госпоже Владычице Богородице, молися Сыну Своему Христу Богу нашему, спасти православныя люди и град сей избавити от огненнаго запаления и от нахождения поганых и междоусобныя брани, и спасти души наша, яко Милосердая.
Кондак, глас 8
Заступнице христиан, Предстательнице граду нашему Пскову, услыши молитву раб Своих, Владычице Богородице, и скорым Своим пришествием светолучными зарями раб Своих возвесели и торжествовати устрои, в беде и в сетовании возвесели, и завеща во граде молити Святую Троицу, и Сама обещася молити Ю. О, преславному чудесе, како Небесная Царице к земным прииде избавити рабы Своя погибающия. О, дивному знамению, како вразумляюще рабы Своя, како бы умолити Святую Троицу. О, Всемилостивая Владычице Богородице, аще не бы Ты предстояла, молящи за ны, кто бы нас избавил от толикия беды, яко не имамы иныя помощи и надежды разве Тебе, Владычице, Твои бо раби, да не погибнем, и потщися на умоление раб Своих присно, Богородице, чтущих Тя.
Величание
Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем, с верою притекающим.

Молитва
ко Пресвятой Богородице
пред Ее иконою Пюхтицкая «У источника»

О Пресвятая и Преблагословенная Мати Сладчайшаго Господа нашего Иисуса Христа! Припадаем и покланяемся Тебе пред светозарным образом Твоим и смиренно молим: прости, Всемилостивая, вся заблуждения наша и вся оскорбления, в ведении или в неведении Сыну Твоему и Спасителю нашему от юности обильно причиненная неисполнением заповедей Его святых, небрежением ко святыни, нерадением к молитве и нетерпением в несении креста нашего. Призри на жажду спасения и посильныя труды и пребуди с многогрешным, но оставшимся верным Сыну Твоему малым стадом Его по неложному слову Его, во святем Евангелии реченному: Не бойся, малое стадо, яко благоизволи Отец ваш дати вам царство.
О животворящий источниче нашего утешения! К Тебе возносим смиренное сие моление и просим Матернего Твоего о нас заступления пред престолом Отца нашего Небеснаго. Не лиши нас царства сего благодатнаго за премногия грехи наша, вемы бо, яко ничтоже внешнее и самолюбивое, гордое и тщеславное, ни славная достижения мирская, ни добродетели, с тайным самолюбованием совершаемыя, ни степени, ни чины, ни самое иноческое звание не возмогут возвести нас в Царствие Небесное, токмо сердце чистое и дух сокрушенный и смиренный, за многия молитвенныя труды Духом Святым даруемыя. Помози нам оставшияся дни жизни нашея в Духе и истине покланятися Сыну Твоему, Милосердая Богородице, и, стяжавше нелицемерную любовь к Богу и ближнему, исполнити сию первейшую заповедь Господню, единую приводящую в Царство Небесное. Аще и недостойни есмы, сподоби нас соделатися чадами Божиими по благодати и наследовати жизнь вечную со всеми, в покаянии Богу угодившими, и введи нас, Мати Божия, язвами Сына Твоего Иисуса Претихаго в небесный чертог Его, да вечно славим и воспеваем пречестное и великолепое имя Всесвятыя Троицы, Отца и Сына и Святаго Духа ныне и присно и во веки веков. Аминь.
Тропарь, глас 4
Утешение всех скорбящих, скорая Помощнице в туге сердечней к Тебе прибегающим, услыши нас, Владычице, и даждь нам на путь к жизни вечней душ и сердец от скверн очищение и, яко елень на источники водныя, к Царству Небесному неустанное стремление.
Кондак, глас 4
Пресвятая Богородице Дево, утоли жажду спасения страждущия души моея у Источника вод живых — Божественнаго Слова, Сына Твоего, Христа Бога нашего; призри на любящих и славящих Тя, Пречистая, и покрый нас покровом милосердия Твоего от всяких зол, тревог и бурь моря житейскаго.
Величание
Величаем Тя, Светозарная Дево, и почитаем осиявшее гору Пюхтицкую благодатное явление Твое.

Молитва
пред иконою Рождества Пресвятой Богородицы

О Пресвятая Богородице! Призри с благосердием на моления нас, грешных и смиренных рабов Твоих, и умоли Бога Сына Твоего, да низпослет нам и всем, притекающим к Тебе, здравие душевное и телесное и вся, яже к вечней и временней жизни потребная, да простит нам всякое согрешение вольное и невольное; да избавит нас от всяких скорбей и болезней, и напастей и всякаго злаго обстояния. Ей, Царице наша Преблагая, Надеждо наша несокрушимая и Заступнице необоримая! Не отврати лица Твоего от нас, за множество прегрешений наших; но простри нам руце Матерняго милосердия Твоего, и сотвори с нами знамение во благо. Яви нам богатую помощь Твою и благопоспеши во всяком деле благом; от всякаго же начинания греховнаго и промышления лукаваго отврати нас, да выну славим Пречестное имя Твое и покланяемся честному образу Твоему; и величаем Бога Отца, и Единороднаго Сына Его, Господа нашего Иисуса Христа и Святаго Духа, со всеми святыми, во веки веков. Аминь.
Тропарь празднику, глас 4
Рождество Твое, Богородице Дево, радость возвести всей вселенней: из Тебе бо возсия Солнце Правды, Христос Бог наш, и, разрушив клятву, даде благословение, и, упразднив смерть, дарова нам живот вечный.
Кондак, глас 4
Иоаким и Анна поношения безчадства, и Адам и Ева от тли смертныя свободистася, Пречистая, во святем рождестве Твоем. То празднуют и людие Твои, вины прегрешений избавльшеся, внегда звати Ти: неплоды раждает Богородицу и Питательницу Жизни нашея.
Величание
Величаем Тя, Пресвятая Дево, и чтим святых Твоих родителей, и всеславное славим рождество Твое.

Молитва
ко Пресвятой Богородице
пред Ее иконою Рождества-Глинская

О Пресвятая Владычице, Христа Спасителя нашего Богоизбранная Мати, у Бога святыми молитвами испрошенная, Богу посвященная и Богом возлюбленная! Кто Тебе не ублажит или кто не воспоет Твоего преславного рождества? Рождество бо Твое бысть началом спасения человеков, и мы, сидящие во тьме согрешений, зрим Тя, Неприступнаго Света жилище. Сего ради витийствующий язык не может песнословити Тя по достоянию, паче бо Серафим возвысилася еси, Пречистая. Обаче приими недостойных раб Твоих нынешнее похваление и не отрини мольбы наши. Твое величие исповедуем, Тебе во умилении припадаем и скорую в заступлении чадолюбивую и благосердую Матерь дерзновенно просим: умоли Сына Твоего и Бога нашего даровати нам, много согрешающим, искреннее покаяние и благочестное житие, да возможем творити вся Богу угодная и душам нашим полезная, возненавидим вся злая, укрепляемии Божественною благодатию во благом произволении нашем. Ты, непостыдная Надеждо наша, в час смерти, даруй нам христианскую кончину, безбедное шествие на страшных мытарствах воздушных и наследие вечных и неизреченных благ Царствия Небеснаго, да со всеми святыми немолчно исповедуем Твое о нас заступление и да славим единаго Истиннаго Бога, во Святей Троице покланяемаго, Отца и Сына и Святаго Духа. Аминь.
Тропарь, глас 4
Днесь благовернии людие, осеняемии святым Богоматери образом, во умилении глаголем: Владычице, помози рабом Твоим в напастех, скорбех и болезнех, обременены бо грехми многими, и избави ны от всякаго зла, молящи Сына Твоего, Христа Бога нашего, спасти души наша.
Кондак, глас 8
Аще и многажды икона Твоя, Богородице, уносима бысть с места явления, обаче чудесне в пустыню возвращашеся, отонудуже всем верным подает благо потребное.
Величание
Величаем Тя, Пресвятая Дево, и чтим образ Твой святый, имже болезни наша врачуеши и души наша к Богу возводиши.

Молитва
ко Пресвятой Богородице
пред Ее иконою Рудненская

Пресвятая Дево Владычице Богородице, милосте Христа моего, обителище Пресвятаго и Животворящаго Духа, надеждо всех святых раб, святое зерцало светлости Божия, святейшая Ангел и Архангел, Тебе припадая, усердно молюся: умоли Сына Своего и Бога моего, да отпустит ми всякое прегрешение, вольное и невольное, избавит мя от всех наветов диавольских. Ей, Владычице, моего падения возведение, простри богоноснеи Свои руце и извлецы мя из глубины греховныя и даждь ми, рабу Твоему (имя рек), всегда угодная Сыну Твоему и Богу моему творити, славя Его вкупе со Безначальным Его Отцем и с Пресвятым и Благим и Животворящим Его Духом, и ныне, и присно, и во веки веков. Аминь.
Тропарь, глас 4
К Богородице прилежно ныне притецем, грешнии и смиреннии, и припадем, в покаянии зовуще из глубины души: Владычице, помози, на ны милосердовавши, потщися, погибаем от множества прегрешений, не отврати Твоя рабы тщи: Тя бо и едину надежду имамы.
Кондак, глас 6
Не имамы иныя помощи, не имамы иныя надежды, разве Тебе, Владычице, Ты нам помози: на Тебе надеемся и Тобою хвалимся, Твои бо есмы раби, да не постыдимся.
Величание
Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем, с верою притекающим.

Молитва
ко Пресвятой Богородице
пред ее иконою, именуемой «Самонаписавшаяся»

О Пресвятая Госпоже Владычице Богородице! Приими недостойную молитву нашу, и сохрани нас от навета злых человек и от внезапныя смерти, и даруй нам прежде конца покаяние. На моление наше умилосердися, и радость вместо печали даруй. И избави нас, Госпоже, от всякия беды и напасти, скорби и болезни и всякаго зла. И сподоби ны, грешныя рабы Твоя, одесную стати во втором пришествии Сына Твоего, Христа Бога нашего, и наследники быти Царствия Небеснаго и жизни вечныя со всеми святыми в бесконечныя веки веков. Аминь.
Тропарь, глас 1
Чудотворней Твоей иконе, Богородице Дево, всеблагоговейно покланяемся и лобызаем ю, подаеши бо тою исцеления, здравие же и крепость душам и телесем воистину. Темже любовию Тебе взываем: слава промышлению Твоему о нас, Чистая, слава милосердию Твоему к верным, слава Тебе, самоизобразившейся, Всеблагая Владычице.
Кондак, глас 8
Богоматери воспоим божественне, припадающе Божественному образу Ея, преславно бо на том самонаписася, и источает чудес струи с верою притекающим, и избавляет от зол зовущих Ей: радуйся, Невесто Неневестная.
Величание
Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем, с верою притекающим.

Молитва
ко Пресвятой Богородице
пред Ее иконою «Свято-Крестовская»

О Пресвятая Дево, Мати Христа Бога нашего, Царице небесе и земли! Вонми многоболезненному воздыханию душ наших, призри с высоты святыя Твоея на нас, с верою и любовию покланяющимся пречистому и чудотворному образу Твоему. Се бо грехми погружаемии и скорбьми обуреваемии, взирающе на Твой образ, яко живей Тебе сущей с нами, приносим смиренная моления наша. Не имамы бо иныя помощи, ни инаго предстательства, ни утешения, токмо Тебе, о Мати всех скорбящих и обремененных. Помози нам немощным, утоли скорби наша, настави на путь правый нас заблуждающих, уврачуй болезненная сердца наша и спаси безнадежных, даруй нам прочее время жития нашего в мире и покаянии проводити, подаждь христианскую кончину, и на страшнем суде Сына Твоего явися нам милосердая Предстательница, да всегда поем, величаем и славим Тя, яко благую Заступницу рода христианскаго, со всеми угодившими Богу, во веки веков. Аминь.
Тропарь, глас 1
Чрез святую Твою икону, явленную нам на Кавказе Тобою, о Владычице, люди града Святаго Креста от страшнаго агарянскаго нападения чудесно свободила еси, Благая Вратарнице! Пленение, скорбь и узы в радость и свободу пременила еси, Скоропослушнице наша. Молим Тя, Матерь Божия, и на будущее время защищай всех нас, на Кавказе живущих чад Твоих, от нашествия агарянскаго, непрестанно молящеся у Креста Сына Твоего, Всенепорочная.
Кондак, глас 8
Якоже дивным видением многими стоящую Тя на воздусе у Креста Сына Твоего, Богородице, молящуюся о людех града Святаго Креста, в страшней беде сущих, агарянскаго пленения свободила еси, Благая Вратарнице, сице и на будущее время православных людей Кавказа защищай от нападающих на грады и веси наша, от недуга, неверия, глада и вражды избавляй, непрестанно молящеся о нас у Креста Сына Твоего, да зовем Ти: радуйся, Святокрестовская Божия Мати, всего Кавказа защито и ограждение.
Величание
Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем, с верою притекающим.

Молитва
ко Пресвятой Богородице
пред Ее иконою «Семистрельная»,
или «Умягчение злых сердец»

О Многоскорбная Мати Божия, превышшая всех дщерей земли по чистоте Своей и по множеству страданий, Тобою на земли пренесенных! Приими многоолезненныя воздыхания наша и сохрани нас под кровом Твоея милости, инаго бо прибежища и теплаго предстательства, разве Тебе, не вемы, но, яко дерзновение имущи ко Иже от Тебе Рожденному, помози и спаси ны молитвами Своими, да непреткновенно достигнем Царствия Небеснаго, идеже со всеми святыми будем воспевати хвалу в Троице Единому Богу, всегда, ныне, и присно, и во веки веков. Аминь.
Тропарь, глас 5
Умягчи наша злая сердца, Богородице, и напасти ненавидящих нас угаси, и всякую тесноту души нашея разреши, на Твой бо святый образ взирающе, Твоим страданием и милосердием о нас умиляемся и раны Твоя лобызаем, стрел же наших, Тя терзающих, ужасаемся. Не даждь нам, Мати Благосердная, в жестокосердии нашем и от жестокосердия ближних погибнути, Ты бо еси воистину злых сердец умягчение.
Кондак, глас 2
Благодатию Твоею, Владычице, умягчи сердца злодеев, низпосли благодетелей, соблюдающи их от всякаго зла, благомолящимся Ти усердно пред честными иконами Твоими.
Величание
Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем, с верою притекающим.

Молитва
ко Пресвятой Богородице
пред Ее иконою Сицилийская или Дивногорская

О Пресвятая Госпоже Владычице Богородице! Вышши еси всех Ангел и Архангел и всея твари честнейши, помощница еси обидимых, ненадеющихся надеяние, убогих заступница, печальных утешение, алчущих кормительница, нагих одеяние, больных исцеление, грешных спасение, христиан всех поможение и заступление. О Всемилостивая Госпоже, Дево Богородице Владычице! Милостию Твоею спаси и помилуй страну нашу, преосвященныя митрополиты, архиепископы и епископы, и весь священнический и иноческий чин, военачальники, градоначальники и христолюбивое воинство, и доброхоты, и вся православныя христианы ризою Твоею честною защити, и умоли, Госпоже, из Тебе без семене воплотившагося Христа Бога нашего, да препояшет нас силою Своею свыше на невидимыя и видимыя враги наша. О Всемилостивая Госпоже Владычице Богородице! Воздвигни нас из глубины греховныя, и избави нас от глада, губительства, от труса и потопа, от огня и меча, от нахождения иноплеменных и междоусобныя брани, и от внезапныя смерти, и от нападения вражия, и от тлетворных ветр, и от смертоносныя язвы, и от всякаго зла. Подаждь, Госпоже, мир и здравие рабом Твоим, всем православным христианом, и просвети им ум и очи сердечныя, еже ко спасению, и сподоби ны, грешныя рабы Твоя, Царствия Сына Твоего, Христа Бога нашего, яко Держава Его благословена и препрославлена, со Безначальным Его Отцем и с Пресвятым и Благим и Животворящим Его Духом, ныне и присно и во веки веков. Аминь.
Величание
Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем, с верою притекающим.

Молитва
ко Пресвятой Богородице
пред Ее иконою «Скоропослушница»

Преблагословенная Владычице, Приснодево Богородице, Бога Слова паче всякаго слова на спасение наше рождшая, и благодать Его преизобильно паче всех приявшая! Море явльшаяся божественных дарований и чудес приснотекущая река, изливающая благость всем с верою к Тебе прибегающим! Чудотворному Твоему образу припадающе, молимся Тебе, Всещедрей Матери человеколюбиваго Владыки: удиви на нас пребогатыя милости Твоя, и прошения наша, приносимая Тебе, Скоропослушнице, ускори исполнити, все еже на пользу, во утешение и спасение коемуждо устрояющи. Посети, Преблагая, рабы Твоя благодатию Твоею, и подаждь недугующим цельбу и совершенное здравие, обуреваемым тишину, плененным свободу, и различными образы страждущих утеши. Избави, Всемилостивая Госпоже, всяк град и страну от глада, язвы, труса, потопа, огня, меча и иныя казни временныя и вечныя, Матерним Твоим дерзновением отвращающи гнев Божий, и душевнаго расслабления, обуревания страстей и грехопадений свободи рабы Твоя, яко да непреткновенно во всяком благочестии поживше в сем веце, и в будущем вечных благ сподобимся благодатию и человеколюбием Сына Твоего и Бога, Емуже подобает всякая слава, честь и поклонение со Безначальным Его Отцем и Пресвятым Духом, ныне и присно и во веки веков. Аминь.
Тропарь, глас 4
К Богородице притецем сущии в бедах, и ко святей иконе Ея ныне припадем, с верою зовуще из глубины души: скоро наше услыши моление, Дево, яко Скоропослушница нарекшаяся, Тебе бо ради раби Твои в нуждах готовую Помощницу имамы.
Кондак, глас 8
В мори житейстем обуреваемии, треволнению подпадаем страстей и искушений. Подаждь убо нам, Госпоже, руку помощи, якоже Петрови Сын Твой, и ускори от бед избавити ны, да зовем Ти: радуйся, Всеблагая Скоропослушнице.
Величание
Величаем Тя, Пресвятая Дево, Мати Христа Бога нашего, и чтим образ Твой святый, от негоже источаеши исцеления всем, с верою к Тебе притекающим.

Молитва
ко Пресвятой Богородице
пред Ее иконою «Сладкое лобзание», или «Гликофилусса»

Приими, Всеблагомощная, Пречистая Госпоже, Владычице Богородительнице, сия честныя дары, Тебе единей прикладныя, от нас недостойных рабов Твоих, от всех родов избранная, всех тварей небесных и земных вышшая явльшаяся. Понеже бо Тебе ради бысть Господь сил с нами, и Тобою Сына Божия познахом, и сподобихомся Святаго Тела Его и Пречистыя Крове Его. Темже блаженна еси в родех родов, Богоблаженная, Херувимов светлейши и Серафимов честнейши сущая. И ныне, Всепетая Пресвятая Богородице, не престай молящися о нас, недостойных рабех Твоих, еже избавитися нам от всякаго совета лукаваго и от всякаго обстояния, и сохранитися нам неврежденным от всякаго ядовитаго прилога диавольскаго. Но даже до конца молитвами Твоими неосужденных нас соблюди, яко да Твоим заступлением и помощию спасаеми, славу, хвалу, благодарение и поклонение за вся в Троице Единому Богу и всех Создателю возсылаем, ныне и присно и во веки веков. Аминь.
Тропарь, глас 7
Одержащей ереси, о честней иконе Твоей, Дево, яве промышляеши: морешествием Твоей обители, яко дар достоин приношаеши. Сию же мы Сладколюбящую праве нарицающе, Тя ублажаем.
Кондак, глас 8
Иже в храме и обители Твоей приходящия Ти и богоугодно спасительная гонящия и почитающая Твой святый образ сим даруй, Дево, Твоя милости, от всяких избавльши сих скорбей, Тебе вопиющия: радуйся, Едина Богоневестная.
Величание
Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем, с верою притекающим.

Молитва
ко Пресвятой Богородице
пред Албазинскою Ее иконою, именуемою
«Слово плоть бысть»,
чтомая в Кафедральном Соборе града Благовещенска

Богородице Дево, Пренепорочная Мати Христа Бога нашего, Заступнице рода христианскаго! Пред чудотворною иконою Твоею предстояще, отцы наши молиша Тя, да явиши покров Твой и заступление стране приамурстей. Темже и мы ныне молим Тя: град наш и страну сию от нахождения иноплеменных соблюди и от междоусобныя брани сохрани. Даруй мирови мир, земли плодов изобилие; сохрани во святыни пастырей наших, во святых храмех труждающихся: осени вседержавным покровом Твоим строителей и благотворителей их. Утверди в правоверии и единомыслии братий наших, заблуждших же и отступльших от Православныя веры вразуми и соедини Святей Церкви Сына Твоего. Буди всем притекающим к чудотворней иконе Твоей покров, утешение и пристанище от всяких зол, бед и обстояний, Ты бо еси больных исцеление, скорбящих утешение, заблуждших исправление и вразумление. Приими моления наша и вознеси я ко престолу Всевышняго, яко да Твоим предстательством соблюдаеми и покровом Твоим осеняеми, прославим Отца и Сына и Святаго Духа, ныне и присно и во веки веков. Аминь.
Величание
Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем, с верою притекающим.

Молитва
ко Пресвятой Богородице
пред Ее иконою Смоленскою Полонскою,
чтомая в Преображенской церкви погоста Верховья, Костромской епархии

О Пресвятая Госпоже Владычице Богородице! Со страхом многим и верою и любовию сие благодарственное пение Тебе приносяще, молимся Ти прилежно: не затвори нам грешным щедрот Твоих, Всенепорочная, не отвержи нас к Тебе прибегающих, Милосердая, но всесильными Твоими молитвами покрый и заступи нас, от искушений и бед и скорбей, от внезапныя смерти и вечных мук избавляющи, не имамы бо иныя помощи, не имамы иныя надежды, разве Тебе, Пречистая Дево. Смиренно убо к Тебе припадающе, молим Тя, Преблагословенная Владычице: приими милостивно молитвы, прошения и благодарения всех с верою притекающих к сему честному Твоему образу, приносящи я Сыну Твоему, да вси мы, благодарно величия Твоя воспевающе, сподобимся Небеснаго Царствия и тамо со всеми святыми прославим Пречестное и Великолепое имя Отца и Сына и Святаго Духа, во веки веков. Аминь.
Величание
Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем, с верою притекающим.

Пред иконой Пресвятой Богородицы «София- Премудрость Божия» молятся о благополучии в доме, в семье, при трудности выбора решения.

Тропарь, глас 4
Велия и неизреченная Премудрости Божия сила смотрения плотскаго таинства! Софие Преименитая, девственных душе и неизглаголаннаго девства чистото, смиренныя мудрости истино, покоище Святаго Духа, пречестный храме непостижимыя славы Его, огнезрачный престоле Христа Бога нашего, в Тя бо вселися неизреченно Слово Божие, и плоть бысть, Невидимый явися, и неприкосновенный из Тебе изыде, и с человеком поживе, врага исконнаго уловляя и человеки от клятвы древния свобождая, возводя паки, отнюдуже испадохом. Молимтися, Владычице, отягченныя ны во гресех лютых помиловати и спасти души наша, и, яко человеколюбивая и милосердая Царица, Мати Премудрости Божия Слова, призри на ны, грешныя люди Твоя, и умилосердися, заступи от напастей и скорбей лютых и грады наша невредимы сохрани, идеже ныне имя Твое пресвятое боголепно славится.
Кондак, глас 8
Притецем, людие, к чудотворному образу Премудрости Божия, Царицы и Богородицы: Царя Небеснаго Мати, Христа Бога нашего, услыши нас, грешных и недостойных раб Твоих, в час сей припадающих и молящихся с воздыханием и слезами, умильно глаголющих и прилежно вопиющих: от бед избави нас, Владычице, и заступи, и не презри воздыхания нашего и слез, и изми нас от всякия скорби и напасти, яко можеши, хотящи, разве Тебе Предстательницы иныя и ходатая тепла не имамы к Сыну Твоему и Богу нашему, да спасет Тебе ради души наша.

Молитва
ко Пресвятой Богородице
пред Ее иконою «Спасительница утопающих»

Заступнице усердная, Мати Господа Вышняго! Ты еси всем христианом помощь и заступление, паче же в бедах сущим. Призри ныне с высоты святыя Твоея и на ны, с верою покланяющияся Пречистому образу Твоему, и яви, молим Тя, скорую помощь Твою по морю плавающим и от ветров бурных тяжкия скорби терпящим.
Подвигни и вся православныя христианы на спасение в водах утопающих, и воздаждь подвизающимся о сем богатыя милости и щедроты Твоя.
Се бо, на образ Твой взирающе, Тебе, яко милостивно сущей с нами, приносим смиренная моления наша. Не имамы бо ни иныя помощи, ни инаго предстательства, ни утешения, токмо Тебе, о Мати всех скорбящих и напаствуемых.
Ты по Бозе наша Надежда и Заступница, и на Тя уповающе, сами себе, и друг друга, и весь живот наш Тебе предаем во веки веков. Аминь.
Тропарь, глас 4
К Богородице прилежно ныне притецем, грешнии и смиреннии, и припадем, в покаянии зовуще из глубины души: Владычице, помози, на ны милосердовавши, потщися, погибаем от множества прегрешений, не отврати Твоя рабы тщи, Тя бо и едину надежду имамы.
Кондак, глас 6
Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти: ускори на молитву и потщися на умоление, предстательствующи присно, Богородице, чтущих Тя.
Величание
Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем, с верою притекающим.

Молитва
ко Пресвятой Богородице
пред Ее иконою «Спорительница хлебов»

О, Пресвятая Дево Богородице, Премилостивая Владычице, Царице Небесе и земли, всякаго дома и семейства христианскаго Благоустроительнице, труждающихся благословение, нуждающихся неистощимое богатство, сирых и вдовиц и всех людей Кормительнице! Питательнице наша, рождшая Питателя Вселенныя и Спорительнице хлебов наших, Ты Владычице, ниспосылаеши Твое Матернее благословение градом нашим, селам и нивам и коемуждо дому, на Тя упование имущему. Темже с благоговейным трепетом и сокрушенным сердцем смиренно молим Тя: буди и нам, грешным и недостойным рабом Твоим, мудрая Домостроительнице, житие наше добре устрояющая. Всякое же сообщество, всякий дом и семейство во благочестии и православии, единомыслии, послушании и довольстве соблюди. Нищия и неимущия пропитай, старость поддержи, младенцы воспитай, всех вразуми преискренне взывати ко Господу: «Хлеб наш насущный даждь нам днесь». Сохрани, Пречистая Мати, люди Твоя от всякия нужды, болезни, глада, губительства, града, огня, от всякаго злаго обстояния и всякаго нестроения. Обители нашей (веси), домам и семействам и всякой души христианстей и всей стране нашей исходатайствуй мир и велию милость, да славим Тя, Премилостивую Питательницу и Кормительницу нашу, ныне и присно, и во веки веков. Аминь.
Тропарь, глас 3
О, Пречистая Дево Марие, Мати Царя небесе и земли, благоутробно призираеши на любящих Сына Твоего, Христа Бога нашего, и труждающихся во имя Его вечнаго ради спасения, и подаеши им вся обильно к наслаждению, Спорительнице сущи хлебов им, избавляя их всякия нужды и утеснения и устрояя им, рабом Твоим сущим, избавление вечныя муки и жизнь вечную.
Величание
Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем, с верою притекающим.

Молитва
ко Пресвятой Богородице
пред Ее иконою «Споручница грешных»

О Владычице Преблагословенная, Защитнице рода христианскаго, прибежище и спасение притекающих к Тебе! Вем, воистину вем, яко зело согреших и прогневах, Премилостивая Госпоже, рожденнаго плотию от Тебе Сына Божия, но имам многии образы прежде мене прогневавших Его благоутробие: мытари, блудницы и прочия грешники, имже дадеся прощение грехов их, покаяния ради и исповедания. Тыя убо образы помилованных очесем грешныя души моея представляя и на толикое Божие милосердие, онех преемшее, взирая, дерзнух и аз, грешный, прибегнути с покаянием ко Твоему благоутробию. О Всемилостивая Владычице, да подаси ми руку помощи и испросиши у Сына Твоего и Бога матерними и святейшими Твоими молитвами тяжким моим грехом прощение. Верую и исповедую, яко Той, Егоже родила еси, Сын Твой, есть воистину Христос, Сын Бога Живаго, Судия живых и мертвых, воздаяй комуждо по делом его. Верую же паки и исповедую Тебе быти истинную Богородицу, милосердия источник, утешение плачущих, взыскание погибших, сильную и непрестающую к Богу Ходатаицу, зело любящую род христианский, и Споручницу покаяния. Воистину бо несть человеком иныя помощи и покрова, разве Тебе, Госпоже Премилостивая, и никтоже, уповая на Тя, постыдеся когда и, Тобою умоляя Бога, никтоже оставлен бысть. Того ради молю Твою неисчетную благость: отверзи двери милосердия Твоего мне, заблуждшему и падшему в тимение глубины, не возгнушайся мене, сквернаго, не презри грешнаго моления моего, не остави мене, окаяннаго, яко в погибель злобный враг похитити мя ищет, но умоли о мне рожденнаго от Тебе милосердаго Сына Твоего и Бога, да простит великия моя грехи и избавит мя от пагубы моея; яко да и аз со всеми, получившими прощение, воспою и прославлю безмерное милосердие Божие и Твое непостыдное о мне заступление в жизни сей и в нескончаемом веце. Аминь.
Тропарь, глас 4
Умолкает ныне всякое уныние и страх отчаяния исчезает, грешницы в скорби сердца обретают утешение и Небесною любовию озаряются светло: днесь бо Матерь Божия простирает нам спасающую руку и от Пречистаго образа Своего вещает, глаголя: Аз Споручница грешных к Моему Сыну, Сей дал Мне за них руце слышати Мя выну. Темже, людие, обремененнии грехи многими, припадите к подножию иконы Ея со слезами вопиюще: Заступнице мира, грешным Споручнице, умоли Матерними Твоими молитвами Избавителя всех, да Божественным всепрощением покрыет грехи наша и светлыя двери райския отверзет нам, Ты бо еси предстательство и спасение рода христианскаго.
Кондак, глас 1
Честное Жилище бывшее неизреченнаго естества Божественнаго выше слова и паче ума и грешным еси Споручница, подаваеши благодать и исцеление, яко Мати всех Царствующаго: моли Сына Твоего получити нам милость в День судный.
Величание
Величаем Тя, Пресвятая Дево, и чтим образ Твой святый, имже болезни наша врачуеши и души наша к Богу возводиши.

Молитва
ко Пресвятой Богородице
пред Ее иконою «Страстная»

О Пресвятая Госпоже, Владычице Богородице, вышши еси всех Ангел и Архангел и всея твари честнейши, Помощница еси обидимых, ненадеющихся надеяние, убогих Заступница, печальных утешение, алчущих Кормительница, нагих одеяние, больных исцеление, грешных спасение, христиан всех поможение и заступление. О Всемилостивая Госпоже, Дево Богородице, Владычице, милостию Твоею спаси и помилуй раб Твоих, Великаго Господина и отца нашего Святейшаго Патриарха (имя рек), и преосвященныя митрополиты, архиепископы и епископы, и весь священнический и иноческий чин, Богохранимую страну нашу, военачальники, градоначальники и христолюбивое воинство и доброхоты, и вся православныя христианы ризою Твоею честною защити, и умоли, Госпоже, из Тебе без семене воплотившагося Христа Бога нашего, да препояшет нас силою Своею свыше на невидимыя и видимыя враги наша. О Всемилостивая Госпоже, Владычице Богородице, воздвигни нас из глубины греховныя и избави нас от глада, губительства, от труса и потопа, от огня и меча, от нахождения иноплеменных и междоусобныя брани, и от напрасныя смерти, и от нападения вражия, и от тлетворных ветр, и от смертоносныя язвы, и от всякаго зла. Подаждь, Госпоже, мир и здравие рабом Твоим, всем православным христианом, и просвети им ум и очи сердечныя, еже ко спасению, и сподоби ны, грешныя рабы Твоя, Царствия Сына Твоего, Христа Бога нашего, яко держава Его благословена и препрославлена, со Безначальным Его Отцем, и с Пресвятым и Благим и Животворящим Его Духом, ныне, и присно, и во веки веков. Аминь.
Тропарь, глас 4
Днесь возсия неизреченно царствующему граду нашему Москве икона Богоматере, и, яко светозарным солнцем, пришествием тоя озарися весь мир, Небесныя силы и души праведных мысленно торжествуют, радующеся, мы же, на ню взирающе, к Богородице со слезами вопием: о Всемилостивая Госпоже, Владычице Богородице, молися из Тебе воплощенному Христу, Богу нашему, да подаст мир и здравие всем христианом по велицей и неизреченней Своей милости.
Кондак, глас 3
Благодать прияхом нетления, еже даровала еси нам, спасительнаго Твоего целения чудотворным Твоим образом честным, Богородице Дево, темже вопием Ти и с радостию зовем, Госпоже Царице, молимтися умильно грешнии, со слезами глаголюще: о Пресвятая Владычице, скорое нам яви заступление и помощь, спаси ны от супостат наших и от всякия скорби соблюди, землю нашу миром огради, и вся люди Твоя покрый, и соблюди на Тя уповающия, потщися избавити, да не погибнем зле, раби Твои, но да зовем Ти: радуйся, Невесто Неневестная.
Величание
Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем, с верою притекающим.

Молитва
ко Пресвятой Богородице
пред Ее иконою «Табынская»

О Пресвятая Владычице, Дево Богородице! Приими мольбы от нас, прилежно призывающих и молящихся Тебе, покажи скорое Твое заступление, покажи, яко можеши, яко Мати Бога, призываем Тя от сердца, со слезами припадающе пред пречистым Твоим образом. О Божия Мати! Спаси нас и не даждь в расхищение супостатом, ниже да найдет на ны вся злая, яже грехи наша уготоваша нам, ниже беззакония наша да превзыдут на главы наша. Виждь наша нестерпимыя печали, скорби, нужды, болезни, страсти; вооружися на ны лукавно враг, языком, якоже мечем, хотя нас погубити, но Твоею, Богородительнице, крепостию предвари. Уста человеков, яко львов лютых, гроба тягчайше отверзошася, горько поглотиша ны; но Ты, Богородительнице явися надежда ненадеющимся и низложи крепость их, да узрят врази и постыдятся, да разумеют и видят Твою, еже по нам сопротив борющую силу, и в пропасть преисподнюю низложи их. Да заградится всяк язык, лукавым поучаяйся, да молчат уста льстивыя и уста, неправедно глаголющия на праведнаго беззаконие, гордынею и завистию враждебною вкупе. Призывающим Тя, Богородице, от души неложно во всякой скорби, и в болезнех различных, и в бедах лютых спешно услыши, Владычице, сих избавляющи присно молитвами Своими; душ спасение, веры сохранение, от греховных навыков избавление, мирную христианскую кончину и Царствия Небеснаго наследие даруй нам. Да имя Твое, Богородице, на земли славословится, Иже бо, из Тебе возсияв, грешником державную надежду и стену нерушимую Тя дарова во веки веков. Аминь.
Тропарь, глас 4
Наста днесь пресветлый праздник, Пречистая Дево, честныя Твоея Табынския иконы, Владычице, яже паче лучей солнечных возсия, от Источника приснотекущаго, Христа Бога нашего, источаеши целебныя дары с верою к Тебе притекающим, Тя бо Христос Помощницу людем Своим дарова, покрывати и спасати от всякия беды рабы Своя, едину Благословенную.
Величание
Величаем Тя, Пресвятая Дево, и чтим образ Твой святый, имже болезни наша врачуеши и души наша к Богу возводиши.