145 МОЛИТВ К ПРЕСВЯТОЙ БОГОРОДИЦЕ ПЕРЕД ЕЕ ЧУДОТВОРНЫМИ ИКОНАМИ

Молитва
ко Пресвятой Богородице
пред Ее иконою «Любечская»

О, Пресвятая и Преблагословенная Мати Господа и Спаса нашего Иисуса Христа, Пречистая Приснодево, Богородице Марие! Припадаем и покланяемся Тебе пред святою и чудотворною иконою Твоею, юже от лет древних зде чудесы многими и исцеленьми неисчетными прославити благоизволила еси. Смиренно молимся Тебе, Благой и милосердной Заступнице нашей, предстательством угодника Твоего, преподобнаго Антония Печерскаго, вонми гласу грешных молений наших, не презри воздыханий от души, виждь скорби и беды, нас обышедшия, и, яко любвеобильная воистину Мати, потщися на помощь нам, безпомощным, унылым, во многия и тяжкия грехи впадшим и приснопрогневляющим Господа и Создателя нашего, Егоже умоли, Предстательнице наша, да не погубит нас со беззаконии нашими, но явит нам человеколюбную Свою милость. Испроси нам, Владычице, у благости Его, телесное здравие и душевное спасение, благочестное и мирное житие, земли плодоносие, воздуха благорастворение, дожди благовременны и благословение свыше на вся благая дела и начинания наша. Исходатайствуй, Госпоже, у Царя царствующих и Господа господствующих стране нашей на вся враги победу и одоление, всем же православным христианом милость Божию, благоустроение и во всех благих изобилие. О Царице Всепетая, Мати Божия Всеблагая, простри богоноснии руце Твои к возлюбленному Сыну Твоему и Богу нашему, умоли Его вся ны спасти и избавити погибели вечныя. Якоже древле на месте сем отцем нашим милость Твою являла еси, Владычице, сице и нам ныне яви, Богородице, Твоя щедроты: болящия исцели, скорбящия утеши, бедствующим помози. Споспеши всем нам носити иго Христово в терпении и смирении и сподоби нас благочестно житие сие земное скончати, христианскую непостыдную кончину получити и Небесное Царствие унаследити Матерним ходатайством Твоим к рождшемуся от Тебе Господу и Богу нашему Иисусу Христу, Емуже со Безначальным Его Отцем и Пресвятым Духом подобает всякая слава, честь и поклонение, ныне, и присно, и во веки веков. Аминь.
Тропарь, глас 4
Преблагословенная Царице, Пречистая Дево Богородице, прославльшая град Любеч угодника Твоего преподобнаго Антония Печерскаго рождением и чудотворныя иконы Твоея явлением, молим Тя, Всеблагая: моли за ны рождшагося от Тебе Царя, Христа Бога нашего, и Матерним Твоим к Нему предстательством избави нас от всякаго зла, недуги наша исцели, печали наша утоли и наследники яви нас Царствия Небеснаго, яко Милосердна.
Кондак, глас 8
Притецем, вернии, к многоцелебному образу Заступницы нашея, Богородицы Марии, и, припадающе к нему с любовию, сице рцем: о Всепетая Мати, о Царице Всемилостивая, призри свыше благосердием Твоим на ны, недостойныя, и молитвами угодника Твоего, преподобнаго Антония Печерскаго, яви нам Твоя милости и щедроты: в болезнех исцеление, в скорбех утешение, в бедах скорую помощь нам даруй, и вся ны спаси, на Тя уповающия, да зовем Ти: радуйся, Дево, христиан заступление.
Величание
Величаем Тя, Пресвятая Дево, и чтим образ Твой святый, от него же истекает благодатная помощь всем, с верою притекающим к нему.

Молитва
ко Пресвятой Богородице
пред Ее иконою «Ляданская»,
чтомая в Ляданском Благовещенском монастыре, Минской епархии

К кому возопию, Владычице? К кому прибегну в горести моей, аще не к Тебе, Царице Небесная? Кто плач мой и воздыхание мое приимет, аще не Ты, Пренепорочная, Надеждо христиан и прибежище нам грешным? Кто паче Тебе в напастех защитит? Услыши убо стенание мое, и преклони ухо Твое ко мне, Владычице Мати Бога моего, и не презри мене требующаго Твоея помощи, и не отрини мене грешнаго. Вразуми и научи мя, Царице Небесная, не отступи от мене раба Твоего, Владычице, за роптание мое, но буди мне Мати и Заступница. Вручаю себе милостивому покрову Твоему: приведи мя грешнаго к тихой и безмятежней жизни, да плачуся о гресех моих. К кому бо прибегну повинный аз, аще не к Тебе, упованию и прибежищу грешных, надеждою на неизреченную милость Твою и щедроты Твоя окриляемь? О Владычице Царице Небесная! Ты мне упование и прибежище, покров и заступление и помощь. Царице моя преблагая и скорая заступнице! Покрый Твоим ходатайстом моя прегрешения, защити мене от враг видимых и невидимых, умягчи сердца злых человек, возстающих на мя. О Мати Господа моего Творца! Ты еси корень девства и неувядаемый цвет чистоты. О Богородительнице! Ты подаждь ми помощь немощствующему плотскими страстьми и болезнующему сердцем, едино бо Твое и с Тобою Твоего Сына и Бога нашего имам заступление, и Твоим пречудным заступлением да избавлюся от всякия беды и напасти, о Пренепорочная и Преславная Божия Мати Марие. Темже со упованием глаголю и вопию: радуйся, Благодатная; радуйся, Обрадованная; радуйся, Преблагословенная; Господь с Тобою.
Величание
Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем, с верою притекающим.

Молитва
ко Пресвятой Богородице
пред Ее иконою «Макарьевская»,
чтомая в Макариево-Унженском монастыре, Костромской епархии.

Преблагя Царице, Мати Господа небесе и земли, ангелов радосте, пророков сладосте, апостолов славо, святителей украшение, мучеников крепосте, преподобных радование, вселенныя похвало, ненадежных надеждо, скорбных утешение, болящих здравие, нищих неистощимое богатство, богатых некрадомое сокровище, грешников спасение, и всех христиан поможение и заступление! К Тебе, Богоневесто Владычице, мы грешнии раби Твои прибегаем, и от Тебе, Всеблагая Госпоже Богородительнице, скорыя помощи просим: озари наш ум светом истиннаго богопознания, согрей сердца наша ко приятию спасительных заповедей Сына Твоего и Бога нашего; уврачуй, Владычице, язвы неисцельныя душ и телес наших всесильными Твоими молитвами, и подаждь нам, Всеблагая, вся полезная ко спасению; огради нас святыми ангелы от всех бед, добрая и полезная нам деяти даруй, да прочее время жизни нашея в мире и покаянии поживем; христианскую же кончину жития нашего мирну и непостыдну исходатайствуй нам. Ей, Владычице, Царице Небесная! Услыши сей глас моления нашего, и по исходе от временныя жизни сея, помози нам безбедно прейти вся воздушная мытарства миродержителя тьмы века сего, и в райских обителех со избранными вселитися нам сподоби; да во светлостех святых со веми небесными силами, воспеваем Великолепое имя Отца и Сына и Святаго Духа, ныне и присно и во веки веков. Аминь.
Величание
Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем, с верою притекающим.

Молитва
ко Пресвятой Богородице
пред Ее иконою «Максимовская»

Нескверная, неблазная, нетленная, пречистая, Чистая Дево, Богоневесто Владычице, яже Бога Слова человеком преславным Твоим Рождеством соединившая, и отринувшееся естество рода нашего небесным совокупльшая, яже ненадежных едина надеждо и боримых помоще, готовое заступление к Тебе притекающих, и всех христиан прибежище! Не гнушайся мене грешнаго, сквернаго, скверными помыслы и словесы и деяньми всего себе непотребна сотворша, и разумом лености сластей жития раба бывша. Но яко человеколюбиваго Бога Мати, человеколюбне умилосердися о мне грешнем и блуднем, и приими мое еже от скверных устен приносимое Тебе моление; и Твоего Сына и нашего Владыку и Господа, Матернее Твое дерзновение употребляющи, моли, да отверзит и мне человеколюбныя утробы Своея благости, и презрев моя безчисленная прегрешения, обратит мя к покаянию, и Своих заповедей делателя искусна явит мя. И предстани мне присно, яко милостивая и милосердая и благолюбивая, в настоящем убо житии теплая предстательница и помощница, сопротивных нашествия отгоняющи, и ко спасению наставляющи мя, и во время исхода моего окаянную мою душу соблюдающи, и темныя зраки лукавых бесов далече от нея отгоняющи, в страшный же день суда вечныя мя избавляющи муки, и неизреченныя славы Твоего Сына и Бога нашего наследника мя показующи; юже и да улучу, Владычице моя, Пресвятая Богородице, Твоим ходатайством и заступлением, благодатию и человеколюбием Единороднаго Сына Твоего, Господа и Бога и Спаса нашего Иисуса Христа, Емуже подобает всякая слава, честь и поклонение, со Безначальным Его Отцем и Пресвятым и Благим и Животворящим Его Духом, ныне и присно и во веки веков. Аминь.
Тропарь, глас 4
Днесь светло красуется славнейший град Владимир, радостно совершая, Владычице, праздник явления Твоего святителю Максиму, в нем бывшаго, о немже ныне воспоминающе и молящеся Тебе, взываем сице: о Пречудная Владычице Богородице, молися Превечному Архиерею — Сыну Твоему, да непоколебиму утвердит Церковь Православную, град наш Владимир и всю Русскую землю в мире сохранит и спасет в правоверии души наша.
Кондак, глас 6
Призри на нас, Всепетая Богородице, возсияй просвещение сердцем помраченным и озари стадо Твое, Пречистая, елика бо хощеши и можеши, яко Мати сущи Зиждителя, и возопий молящим Тя: Аз есмь с вами, и никтоже возможет на вы.
Величание
Величаем Тя, Пресвятая Дево, и чтим образ Твой святый, егоже святитель Максим даде граду Владимиру в покров и всем верным во спасение.

Молитва
ко Пресвятой Богородице
пред Ее иконою «Мателикийская»

О Пресвятая Владычице Богородице, вышшая Херувим и честнейшая Серафим, Богоизбранная Отроковице, всех скорбящих Радосте! Подаждь утешение и нам, в скорби сущим, разве бо Тебе инаго прибежища и помощи не имамы. Ты едина еси радости нашея Ходатаица, и яко Мати Божия и Мати милосердия, предстоящи у престола Пресвятыя Троицы, можеши нам помощи; никтоже бо притекаяй к Тебе посрамлен отходит. Услыши убо и нас, ныне в день скорби пред Твоею иконою припадающих и со слезами Тебе молящихся: отжени от нас належащия на нас скорби и печали в сей временней жизни, не лишены же сотвори ны Твоим всесильным ходатайством и вечныя нескончаемыя радости во Царствии Сына Твоего и Бога нашего, Емуже подобает всякая слава, честь и поклонение, со Безначальным Его Отцем и со Пресвятым и Благим и Животворящим Его Духом, ныне и присно и во веки веков. Аминь.
Величание
Величаем Тя, Пресвятая Дево, Мати Христа Бога нашего, и чтим образ Твой святый, от негоже источаеши исцеления всем, с верою к Тебе притекающим.

Молитва
ко Пресвятой Богородице
пред Ее иконою «Милостивая»

О Пресвятая и Преблагословенная Мати Господа, Бога и Спаса нашего Иисуса Христа, Милостивая Богородице и Приснодево Марие! Припадая к святей и чудотворней иконе Твоей, смиренно молимся Тебе, Благой и Милосердой Заступнице нашей: вонми гласу грешных молений наших, не презри воздыханий от души, виждь скорби и беды нас обышедшия, и яко любвеобильная воистину Мати потщися на помощь нам безпомощным, унылым, во многия и тяжкия грехи впадшим и присно прогневляющим Господа и Создателя нашего, Егоже умоли, Предстательнице наша, да не погубит нас со беззаконьми нашими, но явит нам человеколюбную Свою милость. Испроси нам, Владычице, у благости Его, телесное здравие и душевное спасение, благочестное и мирное житие, земли плодоносие, воздуха благорастворение, дожди благовременны и благословение свыше на вся благая дела и начинания наша, и якоже древле призрела еси милостиво на смиренное славословие послушника Афонскаго, воспевавшаго Ти песнь хвалебную пред пречистою иконою Твоею, и послала еси к нему Архангела Гавриила научити его пети песнь небесную, еюже славословят Тя ангели горе, сице приими благоутробно и наше ныне усердно приносимое Тебе молитвословие, и принеси е Сыну Твоему и Богу, да милостив будет Он нам грешным, и пробавит милость Свою всем чтущим Тя и с верою покланяющимся святому образу Твоему. О Царице Всемилостивая, Мати Божия Всеблагая, простри к Нему Богоноснеи Твои руце, имиже Его, яко младенца носила еси, и умоли Его вся ны спасти и избавити от погибели вечныя. Яви нам, Владычице, Твоя щедроты: болящия исцели, скорбящия утеши, бедствующим помози, благопоспеши всем нам носити иго Христово в терпении и смирении, сподоби нас благочестно житие сие земное скончати, христианскую непостыдную кончину получити, и Небесное Царствие унаследити, Матерним ходатайством Твоим к рождшемуся от Тебе Христу Богу нашему, Емуже со Безначальным Его Отцем и Пресвятым Духом, подобает всякая слава, честь и поклонение, ныне и присно, и во веки веков. Аминь.
Тропарь, глас 1
Притецем, людие, со дерзновением к Милостивой Царице Богородице, и умиленно воззовем к Ней: ниспосли, Владычице, милости Твоя богатыя, сохраняя во здравии и благоденствии грешныя рабы Твоя. Болящия исцели, скорбящия утеши и бедствующим помози. И сподоби нас, Премилостивая, благочестно житие сие земное скончати, христианскую непостыдную кончину получити и Небесное Царствие унаследовати. Град наш избави от всякаго злаго обстояния, ограждая Твоим милостивым заступлением. Мирови мир даруй и спасение душам нашим испроси.
Величание
Величаем Тя, Пресвятая Дево, и чтим образ Твой святый, имже болезни наша врачуеши и души к Богу возводиши.

Молитва
ко Пресвятой Богородице
пред Ее иконою «Достойно есть» («Милующая»)

Достойно славимая и праведно от всех горних чинов ублажаемая, яко без сравнения их превосходящая, Бога и Творца всяческих рождшая, паче всех возвеличенная, Пречудная Владычице! Молися из Тебе воплощенному Христу Богу нашему, да призрит на ны люди безответныя, да сохранит нас невредимых от всех навет вражиих и злых клевет, много бо может Твоя Матерняя молитва, по реченному: проси, Мати Моя, не отвращуся, но вся прошения Твоя исполню. Сего ради, радостию о сем исполняемии, взываем Ти: спаси, Владычице, погибающия рабы Твоя, просвети омраченныя суемудрствованьми века сего и приведи ны ко сладчайшему Иисусу, да вечно радующеся взываем: слава Отцу, слава Сыну, слава Святому Духу, слава и Тебе Преславней и Пренепорочней Деве Богоматери, ублажаемей и благословляемей в безконечныя веки веков. Аминь.
Тропарь, глас 4
Притецем, вернии, со дерзновением к милующей Царице Богородице и умильно воззовем к Ней: низпосли на ны милости Твоя богатыя: Церковь нашу сохрани, люди во благоденствии соблюди, землю нашу избави от всякаго обстояния, мир даруй мирови и спасение душам нашим.
Кондак, глас 4
Празднует днесь весь Афон, яко песнь прият от ангела чудно Тебе, Чистей Богоматери, Юже вся тварь чтит, славящи.
Величание
Достойно есть величати Тя, Богородице, Честнейшую Херувим и Славнейшую без сравнения Серафим.

Молитва
ко Пресвятой Богородице
пред Ее иконою «Минская»

О Всепетая и Всеблагая Дево Богородице, небесная наша заступнице! К Тебе по Бозе, яко премилосердней Госпоже, соборне прибегаем и вопием: приими сие малое хвалебное пение, сохрани богоспасаемый град сей, емуже чудотворная икона Твоя во отраду и утешение дадеся. Молим Тя, Владычице Всемилостивая: избави нас от враг видимых и невидимых, от нашествия иноплеменных и междоусобныя брани, от злаго обстония и скорби, от искушений, бед и болезней. Спаси и помилуй рабы Твоя: великаго господина и отца нашего Алексия, Святейшего Патриарха Московскаго и всея Руси, преосвященныя митрополиты, архиепископы, епископы, весь священнический и монашеский чин и весь причет церковный. Приими под кров Твой власти и воинство богохранимыя страны нашея, вразуми и настави их право правити, заповеди Божия соблюдающе, да тихое и безмолвное житие поживем во всяком благочестии и чистоте. О Пресвятая Владычице! Не забуди нас во вся дни жизни нашея и да пребывает с нами неотступно образ Твой честный. Во время же исхода нашего пролей теплую молитву ко Праведному Судии, да презрев безчисленная согрешения наша, помилует и спасет нас, яко благ и человеколюбец. Аминь.
Тропарь, глас 6
На водах Свислочи явилась еси, Пренепорочная Отроковице, от Царьграда и Киева богоспасаемому граду Минску милость показа, просвети нас грешных сиянием Своим, яви, яко присно, силу Твою, спаси нас предстательством Своим и избави от навет вражиих, Тя бо необориму стену и едину надежду имамы.
Кондак, глас 8
Благодарственная приносяще Ти раби Твои, Богородительнице, о всех, имиже благодеяла еси граду нашему, из глубины души взываем Тебе: не престани, Владычице, Матерними к Сыну Твоему молитвами подавати вся благая и спасительная всем с верою и любовию вопиющим Тебе: радуйся, Дево, христиан похвало.
Величание
Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем, с верою притекающим.

Молитва
ко Пресвятой Богородице
пред Ее иконою «Мирожская»

О Пресвятая Владычице Богородице, Небеснаго Царя Мати, Богоизбранная Отроковице, ненадежных надеяние, больных исцеление, сирым предстательнице, скорбящим утешение и радость, обидимым покровительнице и всем в бедах и напастех сущим скорое поможение и заступление! Помози, о Мати Божия, и нам грешным в скорби нашей, возвесели радостию сердца людей Твоих, управи в мире и тишине жизнь нашу, и не даждь нам во отчаяние впасти. Ты бо едина еси паче всех святых и паче всех горних умов предстательница наша к Богу, яко Всеблагаго Царя Благая Мати. Темже мы грешнии, на пречистый Твой образ знамения взирающе, умиленно преклоняем колена, и благоговейно лобызающе, молим Тя, Благосердая Мати: не отрини смиреннаго моления нашего и яви нам знамение милости Твоея, никтоже бо, к Тебе прибегая со упованием, исходит от Тебе посрамлен, но просит благодати и приемлет дар к полезному прошению, прославляя Сына Твоего и Бога, и Тебе с Ним, во веки веков. Аминь.
Тропарь, глас 4
Яко звезда пресветлая возсия в Российстей земли: от иконы честнаго образа Твоего, Богородице Дево, из обою очию текоша слезы Твоя, яко река, и видевше народи псковстии, мужи и жены и со чады, с плачем молящеся образу Твоему, сице глаголаху: о Пресвятая Владычице Богородице, не забуди грешных раб Твоих, молящихся Христу Богу нашему спастися нам.
Кондак, глас 7
Заступнице христианом непостыдная и Предстательнице граду нашему Пскову, не презри моления нас, грешных, видящих от Твоего честнаго образа слезы текуща из обою очию и молящихся прилежно, но предвари, яко Блага, на помощь нам, верно к Тебе прибегающим, услыши наша моления, Богородице, и избави нас от нахождения поганых, ускори же на молитву нашу и потщися на умоление, заступающи присно, Богородице, чтущих Тя; радуйся, Дево, христианом похвало.
Величание
Величаем Тя, Пресвятая Дево, богоизбранная Отроковице, и чтим образ Твой честный, имже показала еси пречудное знамение.

Молитва
ко Пресвятой Богородице
пред Ее иконою Михайловская,
чтомая в Успенской церкви слободы Большой Писаревки, Харьковской епархии

Царице моя преблагая, надеждо моя Богородице, прибежище сирых и странных предстательнице, скорбящих радосте, обидимых покровительнице! Зриши мою беду, зриши мою скорбь, помози ми яко немощну, направи мя яко странна. Обиду мою веси, разреши ту, якоже волиши, яко не имам иныя помощи разве Тебе, ни иныя предстательницы, ни благия утешетельницы, токмо Тебе, о Богомати, яко да сохраниши мя и покрыеши во веки веков. Аминь.
Величание
Величаем Тя, Пресвятая Дево, и чтим образ Твой святый, от него же истекает благодатная помощь всем, с верою притекающим к нему.

Молитва
ко Пресвятой Богородице
пред Ее иконою «Млекопитательница»

Приими, Госпоже Богородительнице, слезная моления рабов Твоих, к Тебе притекающих. Зрим Тя на святей иконе, на руках носящую и млеком питающую Сына Твоего и Бога нашего, Господа Иисуса Христа. Аще и безболезненно родила еси Его, обаче матерния скорби веси и немощи сынов и дщерей человеческих зриши. Темже тепле припадающе к цельбоносному образу Твоему и умиленно сей лобызающе молим Тя, Всемилостивая Владычице: нас грешных, осужденных в болезнех родити и в печалех питати чада наша, милостивно пощади и сострадательно заступи, младенцы же наша, такожде и родившая их, от тяжкаго недуга и горькия скорби избави. Даруй им здравие и благомощие, да и питаемии от силы в силу возрастати будут, и питающия их исполнятся радостию и утешением, яко да и ныне предстательством Твоим из уст младенцев и ссущих Господь совершит хвалу Свою. О Мати Сына Божия! Умилосердися на матери сынов человеческих и на немощныя люди Твоя: постигающия нас болезни скоро исцели, належащия на нас скорби и печали утоли, и не презри слез и воздыханий рабов Твоих. Услыши нас в день скорби пред иконою Твоею припадающих, и в день радости и избавления приими благодарная хваления сердец наших. Вознеси мольбы наша ко престолу Сына Твоего и Бога нашего, да милостив будет ко грехом и немощем нашим и пробавит милость Свою ведущим имя Его, да и мы, и чада наша, прославим Тя, Милосердую заступницу и верную надежду рода нашего, во веки веков. Аминь.
Тропарь, глас 3
Без семене от Божественнаго Духа, волею же Отчею зачала еси Сына Божия, от Отца без матере прежде век суща, нас же ради из Тебе без отца бывша, плотию родила еси и Младенца млеком питала еси, темже не престай молити избавитися от бед душам нашим.
Кондак, глас 5
Душ наших чувствия очистивше, узрим на иконе таинство преславное, Творца Вселенныя и Господа вышних сил, во объятиих держима и от сосцу Твоею яко Младенца питаема, и, со страхом и радостию покланяющеся Тебе и рождшемуся от Тебе Спасу нашему, воззовем: радуйся, Владычице, жизни нашея Питательнице.
Величание
Величаем Тя, Пресвятая Дево, Млекопитательнице Спаса нашего, и чтим образ Твой святый, от негоже благодать исцеления нам присно подаеши.

Молитва
ко Пресвятой Богородице
пред Ее иконою Моздокская,
чтомая в Моздокском Успенском соборе, Владикавказской епархии

О Пресвятая Дево, Мати Христа Бога нашего, Царице Небесе и земли! Вонми многоболезненному воздыханию душ наших, призри с высоты святыя Твоея на нас, с верою и любовию покланяющихся пречистому образу Твоему. Се бо грехми погружаемии и скорбьми обуреваемии, взирающе на Твой образ, яко живей Тебе сущей с нами, приносим смиренная моления наша. Не имамы бо иныя помощи, ни инаго предстательства, ни утешения, токмо Тебе, о Мати всех скорбящих и обремененных! Помози нам немощным, утоли скорби наша, настави на путь правый нас заблуждающих, уврачуй болезненная сердца наша и спаси безнадежных, даруй нам прочее время жития нашего в мире и покаянии проводити, подаждь христианскую кончину, и на страшнем суде Сына Твоего явися нам милосердая предстательница, да всегда поем, величаем и славим Тя, яко благую заступницу рода христианскаго, со всеми угодившими Богу, во веки веков. Аминь.
Величание
Величаем Тя, Пресвятая Дево, и чтим образ Твой святый, имже болезни наша врачуеши и души к Богу возводиши.

Молитва
ко Пресвятой Богородице
пред Ее иконою «Молченская»

О, Всемилостивая, человеколюбивая Владычице наша Богородице! Услыши сие немощное моление с любовию и трепетом припадающих к честней и славней Молченской иконе Твоей. Смиренно просим Тя: буди Стена нерушимая стране нашей Российстей, святую Церковь Православную защити от неверия, ересей и расколов. Ты бо еси всесильная христиан Заступница. Всякую душу, к Тебе прибегающую, огради от злаго обстояния, скорби и болезни, удержи от падений греховных, падших возстави к покаянию, страждущих душевными недугами и одержимых злыми духами исцели, подаждь уходящим в жизнь вечную утешение и надежду спасения, и вся потребная к благочестивой жизни даруй. Да славим в Троице Единаго Бога, Отца и Сына, и Святаго Духа, и Твое милостивное предстательство, ныне и присно и во веки веков. Аминь.
Тропарь, глас 4
Днесь светло красуется славный град Москва и в Путивле ликование велие, яко чествуют, Богомати, дивную икону Твою, медом благодати всех напояющую.
Кондак, глас 6
Притецем людие, к Владычице нашей Деве Богородице, икону бо Свою Молченскую нам даровала, токи исцелений источающую, всякую помощь в душевных и телесных недугах подающую и к жизни вечной приводящую.
Величание
Величаем Тя, Пресвятая Дево, и чтим образ Твой святый, имже болезни наша врачуеши и души к Богу возводиши.

Молитва
ко Пресвятой Богородице
пред Ее иконою «Муромская»

О Пресвятая Дево, Мати Господа Вышних сил, Небесе и земли Царице, града и страны нашея Всемощная Заступнице! Услыши нас, молящихся Тебе, и испроси у Бога, Сына Твоего, пастырем нашим ревность и бдение о душах, градоправителем — мудрость и силу, судиям — правду и нелицеприятие, наставником — разум и смиренномудрие, супругом — любовь и согласие, чадом — послушание, обидимым — терпение, обидящим — страх Божий, скорбящим — благодушие, радующимся — воздержание. Нам же всем ниспосли дух разума и благочестия, дух милосердия и кротости, дух чистоты и правды. Ей, Госпоже Пречистая! умилосердися на немощныя люди Твоя: разсеянныя собери, заблуждшия на путь правый настави, недугующия уврачуй, старость поддержи, юныя уцеломудри, младенцы воспитай и призри на всех нас призрением милостиваго Твоего заступления. Милостива нам буди зде и на Страшнем Суде Сына Твоего. Ты бо еси, Госпоже, слава Небесных и упование земных, Ты по Бозе наша надежда и Заступница всех, притекающих к Тебе с верою. Тебе убо молимся и Тебе, яко Всемогущей Помощнице, сами себе и друг друга и всю жизнь нашу предаем, ныне, и присно, и во веки веков. Аминь.
Тропарь, глас 4
Днесь светло красуется град Муром, яко зарю солнечную, восприемши, Владычице, чудотворную Твою икону, к нейже ныне мы притекающе и молящеся, Тебе взываем сице: о Пречудная Владычице Богородице, молися из Тебе воплощенному Христу Богу нашему, да избавит град сей и вся грады и страны христианския невредимы от всех навет вражиих и спасет души наша, яко Милосерд.
Величание
Величаем Тя, Пресвятая Дево, и чтим образ Твой святый, имже болезни наша врачуеши и души к Богу возводиши.

Молитва
ко Пресвятой Богородице
пред Ее иконою «Не рыдай Мене, Мати»

К Тебе, Пречистей Божией Матери, аз окаянный припадая молюся: веси, Царице, яко непрестанно согрешаю и прогневляю Сына Твоего и Бога моего. И аще многажды каюся, ложь пред Богом обретаюся: каюся трепеща, да не како поразит мя Господь, и по часе мале паки таяжде творю. Ведущи сия, Владычице моя, Госпоже Богородице, молю, да помилуеши, да укрепиши мя, и благая творити да подаси ми. Ты веси, о Владычице моя Богородице, яко имам в совершенней ненависти злая моя дела и всею мыслию люблю закон Бога моего. Но не вем, Госпоже Пречистая, откуду яже ненавижду, тая творю, а благая преступаю. Не попущай убо, Пречистая, воли моей совершатися, неугодна бо есть, но да будет во мне воля Сына Твоего и Бога моего, да мя спасет, и вразумит, и подаст ми благодать Святаго Духа, да бых аз отселе престал сквернодействуя и прочее пожил бых в повелениих Сына Твоего, Господа нашего Иисуса Христа, Емуже подобает всякая слава, честь и поклонение, со Безначальным Его Отцем, и Пресвятым и Благим и Животворящим Его Духом, ныне и присно и во веки веков. Аминь.
Величание
Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем, с верою притекающим.

Молитва
ко Пресвятой Богородице
пред Ее иконою «Недремлющее Око»

О, Предивная Госпоже, Владычице Богородице! Приими нас, припадающих к Твоему образу; воззри недремлющим оком Твоим на душевныя язвы наша греховныя; умоли сердцем бдящего о нас Сына Твоего, Христа Бога нашего, да избавит нас, с верою к Нему прибегающих, от тяжкаго сна греховнаго и от всех навет вражиих, да спасет души наша, яко Человеколюбец. Аминь.
Величание
Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем, с верою притекающим.

Молитва
ко Пресвятой Богородице
пред Ее иконою «Неопалимая Купина»

Царице Небесная, Владычице наша, Госпоже вселенныя, Пресвятая Богородице, нескверная, неблазная, нетленная, пречистая, чистая Приснодево, Марие Богоневесто, Мати Творца твари, Господа славы и Владыки всяческих!
Тобою Царь царствующих и Господь господствующих прииде и на земли нам явися. Ты убо Божие милосердие воплощенное. Ты Мати Света и живота сущи, якоже некогда во чреве Твоем носила еси Его и на объятиих Твоих имела еси Младенца Слово Превечное, Бога, тако и всегда Того с Собою имаши.
Сего ради мы по Бозе к Тебе прибегаем, яко к нерушимей стене и предстательству: призри благосердием, Всепетая Богородице, на лютое озлобление наше, и исцели душ и телес наших болезни, отжени от нас всякаго врага и супостата, избави от глада, мора, от язвы, от вод многих и воздухов тлетворных, и от смерти внезапныя; и якоже три отроки в пещи вавилонстей, сохрани и соблюди нас, да якоже древле людем Божиим, тако будут вся благая нам чтущим Тя; врази же и вси ненавидящии нас да постыдятся и посрамятся, и уразумеют вси, яко с Тобою Господь, о Владычице, и Тобою с нами Бог.
Во дни осени нас сению благодати Твоея, во тьме же нощней просвети светом свыше, всем полезная устрояющи; преложи горесть нашу во сладость и слезы утри согрешивших и бедствующих раб Твоих, исполняющи коегождо прошения вся во благо; вся бо можеши, елика хощеши Ты, Мати Слова и Живота.
Тебе Отец венча Дщерь, Сын Матерь Деву, Дух Святый Невесту, да царствуеши яко Царица, предстоящи одесную Святыя Троицы, и милуеши нас якоже хощеши, ныне и присно и во веки веков. Аминь.
Тропарь, глас 4
Иже во огни купины неопалимыя, древле Моисеем виденныя, тайну воплощения Своего от неискусобрачныя Девы Марии Прообразовавый, Той и ныне, яко чудес Творец и всея твари Создатель, икону Ея святую чудесы многими прослави, даровав ю верным во исцеление недугом и в защищение от огненнаго запаления. Сего ради вопием Преблагословенней: надеждо христиан, от лютых бед, огня и грома избави на Тя уповающия, и спаси души наша, яко Милосерда.
Кондак, глас 8
Предочистим чувствия душ и телес наших, да видим таинство Божественное, образно явленное древле великому во пророцех Моисею купиною, горевшею огнем и не сгаравшею, в нейже Твоего безсеменнаго Рождества, Богородице, предвозвещение исповедуем и, благоговейно покланяющеся Тебе и рождшемуся от Тебе Спасу нашему, со страхом вопием: радуйся, Владычице, покрове и прибежище, и спасение душ наших.
Величание
Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем, с верою притекающим.

Молитва
ко Пресвятой Богородице
пред Ее иконою «Нерушимая Стена»

О Благодатная Владычице наша Богородице, Приснодево, приими от нас сие благодарственное хвалебное пение и вознеси ко Творцу и Зиждителю нашему теплыя молитвы Твоя за нас недостойных, да простит Он, Милосердый, нам вся грехи наша, помыслы лукавыя и нечистыя, дела скверныя. О Госпоже Пресвятая, умилосердися и низпосли дар по коегождо потребе: болящия исцели, скорбящия утеши, заблуждшия вразуми, охрани младенцы, воспитай и научи юныя, ободри и настави мужи и жены, поддержи и согрей старыя, буди нам и зде, и в жизни вечней Стено Нерушимая, избави от всяких бед и напастей и от вечнаго мучения, да всегда воспевающе Твою Материнскую любовь, восхваляем всем сердцем Сына Твоего, со Отцем Его и Святым Духом, во веки веков. Аминь.
Тропарь, глас 4
Яко нерушимую стену и всемощный покров стяжахом Тя, раби Твои, Владычице Богородице, мрак грехов и скорбей отгоняющую. Темже вопием Ти: мир мирови даруй и душам нашим свет и спасение.
Величание
Величаем Тя, Пресвятая Дево, и чтим образ Твой святый, имже болезни наша врачуеши и души к Богу возводиши.

Молитва
ко Пресвятой Богородице
пред Ее иконою «Неувядаемый Цвет»

О Пресвятая и Пренепорочная Мати Дево, надеждо христиан и прибежище грешным! Защити всех в несчастиих к Тебе прибегающих, услыши стенания наша, приклони ухо Твое к молению нашему, Владычице и Мати Бога нашего, не презри требующия Твоея помощи и не отрини нас грешных, вразуми и научи нас: не отступи от нас, рабов Твоих, за роптание наше. Буди нам Мати и Покровительнице, вручаем себе милостивому покрову Твоему. Приведи нас грешных к тихой и безмятежней жизни; да оплачем грехи наша. О Мати Марие, наша преблагая и скорая Заступнице, покрый нас Своим ходатайством. Защити от врагов видимых и невидимых, умягчи сердца злых людей, возстающих на нас. О Мати Господа Творца нашего! Ты корень девства и неувядающий цвет чистоты и целомудрия, пошли помощь нам немощным и обуреваемым плотскими страстьми и блуждающими сердцами. Просвети наша душевныя очи, да видим пути правды Божия. Благодатию Сына Твоего укрепи нашу слабую волю во исполнение заповедей, да избавимся от всякия беды и напасти и оправданы будем Твоим пречудным заступлением на страшнем суде Сына Твоего. Емуже мы воздаем славу, честь и поклонение ныне и присно, и во веки веков. Аминь.
Тропарь, глас 5
Преблагословенная Богородице Дево, покланяемся Твоему пречистому образу, Тебе поем хвалебную песнь, Тебе приносим нужды, горе и слезы, Ты же о, кроткая Заступнице наша, Тебе так близки земные печали, приими наша воздыхания, помози нам и от бед спаси. Неустанно бо и со умилением да зовем Ти: радуйся, Мати Божия, Цвете Неувядаемый.
Величание
Величаем Тя, Пресвятая Дево, и чтим образ Твой святый, имже болезни наша врачуеши и души к Богу возводиши.

Молитва
ко Пресвятой Богородице
пред Ее иконою «Неупивамемая Чаша»

О Премилостивая Владычице! К Твоему заступлению ныне прибегаем, молений наших не презри, но милостивно услыши нас: жен детей, матерей и тяжким недугом пианства одержимых и от Матери — Церкви Христовой и спасения отпадающих братиев, сестер и сродник наших исцели.
О Милостивая Мати Божия, коснися сердец их и скоро возстави от падений греховных и ко спасительному воздержанию приведи их. Умоли Сына Твоего Христа Бога нашего, да простит нам согрешения наша и не отвратит милости Своея от людей Своих, но да укрепит нас в трезвости и целомудрии.
Приими, Пресвятая Богородице, молитвы матерей, о чадех своих слезы проливающих, жен, о мужех своих рыдающих, чад сирых и убогих, заблуждшими оставленных, и всех нас, к иконе Твоей припадающих. И да приидет сей вопль наш молитвами Твоими ко престолу Всевышняго.
Покрый и соблюди нас от лукаваго ловления и всех козней вражиих, в страшный же час исхода нашего помози прейти нам непреткновенно воздушныя мытарства, молитвами Твоими избави нас вечнаго осуждения, да покрыет нас милость Божия в бесконечныя веки веков. Аминь.
Тропарь, глас 4
Днесь притецем, вернии, к Божественному и пречудному образу Пресвятыя Богоматере, напояющей верных сердца Небесною Неупиваемою Чашею Своего милосердия и людем верным чудеса показующей. Яже мы видяще и слышаще духовно празднуем и тепле вопием: Владычице Премилостивая, исцели наша недуги и страсти, молящи Сына Твоего, Христа Бога нашего, спасти души наша.
Величание
Величаем Тя, Пресвятая Дево, Мати Христа Бога нашего, и чтим образ Твой святый, от негоже источаеши исцеления всем с верою к Тебе притекающим.

Молитва
ко Пресвятой Богородице
пред Ее иконою «Нечаянная Радость»
(из службы со акафистом)

О Пресвятая Дево, Всеблагаго Сына Мати Всеблагая, града Москвы Покровительнице, всех сущих во гресех, скорбех, бедах и болезнех Верная Предстательнице и Заступнице! Приими молебное пение сие от нас, недостойных раб Твоих, Тебе возносимое, и якоже древле грешника, на всяк день многажды пред честною иконою Твоею молившагося, не презрела еси, но даровала еси нечаянную радость ему и преклонила еси Сына Твоего многим и усердным к Нему ходатайством ко прощению сего грешнаго и заблуждшаго, тако и ныне не презри моления нас, недостойных рабов Твоих, и умоли Сына Твоего и Бога нашего, да и всем нам, с верою и умилением покланяющимся пред цельбоносным образом Твоим, дарует нечаянную по коегождо потребе радость: грешником, погрязшим во глубине зол и страстей, — вседейственное вразумление, покаяние и спасение; сущим в скорбех и печалех — утешение; обретающимся в бедах и озлоблениих — совершенное сих избытие; малодушным и ненадежным — надежду и терпение; в радости и изобилии живущим — непрестанное Благодетелю благодарение; бедствующим — милосердие; сущим в болезни и долгонедужии и оставленным врачами — нечаемое исцеление и укрепление; иждившим от недуга ум — ума возвращение и обновление; отходящим в вечную и нескончаемую жизнь — память смертную, умиление и сокрушение о гресех, дух бодр и твердую на милосердие Судии надежду. О Госпоже Пресвятая! Умилосердися ко всем, чтущим всечестное имя Твое, и всем яви всемощный покров Твой и заступление; во благочестии, чистоте и честнем жительстве пребывающия до последняго их скончания во благости соблюди; злыя благи сотвори; заблуждшия на путь правый настави; всякому делу благому и Сыну Твоему угодному споспешествуй; всякое дело злое и богопротивное разруши; в недоумении и трудных и опасных обстояниих обретающимся незримую помощь и вразумление с Небесе низпосли; от искушений, соблазнов и погибели спаси; от злых человек и от врагов видимых и невидимых защити и сохрани; плавающим сплавай; путешествующим спутешествуй; сущим в нужде и гладе буди Питательница; неимущим крова и пристанища буди покров и прибежище; нагим подаждь одеяние; обидимым и неправедно гонимым — заступление; клевету, поношение и хуление терпящия незримо оправдай; клеветники и хулители пред всеми обличи; ожесточенно враждующим нечаемое подаждь примирение, и всем нам друг ко другу любовь, мир и благочестие и здравие с долгоденствием. Супружества в любви и единомыслии сохрани; супруги, во вражде и разделении сущия, умири, соедини я друг ко другу и положи им союз любве неразрушимый; матерем, дети родящим, скорое подаждь разрешение; младенцы воспитай; юныя уцеломудри, отверзи им ум к восприятию всякаго полезнаго учения, страху Божию, воздержанию и трудолюбию настави; от домашней брани и вражды единокровных миром и любовию огради. Безматерних сирот буди Матерь, от всякаго порока и скверны отврати я и всему благому и Богоугодному научи, прельщенныя же и во грех и нечистоту падшия, скверну греха отъявши, из бездны погибели изведи. Вдов буди Утешительница и Помощница, старости буди жезл, от внезапныя смерти без покаяния всех нас избави, и всем нам христианскую кончину живота нашего, безболезненну, непостыдну, мирну и добрый ответ на страшнем Судищи Христове даруй. Преставльшияся в вере и покаянии от жития сего со Ангелы и всеми святыми жити сотвори, скончавшимся внезапною смертию милостива быти Сына Твоего умоли, и о всех усопших, иже не имут сродников, о упокоении их Сына Твоего умоляющих, Сама буди непрестанная и теплая Молитвенница и Ходатаица, да вси на Небеси и на земли ведят Тя, яко твердую и непостыдную Предстательницу рода христианскаго, и, ведуще, славят Тя и Тобою Сына Твоего, со Безначальным Его Отцем и Единосущным Его Духом, ныне и присно и во веки веков. Аминь.
Тропарь, глас 4
Днесь, вернии людие, духовно торжествуем, прославляюще Заступницу усердную рода христианскаго, и, притекающе к пречистому Ея образу, взываем сице: о Премилостивая Владычице Богородице, подаждь нам нечаянную радость, обремененным грехи и скорбьми многими, и избави нас от всякаго зла, молящи Сына Твоего, Христа Бога нашего, спаси души наша.
Кондак, глас 6
Не имамы иныя помощи, не имамы иныя надежды, разве Тебе, Владычице. Ты нам помози, на Тебе надеемся, и Тобою хвалимся, Твои бо есмы раби, да не постыдимся.
Величание
Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем, с верою притекающим.

Молитва
ко Пресвятой Богородице
пред Ее иконою «Никейская»

О Пресвятая Госпоже Владычице Богородице! Вышши еси всех Ангел и Архангел и всея твари честнейши, помощница еси обидимых, ненадеющихся надеяние, убогих заступница, печальных утешение, алчущих кормительница, нагих одеяние, больных исцеление, грешных спасение, христиан всех поможение и заступление. О Всемилостивая Госпоже, Дево Богородице Владычице! Милостию Твоею спаси и помилуй страну нашу, преосвященныя митрополиты, архиепископы и епископы, и весь священнический и иноческий чин, военачальники, градоначальники и христолюбивое воинство, и доброхоты, и вся православныя христианы ризою Твоею честною защити, и умоли, Госпоже, из Тебе без семене воплотившагося Христа Бога нашего, да препояшет нас силою Своею свыше на невидимыя и видимыя враги наша. О Всемилостивая Госпоже Владычице Богородице! Воздвигни нас из глубины греховныя, и избави нас от глада, губительства, от труса и потопа, от огня и меча, от нахождения иноплеменных и междоусобныя брани, и от внезапныя смерти, и от нападения вражия, и от тлетворных ветр, и от смертоносныя язвы, и от всякаго зла. Подаждь, Госпоже, мир и здравие рабом Твоим, всем православным христианом, и просвети им ум и очи сердечныя еже ко спасению, и сподоби ны, грешныя рабы Твоя, Царствия Сына Твоего, Христа Бога нашего, яко Держава Его благословена и препрославлена, со Безначальным Его Отцем и с Пресвятым и Благим и Животворящим Его Духом, ныне и присно и во веки веков. Аминь.
Тропарь, глас 4
Бысть чрево Твое святая трапеза, имущи Небеснаго Хлеба, Христа, от Негоже всяк ядый не умирает, якоже рече всяческих, Богородице, Питатель.
Кондак, глас 6
Предстательство христиан непостыдное, ходатайство ко Творцу непреложное, не презри грешных молений гласы, но предвари яко Благая, на помощь нас, верно зовущих Ти: ускори на молитву и потщися на умоление, предстательствующи присно, Богородице, чтущих Тя.
Величание
Величаем Тя, Пресвятая Дево, и чтим образ Твой святый, имже болезни наша врачуеши и души наша к Богу возводиши.

Молитва
ко Пресвятой Богородице
пред Ее иконою «О Тебе радуется»

К кому возопию, Владычице? К кому прибегну в горести моей, аще не к Тебе, Царице Небесная? Кто плач мой и воздыхание мое приимет, аще не Ты, Пренепорочная, Надеждо христиан и прибежище нам грешным? Кто паче Тебе в напастех защитит? Услыши убо стенание мое, и преклони ухо Твое ко мне, Владычице Мати Бога моего, и не презри мене требующаго Твоея помощи, и не отрини мене грешнаго. Вразуми и научи мя, Царице Небесная, не отступи от мене раба Твоего, Владычице, за роптание мое, но буди мне Мати и заступница. Вручаю себе милостивому покрову Твоему: приведи мя грешнаго к тихой и безмятежней жизни, да плачуся о гресех моих. К кому бо прибегну повинный аз, аще не к Тебе, упованию и прибежищу грешных, надеждою на неизреченную милость Твою и щедроты Твоя окриляемь? О Владычице Царице Небесная! Ты мне упование и прибежище, покров и заступление и помощь. Царице моя преблагая и скорая заступнице! Покрый Твоим ходатайстом моя прегрешения, защити мене от враг видимых и невидимых, умягчи сердца злых человек, возстающих на мя. О Мати Господа моего Творца! Ты еси корень девства и неувядаемый цвет чистоты. О Богородительнице! Ты подаждь ми помощь немощствующему плотскими страстьми и болезнующему сердцем, едино бо Твое и с Тобою Твоего Сына и Бога нашего имам заступление, и Твоим пречудным заступлением да избавлюся от всякия беды и напасти, о Пренепорочная и Преславная Божия Мати Марие. Темже со упованием глаголю и вопию: радуйся, Благодатная; радуйся, Обрадованная; радуйся, Преблагословенная; Господь с Тобою.
Тропарь, глас 8
О Тебе радуется, Благодатная, всякая тварь, ангельский собор и человеческий род, освященный храме и раю словесный, девственная похвало, из Неяже Бог воплотися и Младенец бысть, прежде век сый Бог наш: ложесна бо Твоя престол сотвори и чрево Твое пространнее небес содела. О Тебе радуется, Благодатная, вся тварь, слава Тебе.
Величание
Величаем Тя, Пресвятая Дево, и чтим образ Твой святый, имже болезни наша врачуеши и души наша к Богу возводиши.

Молитва
ко Пресвятой Богородице
пред Ее иконою «Смоленская», именуемою «Одигитрия»

О Пречудная и Превышшая всех тварей Царице Богородице, Небеснаго Царя Христа Бога нашего Мати, Пречистая Одигитрие Марие! Услыши нас грешных и недостойных в час сей молящихся и припадающих к Твоему пречистому образу со слезами и умиленно глаголющих: изведи нас от рова страстей, Владычице Преблагая, избави нас от всякия скорби и печали, огради от всякия напасти и злыя клеветы, и от неправеднаго и лютаго навета вражия. Можеши бо, о Благодатная Мати наша, от всякаго зла сохранити люди Твоя и всяким благодеянием снабдити и спасти; разве Тебе иныя Предстательницы в бедах и обстояниих, и теплыя Ходатаицы о нас, грешных, не имамы. Умоли, Госпоже Пресвятая, Сына Твоего Христа Бога нашего, да удостоит нас Царствия Небеснаго; сего ради всегда славим Тя, яко Виновницу спасения нашего, и превозносим святое и великолепое имя Отца и Сына и Святаго Духа, в Троице славимаго и покланяемаго Бога, во веки веков. Аминь.
Тропарь, глас 4
К Богородице прилежно ныне притецем, грешнии и смиреннии, и припадем, в покаянии зовуще из глубины души: Владычице, помози, на ны милосердовавши, потщися, погибаем от множества прегрешений, не отврати Твоя рабы тщи, Тя бо и едину надежду имамы.
Кондак, глас 6
Не имамы иныя помощи, не имамы иныя надежды, разве Тебе, Владычице, Ты нам помози, на Тебе надеемся и Тобою хвалимся, Твои бо есмы раби, да не постыдимся.
Величание
Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем, с верою притекающим.

Молитва
ко Пресвятой Богородице
пред Ее иконою «Озерянская»

От суеты житейския возникше и ума своего помыслы воедино собравше, ко Твоей, Богородице, иконе очи душ и телес наших воздвизаем, и Тебе взываем сице: не остави, Пречистая, нас немощных во гресех наших растлетися, не попусти злому демону души наши от Сына Твоего в дебри страстей отгнати, но помози нам Того заповеди присно памятовати, да ниже блудным возбешением себе предаем, ниже друг друга злобою угрызаем, но якоже днесь, святыни Твоей предстояще, о исправлении жития нашего ревностию распаляемся, тако и от храма Твоего в домы своя отшедше, сие доброе намерение сохранити потщимся.
По сих же и телесныя наша нужды утоли, и горести Твоею молитвою исцели, Всепетая. Вемы, яко подобаше нам паче вся сия благодушне претерпевати и точию о терпении в скорбех Господа просити; но понеже изнемогают в печалех душы наша и помыслы уныния нашу колеблют веру, сего ради в сокрушении сердец к Тебе сице взываем. Якоже безчисленныя болящия страдальцы исцелила еси и скорбящия утешила еси, тако и нас пред чудотворною Твоею иконою припадающих и в скорби Тебе молящихся, услыши, и всех прошения во благое исполни, болящим здравие, скорбящим утешение подающи, во вражде сущим мир от Бога низпосылающи, сомнящимся же веры утверждение.
Услыши грешныя рабы Твоя, Пречистая, воздвигни нас на благодарственное Тебе славословие, да умножится вера людей Твоих, да прославится в них Твое заступление, да тако Царствие Сына Твоего посреде нас утвердится; Емуже подобает всякая слава, честь и поклонение, со Безначальным Его Отцем и Пресвятым, и Благим, и Животворящим Духом, ныне, и присно, и во веки веков. Аминь.
Тропарь, глас 3
Твоего предстательства уверение и милосердия Твоего явление икона Озерянская нам, Владычице, показася; пред неюже души наша в молитве изливаем и верою Тебе вопием: воззри, Милосердая, на люди Твоя, вся скорби наша и печали утоли, утешение благое в сердца наша низпосли и спасение вечное душам нашим, Пречистая, испроси.
Кондак, глас 5
Не отрини, о Милосердая Мати, слез и воздыханий наших, но прошения наша милостивно приимши, пред иконою Твоею молящихся людей веру укрепи, умилением сердца их исполни и крест земнаго жития носити им помози; елика бо хощеши, можеши.
Величание
Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем, с верою притекающим.

Молитва
ко Пресвятой Богородице
пред Ее иконою «Оковецкая»

К кому возопию, Владычице? К кому прибегну в горести моей, аще не к Тебе, Царице Небесная? Кто плач мой и воздыхание мое приимет, аще не Ты, Пренепорочная, Надеждо христиан и прибежище нам грешным? Кто паче Тебе в напастех защитит? Услыши убо стенание мое, и преклони ухо Твое ко мне, Владычице Мати Бога моего, и не презри мене требующаго Твоея помощи, и не отрини мене грешнаго. Вразуми и научи мя, Царице Небесная, не отступи от мене раба Твоего, Владычице, за роптание мое, но буди мне Мати и заступница. Вручаю себе милостивому покрову Твоему: приведи мя грешнаго к тихой и безмятежней жизни, да плачуся о гресех моих. К кому бо прибегну повинный аз, аще не к Тебе, упованию и прибежищу грешных, надеждою на неизреченную милость Твою и щедроты Твоя окриляемь? О Владычице Царице Небесная! Ты мне упование и прибежище, покров и заступление и помощь. Царице моя преблагая и скорая заступнице! Покрый Твоим ходатайстом моя прегрешения, защити мене от враг видимых и невидимых, умягчи сердца злых человек, возстающих на мя. О Мати Господа моего Творца! Ты еси корень девства и неувядаемый цвет чистоты. О Богородительнице! Ты подаждь ми помощь немощствующему плотскими страстьми и болезнующему сердцем, едино бо Твое и с Тобою Твоего Сына и Бога нашего имам заступление, и Твоим пречудным заступлением да избавлюся от всякия беды и напасти, о Пренепорочная и Преславная Божия Мати Марие. Темже со упованием глаголю и вопию: радуйся, Благодатная; радуйся, Обрадованная; радуйся, Преблагословенная; Господь с Тобою.
Тропарь, глас 4
Предстательнице нератная, о Одигитрие готовая! Тверския земли и града Москвы красота и слава, днесь в кров Твой вси прибегаем и умильно вопием Твоему крепкому заступлению, просяще избавления от злых наветников православия, присно борющих нас, и получити, Богородительнице Чистая, токи неисчерпаемых чудесных исцелений от Твоея пречудныя иконы молитвой предстоящаго пред Тобою Мирликийскаго чудотворца Николая, да усердно вси Твое проповемы наше ограждение.
Величание
Величаем Тя, Пресвятая Дево, Мати Христа Бога нашего и чтим образ Твой святый, от негоже источаеши исцеления всем, с верою к Тебе притекающим.

Молитва
ко Пресвятой Богородице
пред Ее иконою «Опочецкая, или Себежская» («Умиление»)

О Пресвятая Дево, Мати Христа Бога нашего, Царице небесе и земли! Вонми многоболезненному воздыханию душ наших, призри с высоты святыя Твоея на нас, с верою и любовию покланяющимся пречистому и чудотворному образу Твоему. Се бо грехми погружаемии и скорбьми обуреваемии, взирающе на Твой образ, яко живей Тебе сущей с нами, приносим смиренная моления наша. Не имамы бо иныя помощи, ни инаго предстательства, ни утешения, токмо Тебе, о Мати всех скорбящих и обремененных. Помози нам немощным, утоли скорби наша, настави на путь правый нас заблуждающих, уврачуй болезненная сердца наша и спаси безнадежных, даруй нам прочее время жития нашего в мире и покаянии проводити, подаждь христианскую кончину, и на страшнем суде Сына Твоего явися нам Милосердая Предстательница, да всегда поем, величаем и славим Тя, яко благую Заступницу рода христианскаго, со всеми угодившими Богу, во веки веков. Аминь.
Тропарь, глас 8
Взыдем, православнии народи града Опочки, на тучную гору, яко на Фаворскую, в дом Спасителя своего, в честь боголепнаго Преображения Его, обилующу чудес и стократный клас израстившую, и узрим славу чудесе от чудотворнаго образа Пресвятыя Богоматере Умиления Себежския: яко море пролияся и Евфрат, текий из рая, тако слезы Ея быша, из обою оку пролитыя, о нашедшем гневе Создателя Своего за наше согрешение, припадем, каменносердечнии, и возрыдаем, просяще: о Владычице, умоли Сына Своего и Господа нашего сими пресвятыми Своими слезами, да избавит нас от всякаго злаго обстояния, и огненнаго запаления, и междоусобныя брани, от мора и глада, и нашествия иноплеменных в грядущия времена, и, радующеся, со Гавриилом благовестником возопием Ти: радуйся, Обрадованная, Господь с Тобою.
Кондак, глас 4
Притецем, людие, богатии и убозии, сирии и вдовицы, старии и юнии, в тихое пристанище, под покров цельбоноснаго источника Богоматере. Слезы бо, яко реки, источает из обою оку чудотворнаго образа Себежския о находящем гневе за наша злая согрешения и укрепляет град, егоже возлюбила еси, на сопротивныя, утверждает веру православных христиан и избавляет от всякаго зла молитвами Своими.
Величание
Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем, с верою притекающим.

Молитва
ко Пресвятой Богородице
пред Ее иконою «Отрада» или «Утешение» Ватопедскою (Афонскою)

О Пресвятая Дево, Мати Господа, Царице небесе и земли! Вонми многоболезненному воздыханию душ наших, призри с высоты святыя Твоея на нас, с верою и любовию покланяющихся пречистому образу Твоему. Се бо грехми погружаемии и скорбьми обуреваемии, взирая на Твой образ, яко живей Ти сущей с нами, приносим смиренная моления наша. Не имамы бо ни иныя помощи, ни инаго предстательства, ни утешения, токмо Тебе, о Мати всех скорбящих и обремененных! Помози нам немощным, утоли скорбь нашу, настави на путь правый нас заблуждающих, уврачуй и спаси безнадежных, даруй нам прочее время живота нашего в мире и тишине проводити, подаждь христианскую кончину и на страшнем суде Сына Твоего явися нам Милосердая Заступница, да всегда поем, величаем и славим Тя, яко благую Заступницу рода христианскаго, со всеми угодившими Богу. Аминь.
Тропарь, глас 4
О, Покров благодатный и спасительный стяжахом честную Твою икону, Богородице. На сию убо со умилением взирающе, Тебе вопием: Владычице, низпосли отраду и утешение, на Тя упование возлагаем грешнии и смиреннии, на Твое предстательство надеемся недостойнии, ускори нас избавити от бед и скорбей и умоли Сына Твоего, Христа Бога нашего, помиловати и спасти души наша.
Кондак, глас 8
Взбранной Воеводе победительная, яко избавльшеся от злых, благодарственная восписуем Ти, раби Твои, Богородице, но яко имущая державу непобедимую, от всяких нас бед свободи, да зовем Ти: Радуйся, Невесто Неневестная.
Величание
Величаем Тя, Пресвятая Дево, и чтим образ Твой святый, имже болезни наша врачуеши и души наша к Богу возводиши.

Молитва
ко Пресвятой Богородице
пред Ее иконою Печерская-Нерукотворенная

О, Пресвятая и Пренепорочная Дево Богородице, наша Печерская похвало и украшение, державный покрове Святаго места сего, истинная Владычице избраннаго удела Своего. Приими нас, недостойных рабов Твоих, убогое моление с верою и любовию приносящих пред чудным образом Твоим, да посетиши милостивно греховное житие наше, просвещающи его светом покаяния, осени нас, обремененных скорбьми многими, Твоею Небесною радостию и сподоби нас присно славити Тя в мире и благочестии на месте святем сем, да, без порока прешедше путь жития нашего, помощию Твоею достигнем вечнаго веселия во светлостех святых и Богоносных отец наших Антония и Феодосия и всех преподобных Печерских и едиными усты и сердцем воспоем Тя с Предвечным Сыном Твоим, со Безначальным Его Отцем и Пресвятым, Всеблагим, Животворящим и Единосущным Его Духом во веки веков. Аминь.
Тропарь, глас 4
Днесь светло торжествует Печерская обитель и радуется явлением образа Богоматере безмерный лик Печерских отцев, с нимиже и мы непрестанно вопием: радуйся, Благодатная, Печерская похвало.
Кондак, глас 3
Дева днесь невидимо предстоит в церкви и с лики Печерских отцев молится о нас, благоговейно величающих Ея безмерную милость к роду нашему, явльшуюся в чудном образе Ея, обитель Печерскую украшающем.
Величание
Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем, с верою притекающим.

Молитва
ко Пресвятой Богородице
пред Ее иконою Печерская-Свенская

О, Пресвятая и Пренепорочная Дево Богородице, наша Печерская похвало и украшение, державный покрове Святаго места сего, истинная Владычице избраннаго удела Своего. Приими нас, недостойных рабов Твоих, убогое моление с верою и любовию приносящих пред чудным образом Твоим, да посетиши милостивно греховное житие наше, просвещающи его светом покаяния, осени нас, обремененных скорбьми многими, Твоею Небесною радостию и сподоби нас присно славити Тя в мире и благочестии на месте святем сем, да, без порока прешедше путь жития нашего, помощию Твоею достигнем вечнаго веселия во светлостех святых и Богоносных отец наших Антония и Феодосия и всех преподобных Печерских и едиными усты и сердцем воспоем Тя с Предвечным Сыном Твоим, со Безначальным Его Отцем и Пресвятым, Всеблагим, Животворящим и Единосущным Его Духом во веки веков. Аминь.
Тропарь, глас 4
Днесь светло торжествует Печерская обитель и радуется явлением образа Богоматере безмерный лик Печерских отцев, с нимиже и мы непрестанно вопием: радуйся, Благодатная, Печерская похвало.
Кондак, глас 3
Дева днесь невидимо предстоит в церкви и с лики Печерских отцев молится о нас, благоговейно величающих Ея безмерную милость к роду нашему, явльшуюся в чудном образе Ея, обитель Печерскую украшающем.
Величание
Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем, с верою притекающим.